John 9:1-11

¹Ma Jesus te sakusakutua me righi topoa na mane tara vahu rorodoa.

²Ma nina vaovarongo tara huatia, “?Tarai, ahei na paluna te nea ge ra vahu rorodoa na tinoni eni? ?Na paluna heghena pana paludira tamana ma tinana?”

³Ma Jesus te bosatughu, “Na mane eni te rorodo mua pukuna na paluna heghena pana paludira tamana ma tinana. Agaia te rorodo ge na lei tinoni kara righia nina maana God ke tate itatana.

⁴Tana dani ke, ighita ta lutui na lutuna agaia te niu vetena mai. Me dutu tua na bongi, ke mua tangomana na lutu iga siki sakai.

⁵Mi tana bona tu ghahau mua iani tana maramana, inau na mararana na maramana.”

⁶Mi murina te bosa eni, Jesus te angusu tana pari me kolua na nenepa nia na angusuna, ge dalovia na matana na tinoni rorodo.

⁷Ge bosa vania, “Ko tona mo ko va saua na matamu tana kolo Siloam.” (Siloam na ghanaghana iga - ‘nia vetena’). Mana rorodo te tona me saua na matana me reirei tua, ge oli mai tana komuna.

⁸Na ghana komukolu mana vure tara righia inagho mai te nongirongo ge ra huahuati heghedira, “?Ivei tea, agaia eni na mane rorodo te sopou me nongi hahanga pe taho?”

⁹Na balu tara bosa, “Agaia sughua tua eni.” Mana kehana tara ghaghua, “E taho, mua gaia me vagha sughua na reireina.” Ma gaia na mane heghena te bosa, “Inau sughua tua gaia!”

¹⁰Ma gaira tara huatia, “?Ivei tea ge o vaevane tua itaeni?”

¹¹Gaia te bosatughu, “Na tinoni tara holoa nia Jesus te kolua na nenepa, me dalovighi na matagu me bosa vaniu, ge ku va sasau tana kolo Siloam. Mi nau tu tona mu sasau soko mua, mu vaevane tua.”