John 7:17-22

¹⁷Jaliyi nyulu nulijba ngayangayiykanyi Kudkanyi, baki janyulu jingkijba. Jingkijba janyulu nanda jala ngayu maramaramba yalunya. Jingkijba janyulu miku ngayiyi maramaramba ngakinkanyi jangkurranyi. Miku. Maramaramba ngayu ngawamba nanankanyi jangkurranyi Kudkanyi. Maramaramba ngayu nanankanyi jala nyuli karu ngana maramarambikanyi Kudwanyi. Nani barri janyulu jingkijba ngana.

¹⁸Nanda nganinyi, nangkama jala yanyba jangkurr, nulijba nyuli yalungi yingkamukuyngka, yalu barrarrakiykanyi nanda. Nyuli nulijba yalungi ngayangayiykanyi nangangi, barrarrakiykanyi, nanda jala nangkaman yanyba. Ngala nanda jalimi miku nangkama yanyba jangkurr, ngala yanyba nyulu jangkurr nangangi manjijba jali nanda, miku nyulimi nulijba yalungi, yalu barrarrakiykanyi nanda. Miku. Ngala nulijba nyuli yalungi barrarrakiykanyi nanda yingka, jali manjijba yalundurri. Nanda jala nulijba yalungi nani nanankanyi yingkanyi, nanda yurlurr jala jungku.

¹⁹Nanangini wankalawanyi Musiswanyi, wajba nyuli narrinya nanankanyi yuwanyi. Ngala miku narriyi ngayangayijba nanankanyi yuwanyi. Miku narriyi jungku kunybana yuwana Musiskanyi. Wanyingkanyi narri nulijba ngaki, kurdanbikanyi nganarri. Wanyingkanyi. Miku narrimi nani jungku kunybana yuwana Musiskanyi, nulijba jala narri kurdanbikanyi nganarri.” Nani yanybayi Jisus yalungi.

²⁰Ngala yanyba yali nangangi, “Ninji mudu, wuwarrngangi nganyindu jungkuka mankanyina. Miku nurrimi nulijba nganyi kurdanbikanyi ninya. Miku. Mudu ninji. Mudu.” Barriwa.

²¹Jananganjayi Jisuswanyi, “Yabimba ngayi ngiruka yaji nganiyngkanyi, baki manmala narri. Kudanyu narri manmala jali ngayu kunymamba nanda nganinyi balkiyudi mankanyiyudi. Kunymamba ngayi nanda nganinyi Sadidi. Ngala yanyba narri ngaki, ngayi waki, jali ngayu kunymamba nanda Sadidi. Yanyba narri, ngayi jungku balkina yuwana.

²²Nanangini Musiswanyi, jirrinyba nyuli narrinya, narri kaburrmbikanyi bardarda juka. Jalili jungku bardarda yingamali wik, baki munganawa narrili kaburrmba nanda bardarda. Karlba narri bardarda mankanyi nananyina kambana. Ngayangayijba narri nanankanyi yuwanyi, jali yarrijba najana Musiswanyi. Marda nanamuku wankalamuku jungku yali barrabarruji. Jungku yali waluwa Musiskanyi ngala nyuli jilijba. Marda yalili kaburrmba bardarda. Barriwa. Yabimba narri nanda yuwa Musiskanyi. Kaburrmba narri bardarda. Kaburrmba narri bardarda, marda Sadidi. Nani narri waki Sadidi, baki jungku narri balkina nananyina yuwana, miku wakinkanyi Sadidi. Nani ngayi waki marda Sadidi, jali ngayu kunymamba nanda nganinyi mankanyi Sadidi. Wanyingkanyi narri jungku ngarrangarra muwa ngaki. Wanyingkanyi. Marda narringkimi mankumanku kudanyu waluku.