John 6:47-71

⁴⁷Nga fahk na pwaye nu suwos: el su lulalfongiyu, oasr moul ma pahtpat yorol.

⁴⁸Nga bread in moul.

⁴⁹Papa matu tomowos elos mongo manna yen mwesis, tusruktu elos misa.

⁵⁰A funu bread su tuku inkusrao me, kutena mwet su mongo kac el fah tiana misa.

⁵¹Nga pa bread in moul su tuku inkusrao me. Kutena mwet fin kang bread se inge, el fah eis moul ma pahtpat. Bread se su nga fah sang nu sel pa ikok, su nga sang tuh faclu fah ku in moul.”

⁵²Kas se inge purakak sie akukuin upa inmasrlolos, na elos asiyuki ac fahk, “El ac ku in ase fuka ikwal kut in kang?”

⁵³Jesus el fahk nu selos, “Nga fahk na pwaye nu suwos: kowos fin tia mongo ke ikwen Wen nutin Mwet ac nim srahl, ac fah wangin moul in kowos.

⁵⁴Kutena mwet su mongo ke ikok ac nim srahk fah oasr moul ma pahtpat yorol, ac nga fah akmoulyalak ke len se safla.

⁵⁵Tuh ikok pa mwe mongo pwaye, ac srahk pa mwe nim pwaye.

⁵⁶Kutena mwet su mongo ke ikok ac nim srahk, el moul in nga, ac nga moul in el.

⁵⁷Papa su moul El supweyume, ac ke sripal nga oayapa moul. In ouiya sacna, kutena mwet su mongo ke ikok fah moul ke sripuk.

⁵⁸Pa inge bread se ma tuku inkusrao me. Tiana oana bread ma papa matu tomowos mongo kac, na tok elos misa. Mwet se ma mongo ke bread se inge fah moul ma pahtpat.”

⁵⁹Jesus el fahk ma inge ke el luti in iwen lolngok in acn Capernaum.

⁶⁰Mwet puspis sin mwet tumal lutlut elos lohng ma inge, ac elos fahk, “Mwe luti inge arulana upa. Su ku in kalem kac?”

⁶¹Wanginna mwet fahkang ma inge nu sin Jesus, a el sifacna etu lah elos mungulngul kac, ouinge el fahk nu selos, “Ya ma inge oru kowos ke fuhleak?

⁶²Na ac fuka kowos fin liye Wen nutin Mwet el folokyak nu yen el muta we meet?

⁶³Ngun lun God pa asang moul. Wangin sripen ku lun mwet uh. Kas su nga kaskaskin nu suwos, ma sin Ngun lun God su ase moul.

⁶⁴Ne ouinge, kutu suwos tia lulalfongi.” (Jesus el nuna etu oe ke mutawauk lah su mwet ma ac tia lulalfongi, ac su mwet se ac tukakunulak.)

⁶⁵Ac el fahk pac, “Pa na inge sripa se oru nga tuh fahk nu suwos mu wangin sie mwet ku in tuku nu yuruk Papa El fin tia kasrel elan ku in tuku.”

⁶⁶Ke sripa se inge, mwet puspis sin mwet fahsr tokol elos folokla ac tia sifilpa welul.

⁶⁷Ouinge el siyuk sin mwet tumal lutlut singoul luo, “Ac kowos, ya kowos lungse pac som?”

⁶⁸Simon Peter el topuk, “Leum, kut ac som nu yurin su? Kas ma ase moul ma pahtpat oasr yurum.

⁶⁹Ac inge kut lulalfongi ac etu lah kom pa El su Mutal su tuku sin God me.”

⁷⁰Jesus el topuk, “Nga pa sulekowosla mwet singoul luo, pwaye? Ne ouinge, a sie suwos el devil!”

⁷¹El kaskas kacl Judas, wen natul Simon Iscariot. Tuh Judas, el ne sie sin mwet tumal lutlut singoul luo, el pa ac tukakunulak uh.