Joaŋ 6:47-71

⁴⁷Biŋŋanô, aê jasôm tobiŋŋanôgeŋ êndêŋ amac gebe Eŋ taŋ kêkêŋ gêwiŋ naŋ, gêŋgôŋ mata jali teŋgeŋ.

⁴⁸Mo ŋamalac gêŋgôŋ mateŋ jaliŋa aê.

⁴⁹Tamemi seŋ mana aŋga gamêŋ sawa, mago sêmac êndu.

⁵⁰Mo tecenec kêsêp aŋga undambê gêmêŋ gebe teŋ embe êniŋ oc êmac êndu atom.

⁵¹Mo mata jali, taŋ kêsêp aŋga undambê gêmêŋ naŋ aê. Ŋamalac teŋ embe êniŋ mo tau tonec, oc êŋgôŋ mata jali teŋgeŋ. Ma mo tau, taŋ aê jakêŋ naŋ, tauc ôlic tec jakêŋ gebe ŋamalac samob sêŋgôŋ mateŋ jali.”

⁵²Judawaga aweŋsuŋ gêôc ka tauŋ ma sêsôm gebe “Amboac ondoc, ŋac tonec kêtôm gebe êkêŋ nê ôli aêac taniŋ me.”

⁵³Tec Jesu kêsôm gêdêŋ êsêac gebe “Biŋŋanô, aê jasôm tobiŋŋanôgeŋ êndêŋ amac gebe Amac embe aniŋ Ŋamalacnê Latunê ôli to anôm ênê dec atom, oc matem jali ŋam ênêc amacŋa atom.

⁵⁴Eŋ taŋ geŋ aêŋoc ôlic to gênôm aêŋoc dec naŋ, gêŋgôŋ mata jali teŋgeŋ, ma aê oc jaŋu eŋ sa êndê bêc ŋamuŋa,

⁵⁵gebe aêŋoc ôlic kêtu gêŋ taniŋŋa ŋanô tau, ma aêŋoc dec kêtu gêŋ tanômŋa ŋanô tau.

⁵⁶Eŋ taŋ geŋ aêŋoc ôlic to gênôm aêŋoc dec naŋ, gêmoa aê ŋalelôm ma aê gamoa eŋ ŋalêlôm.

⁵⁷Tamoc mata jali kêsakiŋ aê gamêŋ, ma aê tec gamoa matoc jali kêtu Tamocŋa. Ma eŋ taŋ geŋ aê naŋ, êŋgôŋ mata jali êtu aêŋa amboac tonaŋgeŋ.

⁵⁸Mo tau, taŋ kêsêp aŋga undambê gêmêŋ naŋ, kêtôm mo, taŋ tamemi seŋ-seŋ ma sêmac êndu naŋ atom. Eŋ taŋ geŋ mo tonaŋ êŋgôŋ mata jali teŋgeŋ.”

⁵⁹Biŋ tonaŋ Jesu kêsôm gêdêŋ kêdôŋ mêtê gêmoa lôm Kapanaumŋa.

⁶⁰Ênê ŋacseŋomi gwalêkiŋ sêŋô biŋ tonaŋ ma sêsôm gebe “Biŋ tonaŋ ŋawapac sec. Asa kêtôm gebe êkêŋ taŋa.”

⁶¹Jesu kêjala gêc tau gebe nê ŋacseŋomi sêli aweŋ sa, tec kêsôm gêdêŋ êsêac gebe “Biŋ tonec kêtu kasec amac me.

⁶²Ma embe alic Ŋamalacnê Latu êmu êpi gamêŋ, taŋ andaŋgeŋ gêŋgôŋ naŋ êna, oc amboac ondoc.

⁶³Ŋalau tageŋ êkêŋ ŋamalac sêŋgôŋ mateŋ jali. Ôliŋ oc ênam sa naeo. Biŋ taŋ kasôm gêdêŋ amac su naŋ, tau ŋalau to mata jali.

⁶⁴Mago amacnêm ŋagêdô sêkêŋ gêwiŋ atom.” Jesu kêsôm biŋ tonaŋ gebe kêjala êsêac, taŋ sêkêŋ gêwiŋ eŋ atomŋa naŋ, ma kêjala ŋac, taŋ eoc eŋ lasêŋa naŋ kawanaŋgeŋ.

⁶⁵Tec kêsôm gebe “Kêtu tonaŋŋa tec kasôm gêdêŋ amac gebe Ŋac teŋ kêtôm gebe tau êndêŋ aê êmêŋ atom, Tamoc êlôc êndêŋ eŋ acgom.”

⁶⁶Gêdêŋ tonaŋ ênê ŋacseŋomi gwaŋkiŋ sêwi eŋ siŋ sêsêlêŋ sêwiŋ eŋ kêtiam atom.

⁶⁷Tec Jesu kêsôm gêdêŋ êsêac lau 12 gebe “Ma amac abe aêc ana amboac tonaŋgeŋ me.”

⁶⁸Ma Simon Petere gêjô eŋ awa gebe “Apômtau, aêac oc andêŋ asa ana, aŋgôŋ mateŋ jali teŋgeŋ ŋam gêc aômgeŋ nêm, biŋ.

⁶⁹Ma aêac akêŋ gêwiŋ to ajala gebe Anôtônê ŋac dabuŋ aôm.”

⁷⁰Go Jesu gêjô êsêac aweŋ gebe “Aê kajaliŋ amac lau 12 sa me masi. Mago amacnêm ŋac teŋ kêtu Sadaŋnê ŋac.”

⁷¹Eŋ kêsôm biŋ tonaŋ kêpi Simon Isariot latu Juda, taŋ gebe eoc eŋ lasê naŋ. Êsêac lau 12 nêŋ ŋac teŋ eŋ.