John 5:5-11

⁵One man been dey wa been sick tirty-eight yeah.

⁶Wen Jedus come, e see de man leddown dey. E know dat man been sick a long time, so e aks um say, “Ya wahn fa git well?”

⁷De sick man ansa say, “Sah, A ain got nobody fa pit me een de wata wen e moob. Ebry time A da try fa git een, somebody beat me ta de wata.”

⁸Den Jedus tell de man say, “Git op fom dey. Pick op ya mat an waak!”

⁹All ob a sudden de man been well. E pick op e mat an waak. Now den, dis ting happen pon de Jew Woshup Day.

¹⁰So de Jew leada dem see de man wa been sick an done git well, da tote e mat. Dey tell um say, “Dis yah we Woshup Day, an e ginst we Law fa ya fa tote ya mat pon we Woshup Day.”

¹¹Dat man ansa say, “De man wa mek me well tell me fa pick op me mat an waak.”