Johannes 5:39-46

³⁹Ämi oua achocho le kaiö masouen ekewe Toropwe mi Pin, pun oua ekieki pwe oupwe küna manau esemüch lor. Ekei Toropwe mi Pin ra pwärätä usi.

⁴⁰Nge ämi ousap mochen feito rei pwe oupwe eäni ewe manau.

⁴¹Üsap mochen ai üpwe iteföüla me ren aramas.

⁴²Nge ngang üa silei usumi. Üa silei pwe ämi ousap echeni Kot lon lelukemi.

⁴³Ngang üa feito fän iten Semei, nge ämi ousap etiwaei. Nge are pwal eman epwe feito fän püsin itan, ämi oupwe etiwa i.

⁴⁴Ämi oua sani ämi oupwe iteföüla me ren eman me eman leimi, nge ousap kütta ämi iteföüla me ren Kot. Epwe ifa usun ämi oupwe tongeni lüküei?

⁴⁵Ousap ekieki pwe üpwe atipisikemi me mwen Semei. Moses ätewe oua anomu ämi apilükülük won epwe atipisikemi.

⁴⁶Are ämi oua wesewesen lükü Moses, ämi oupwe pwal lüküei, pun i a makkei usi.