JOHAN 3:1-33

¹Farasi hrong letah pakheh, a ming Nikodema aa tahpaw cawh ung ka, ama cawh Juda cawngsaw sahlo a uhtu khongsil macang hrong leteipaw a cang.

²Zaicing tah Zisu khaco a vong ka, a hai leco, “Rabbi, nama cawh Khazing taitei a va chuhpaw cawngpahtu na cang tahpaw kaa hni. Khazing tah a ungkhui ly caco he na tuapaw hming hapaw ningang chuipaw paching pakhanah heh ahotahmai tah tua khy bei he,” a tah.

³Zisu tah ma hrahei a palei, “Biahmuisui ka ca ching, ahohmai aa pitha ly caco, Khazing painah raang hmuh khy bei he,” tatah a tah.

⁴Nikodema taco, “Cawngsaw cawh a macang khy taitah zekhatamaw a pitha thai khaw a? A no a chi chunglang a nae kaw tah a pi kaw thai khawh tlung be,” tatah a tah.

⁵Zisu tah ma hrahei a chai, “Biahmuisui ka ca ching, ahohmai tui le Thlawpaw tah a pi ly caco, Khazing painah raang a nae bei he.

⁶Ngaisaw taco ngaisaw a sah kaw, Thlawpaw taco thlawpaw a sah hrah.

⁷‘Na pitha ruapaw a cang,’ tatei ka ca tahpaw heh na ningang kheh seh.

⁸Thli cawh a dudú tah a hrang, a pyraw na thui. Zelang tamaw a va chua, zelang maw a sei a tahpaw na hni tlung be. Thlawpaw tah a pipaw cawh ma hraco aa cang,” tatah a tah.

⁹“Ma hapaw cawh zekhatamaw a cang thai a?” tatah Nikodema taco a hae hri kaw.

¹⁰Zisu taco, “Israel cawngsaw sahlo cawngpahtu a cangpaw tah ma hapaw hming sahlo cawh hnih thai bei ceh maw?

¹¹Biahmuisui ka ca ching, hnih peh ka, kaa rei, kaa hmuhpaw kong khah kaa rei lai, canghrasala kaa reipaw khah naaning tah zing tlung bei he ceh.

¹²Aluicung hming kong ka reipaw hmai naa zing tlung be, vaicung lang kong sahlo cawh ca ching my he neh seh la, zekhatamaw naa zing khy thai a?

¹³Cawngsaw Sawcapaw, vaicung taitei a vongpaw cy tah ly co ahohmai tah vaicung lang aa ke bang tlung be.

¹⁴Moses tei raangcaa letah daa pari a caliapaw hratah Cawngsaw Sawcapaw heh calia a cang hrá a.

¹⁵Macawtaco Ama a zingpaw maikaw cawh chaizaw tah a hring he a.

¹⁶Khazing tah khazaw heh a do ngeteinah cawtah a Sawcapaw hnuitlakangpaw khah a peh. Ahohmai a zingpaw maikaw cawh lyde lytah chaizaw hringnah aa hnui a.

¹⁷Khazaw heh thaily cang sá pawtah Khazing tah a Sawcapaw cawh a tawpaw cang be, Ama a thongtah pachah aa cang khy nápawtah a tawpaw khah a cang hri.

¹⁸Ama a zingpaw maikaw cawh thaily cangsah cang a bei he. Canghrasala a zing lypaw maikaw cawh ato lalei hei thaily a cang thah he, Khazing Sawcapaw hnuitlakangpaw ming aa zing lynah cawtah a cang.

¹⁹Ma heh thaily cangnah cawh a cang. Akhaipaw cawh khazaw lehei a vong ka, canghrasala cawngsaw tah a khaipaw navy tah a muipaw aa tlechai vy, zecawtamaw tatah aa hming tuapaw sahlo khah a chahlynah cawtah a cang.

²⁰Ahohmai hmingchaw ly a tuapaw maikaw taco akhaipaw a hua he, taico akhaipaw lang zong a vong du bei he, hmingchaw ly aa tuapaw khah akhaipaw letah a langpang le tahpaw aa cinah cawtah a cang.

²¹Canghrasala biahmuisui letei a hringpaw taco akhaipaw lang cawh a vong he. Aa tuapaw hming vytei khah Khazing thongtah aa tuapaw a cang tahpaw khah a lang pase khy nápawtah,” tatah a tah.

²²Ma khy taico Zisu cawh a hningzuitu sahlo khatah Judia raang khuatei lang khah sei he ka, ma letaco zemaw cai hrawng ung ka, baptisma zong a cangsah he.

²³Mataico, Johan zong tah Salim khua kae Ainon aa tahpaw letaco baptisma cangsah he ka, cawngsaw hlupui tah ama khatah baptisma cang rua pawtah aa pange. Zecawtamaw tatah ma leco tui ahlunah cawtah a cang.

²⁴Ma heh Johan cawh thong letah a tlah hlai tah a cang.

²⁵Johan hning a zuipaw sahlo thaikhehpaw le Juda cawngsaw pakheh cawh a sipathainah phung le lang kong letah bia a ei he.

²⁶Johan khaco a vong he ka, a hai leco, “Cawngpahtu, Jordan tuivaw rae lang letei nama khatah a ungpaw, a konglang na reilaipaw takhei baptisma cangsah he ka, cawngsaw hlupui tah aa pange,” tatah aa ching.

²⁷Johan taco, ma hrahei a palei he, “Vaicung taitah pehpaw suipaw khah cawngsaw taco a hnui khypaw a cang.

²⁸Kama cawh, ‘Khri cang bei neh, zua a ky ruapaw tei a hmelang a seilai ruapaw tah tawpaw ka cang,’ ka tahpaw khah naaning sahlo ceingei tah naa hni.

²⁹Myno cawh my a hnuitupaw cawtah a cang. My a hnuitupaw a vesaw a cangpaw taco ama cawh heh thlang ka, a naw thlia paria thlang. My hnuitu o cawh a thui tih letaco a thaw a chah ngetei. Ma a lawngnah cawh kama ka cawtah cang ka, atoheh a va tlung thah hi.

³⁰Ama cawh a laisui ruapaw a cang, kama cawh a zochuh ruapaw ka cang.

³¹Cung lang taitah a va chuhpaw cawh ming vytei cung letei a ungpaw a cang, aluicung taitei a chuhpaw cawh alui cawngsaw cang ka, aluicung kong khah a rei. Avai taitei a va chuhpaw cawh ming vytei cung letei a ungpaw cawh a cang.

³²A hmuhpaw le a thuipaw khah a thuisah he, canghrasala a thui sahpaw he bia cawh ahotahmai nge bei he.

³³A bia a ngepaw taco Khazing cawh a ding hmuisui tahpaw khah a pacysah.