Joaŋ 4:27-40

²⁷Gêdêŋ tonaŋ ênê ŋacseŋomi sêô lasê e têtakê, gebe gêjam biŋgalôm gêwiŋ awê teŋ. Mago nêŋ teŋ kêsôm gebe “Aôm gobe amboac ondoc,” me “Aôm kôsôm asageŋ gêdêŋ eŋ,” nec atom.

²⁸Awê tau gedec nê ku kêkô ma gêja malac jakêsôm gêdêŋ lau gebe

²⁹“Amêŋ alic ŋac teŋ, tê kêsôm ŋoc gêŋ, taŋ gagôm naŋ, samob lasê nê. Oc moae Kilisi tau me.”

³⁰Tec êsêac sêsa aŋga malac dêdêŋ eŋ sêja.

³¹Gêdêŋ ŋasawa tonaŋgeŋ ênê ŋacseŋomi jateteŋ eŋ gebe “Mêtêmôkê, ôniŋ gêŋ.”

³²Tec eŋ kêsôm gêdêŋ êsêac gebe “Aêŋoc mo teŋ tec gêc, amac ajala atom.”

³³Ma ênê ŋacseŋomi sêsôm gêdêŋ tauŋ gebe “Ŋac teŋ kêkêŋ gêŋ taniŋŋa gêdêŋ eŋ me.”

³⁴Tec Jesu kêsôm gêdêŋ êsêac gebe “Aêŋoc mo tonec gebe jaŋgôm ŋac, taŋ kêsakiŋ aê gamêŋ naŋ, nê biŋ êtu tôŋ to janac dabiŋ ênê koleŋ.

³⁵Amac asôm gebe ‘Ajôŋ aclê ênaŋa acgom, go tajoŋ kôm ŋanô sa,’ asôm me masi. Ma aê tec jasôm êndêŋ amac gebe Aôc matemanô ŋa alic gêŋ kômŋa gebe mo tau ŋakwac kêtu sôlôcgac.

³⁶Ŋac-kejoŋ-sawaga kêkôc nê ŋaôli tec gêmoa ma gêjac ŋanô sêŋgôŋ mateŋ jali teŋgeŋŋa sa, e ŋackêsêgêŋwaga agêc ŋac-kejoŋ-sawaga lulugeŋ têntac ŋajam.

³⁷Biŋ tonec biŋŋanô gebe ŋac teŋ kêsê ma ŋac teŋ kejoŋ ŋanô sa.

³⁸Aê kasakiŋ amac gebe akôc kôm, taŋ ajam atom naŋ, ŋanô sa. Lau teŋ gêjam ŋakôm su, ma amac akôc êsêac lemeŋgêdô su.”

³⁹Lau Samaria taêsam aŋga malac tonaŋ sêkêŋ gêwiŋ eŋ kêtu biŋ, taŋ awê kêsôm lasê gêdêŋ êsêac naŋŋa gebe “Eŋ kêsôm aêŋoc gêŋ, taŋ gagôm naŋ, samob gêdêŋ aê.”

⁴⁰Amboac tonaŋ lau Samaria dêdêŋ eŋ sêja ma teteŋ eŋ gebe êmoa êwiŋ êsêac. Tec eŋ gêmoa gamêŋ tonaŋ kêtôm bêc luagêc.