Jenesis 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Aria saen euna dana ben oso bilen uqa ijan Kedoleoma. Uqa Ilam agena king. Wele Kedoleoma uqa king ebum oso cadadimei ilo bilen. King ebum oso i age eu odi. Sodom agena king Beraca Gomora agena king Birsaca Adma agena king Sinabca Seboim agena king Semebaca Bela agena kingca. Kedoleoma uqa cabi gel 12 eu odi king ebum oso agena ilo bilen. Odocob cabi gel 13 docna king eu age Kedoleoma feedoin. Odocob cabi gel 14 docna Kedoleoma uqana danah king ijedca gami gabandoin. King ijed i age eu odi. Sina agena king Amrafelca Elasa agena king Ariokca Goim agena king Tidalca. Kedoleoma king ijedca agena han dana cedadimeig jicna bebeli bileig Refaim dana age Asterot-kanaim ono bibilegin aqadein. Odimeig age Susim dana Ham onoha aqadein. Odimeig Emim dana Kiriataim onoha aqadein. Odimeig Ho dana age Sia agena hatu aluhca jabadi ehi nui El-paran gadac ono aqadein. El-paran eu wadau naca qee cemenug nijia. Odimeig age haun ceselein. Ceseli humeig En-misbat ono calein. En-misbat eu Kades. Odimeig ono han cadimeig Amalek agena hatu eu cunug oin. Odimeig Amo age Hasason-tema ono bilein euha aqimeig hatu eu oin. Aria Sodom agena kingca Gomora agena kingca Adma agena kingca Seboim agena kingca Bela eu Soa agena kingca age wele gabandoin. Age Kedoleomaca uqana han danaca aqadecnu sacia dumeig gabandu Sidim maha asouna ono cali hoin. Sidim eu wa macasca bahic cudun.

⁹Age Ilam agena king wal oso i age han cadoqagannu cajein. Ilam agena king eu Ilam agena king bahic Kedoleomaca Goim agena king Tidalca Sina agena king Amrafelca Elasa agena king Ariokca. Eu king wal oso age king ebum oso gami han cadoqagannu cajein.

¹⁰Aria Sidim asou eu maha baial. Helo mati bahic euna gag bibi nijen. Odocob Sodom Gomoraca alena king hannu bubusali bilesi helo euna nosin. King ijed ale culadesin euha busalein qa age aluhna belein.

¹¹Odocobil king wal oso age Sodom Gomoraca agena ceteteh cunugca agena sab cunugca cedimeig belein.

¹²Ebram melah Lot uqa Sodom ono bilen uqaha ehudimeig uqana ceteteh cunug cedimeig belein.

¹³Aria Ebram uqa Mamri Amodec uqana na benben gugna bilen. Mamrica uqa waliagul Eskol Aneca age Ebramna danah. Odimei Ebram bibilen dana oso hannadec busali humei Hibrudec Ebram madocob don.

¹⁴Odimei uqa uqana sihul eundec u hewi nueiga ec dah mimei uqa uqana cabi dana 318 eu hannu wele iwaladec eu age uqana jobon bilein cedadeceb age tooadi beli Dan ono calein.

¹⁵Uqa witic euna uqana dana qataneceb uqa uqana cabi danaca age aqimeig jabadi ehi nui Hoba ono calein. Eu Damaskas taun hagen ono isec.

¹⁶Odimei Ebram uqa melah Lotca uqana cajaca uqana ceteteh cunugca dana cajaca king wal oso agena ceteteh cedein eu cawaladi cedimei ceselen.

¹⁷Aria Ebram uqa Kedoleoma king leih uqaca gabandoin eu hanna aqimeig ceselein. Eu hedumei ceseli limei Sawe maha asouna ono calen. Sawe eu ijan oso King Agena Maha Asou. Ono Sodom agena king Ebram gulucdon.

¹⁸Ono Melkisedek Salemdec king uqaha Ebram gulucdon. Melkisedek uqa Anut Ohis Bahic uqana gemo tawec ihanec dana Ebram eeldoc je madugiannu bret wainca hewimei li gulucdon.

¹⁹Odimei uqa Ebram eeldudu madon, “Anut Ohis Bahic uqa sao mahaca ifanen eu Ebram eeldoiale.

²⁰Anut Ohis Bahic hina cesulheceb han wooldoga eu binan suleqale,” don.

²¹Odocob Ebram ceteteh cunug ila meceb li am 10 calen. Odocob 10 eundec osahic eu Melkisedek uten. Odocob Sodom agena king uqa Ebram madon, “Dana cajaca ija iiteg ceteteh eu hina cedega,” don.

²²Odocob Ebram Sodom agena king madon, “Anut Ohis Bahic uqa sao mahaca ifanen eu uqa amegna wele je cagu madiga.

²³Ija hinana ceteh oso qee ugaun. Halu wegecfo jaimiga tacec halufo qee ugaun. Hibna hina ija Ebram cehewanca mudem ec madagaun.

²⁴Ijadodocnu ija ceteh oso qee ugaun. Ijana dana sab jein eu cois agena ceteteh eu himec ugen. Qa ijana danah Ane, Eskol, Mamrica eu age age mugumuga mec eu himec cois oqagan,” don.