Israel Hanigo Namba 21:7-25

⁷Tama te we bidi te Moses pageba aselama, e tama po wali, “Dago sęgę polo salio, te dago Genuai Bidi dali, me nage dali wado po walide. Megi nago Genuai Bidibolo gedu haluasa po wao, agai te gula mani sela sąmainao,” wali. Tama Mosesgo te we bidi tau somainogo Genuai Bidibolo gedu haluasa po wali.

⁸Genuai Bidigo te gedu haluasa po wabo odama, tama agai Mosesbolo e tama po wali, “Nago te dwai gula manigo noma me nigilama, tama moni bobobage pos nide walao. Tama te mena we bidi augwali te gula manigo gąǫ kelali da, augwaligo te gula mani nomaba tonobode augwali me isigobeo. Menio, augwali usu ma yaibao,” te po wai.

⁹Tama Mosesgo te brasgo gula mani me nigilama, tama bobobage ni posde walali. Tama te gula manigo te we bidi gąǫ kelali da, teda augwaligo te bras gula maniba tonobo si da, augwali usu ma yali.

¹⁰Te Israel dabe augwali te Hor bulu du taga pelama, tama te bulu Obotde bidabo pesage nigali.

¹¹Nosali augwali te bulu Obot taga pelama, Abarimba bidabo pesage nigigi pali. Te bulu Abarim te dolama mu elaluali. Abarim te Moap bulude giliga asobo badu elaluali, te nai meni yai bulude elaluali.

¹²Tama nosali augwaligo te pesage taga pelama, augwali te Seret odogo buluba pesage nigigi pali.

¹³Tama nosali augwaligo te wę Arnon nogegi pelama, te Arnon wę not badu augwaligo pesage nigigi pali, te nai meni yai bulude. Te nai meni yai bulu te Amor dabego buluba pai elaluali. Tama te wę Arnonde dąį yai elaluali.

¹⁴Te po pusubo sęgę yaigo te Genuai Bidigo hwįani po te bulude tama naga po pusali. Agai te po wabo, “Te bulu Wahep te Sufa badu me odogo bulu, me Arnon wę me te odogo bulu te hanu Arba usu nigi pelama,

¹⁵me te bulu Moap badu dąį igi pali badu usu nigi pali,” te bukude te po tama elalubao.

¹⁶Nosali augwaligo te bulu tagalama, tama augwali te bulu me augwaligo tǫ dedage wę wabo te buluba pali. Te bulude te ulu wę genuai deli elaluali. Tama te węde Genuai Bidigo Mosesbolo e tama po wali, “Te we bidi i olama, tama augwali sisinagasobo si, eno augwali wę mawaibao,” wali.

¹⁷Tama te sogo te Israel dabego te balia po wali, “Ulu wę, nago wę pedalama soao. Tama dago te sulama, tama dago wiegi yai homu pemene ebo balia po waibao.

¹⁸Te tuni bidi dabe, me tobolu bidi dabe, augwaligo te tobolu bidigo dono me biliyu, sabilibo dono me nogo tolasali, tama augwaligo te ulu wę digawali.” Tama nosali te Israel dabe augwaligo te nai meni yai bulu taga pelama, augwali te bulu Matanaba pali.

¹⁹Tama augwali te bulu Matana taga pelama, te bulu Nahalielba pali. Tama nosali augwali te bulu Nahaliel taga pelama, augwali te bulu Bamotba pali.

²⁰Tama augwali te bulu Bamot tagalama, augwali te bulu Moap te bulu du Pisga pąba pali. Te bulu dudu te bidi dabego te nai meni yai buluba tonobo dao.

²¹Nosali te Israel dabego te Amor tuni bidibolo po olama tolali. Augwaligo te po olama tolali,

²²“Dago homugo nago da nago buludu somainogo sula tagalao. Dago te sunumi me tagalama, da dagego giba me o wain giba me bogea peyu me egobeo. Tama me dagego ulu wę dabe me tuyu me egobeo. Da te moni sunumide pedu genama, nago bulu taga pabo si, tama usu naibao,” te po ola tolali.

²³Tiali goli, te tuni bidi Sihongo te Israel dabe agai buludu soao homu ebeo. Tama agai aga ami bidi dabe sisinama, tama augwali te hanu Jahasba te nai meni yai buluba pelama, te Israel dabe dali hwįgi pali.

²⁴Tiali goli, Israel dabego te Amor hani hauwa me elama, augwaligo tǫ sali. Te wę Arnondu gagalama, te not badu elalubo wę Jabokba usu nigi pali. Teda te bulu Amongo bulu dąį dao. Tama te Amon hanigo bomai ami bagego te bulu dąį tonalubo dao.

²⁵Tama te Israel dabego te hanu Hesbon me, te meba pąde elaluali hanu dabe me, te Amor dabego hanu dabe sese tama sali, tama augwali te hanu dabede bidali.