Numero 21:7-25

⁷Midhendiyà is menge etew te ki Moises ne ke sikandan te, “Nekesalè key su mezaat is menge lalag dey mehitenged te Nengazen wey kenikew. Iampù nu te Nengazen he iawè din diyà te kenami heini is menge uled.” Umbe mid-ampù si Moises para te menge etew.

⁸Migkaǥi is Nengazen diyà te ki Moises te, “Kuwa ka te brunsi, ne veeli nu he ledawan te edhereg he uled, ne kuwa ka te idtukud nu zuen ne itaud nu ziyà te purù. Is minsan hentei he nekaǥat te uled ne edtengteng dà dutun te uled he brunsi ne egkeuyag sikandin.”

⁹Umbe, mibaal si Moises te uled he brunsi ne intaud din diyà te purù duen te intukud din. Ne is minsan hentei he nekeǥatan te uled, midtengteng dà dutun te uled he brunsi ne neuyag.

¹⁰Midlaus medhipanew is menge Israilihanen, ne migkampu sikandan diyà te Obot.

¹¹Ne puun te Obot, midhipanew sikandan ne migkampu zan diyà te Iye Abarim, diyà te sibsivayan he zapit te edsilaan he atbang te Moab.

¹²Ne puun dutun midhipanew sikandan ne migkampu zan diyà te zal-ug he Zered.

¹³Ne puun te Zered midlaus sikandan medhipanew ne migkampu zan diyà te uvey te veyvey te zal-ug he Arnon, he ziyà te sibsivayan he uvey te tanà te menge Amorihanen. Is Arnon iyan dulunà te tanà te menge Moabitanhen wey menge Amorihanen.

¹⁴Iyan heeyan hinungdan ke maan is ingkesurat diyà te Libru te Guǥud te Kebpekidtebek te Nengazen is inged diyà te Waheb he sakup te Sufa, is menge zal-ug ragkes en is Arnon,

¹⁵wey is alug te menge zal-ug he ebpeketemu ziyà te inged he Ar he ziyà te dulunà te Moab.

¹⁶Puun diyà te Arnon midhendiyà is menge Israilihanen te Beer, kes teheb he zutun megkaǥi is Nengazen diyà te ki Moises te, “Tiǥuma nu is menge etew su ebeǥayan ku sikandan te wahig.”

¹⁷Ne zutun kentaha te menge Israilihanen heini he kentahan: “Ebpedayun ebeǥey te wahig heini he teheb! Egkanta kiw mehitenged kayi he teheb

¹⁸he impekalut te menge pengulu wey dungganen he menge etew pinaaǥi te keǥehem dan.” Ne puun dutun he sibsivayan midhendiyè dan te Matana;

¹⁹ne puun te Matana midhendiyè dan te Nahaliel; ne puun te Nahaliel midhendiyè dan te Bamot;

²⁰ne puun te Bamot midhendiyè dan te suǥud-suǥud te Moab, dutun he lugar emun diyè ki te puntur te Pisga edkepantew ta is sibsivayan.

²¹Ne midsuǥù is menge Israilihanen te menge menunudtulà diyà te ki Sihon he hadì te menge Amorihanen. Iyan heini tudtul he uwiten dan:

²²“Emun egkehimu, ituǥut nu kenami is kebayà diyà te tanè niw. Kenè key ebayà diyà te menge bevesukè niw etawa pemuleey niw te paras wey kenè key ed-inum diyà te menge teheb niw. Ed-ikul key zà diyà te zekelà he zalan taman te ebpekeǥawas key te tanè niw.”

²³Piru wazà mebpezumazuma si Sihon he ebayà is menge Israilihanen diyà te tanè din. Midtiǥum din hinuun is langun he menge sundaru zin ne midhendiyè dan te sibsivayan su edsurungen dan is menge Israilihanen. Hein nekeuma zan diyà te Jahaz, midtebek dan is menge Israilihanen.

²⁴Piru migerà sikandan te menge Israilihanen, ne mid-aǥew te menge Israilihanen is tanè dan puun te wahig he Arnon pehendiyà te Wahig he Jabok. Piru taman dà sikandan te dulunà te tanà te menge Amunihanen, su melig-en is berengbeng dutun te dulunà.

²⁵Umbe, naaǥew te menge Israilihanen is langun he dezekelà he inged te menge Amorihanen ne mid-ubpaan dan haazà, ragkes is Heshbon wey is langun he dezeisey he inged he sakup kayi.