Isanquienare Joa 21:2-15

²Napatojeitaca, nocarajeitiri Shimo Petero, jeri iriori Tomashi: icanteetiri aisati Tsipari. Jeri Natanaeri poneachari Canaqui, onta carireaquiniri. Narojeitaque itomipee Severeo. Jeri aisati apite pashini iroamere Jesoshi. Napatojeitaca maaroni.

³Icantajeitana Shimo Petero: —Nojate nonquitsate. Nocantajeitanaqueri: —Narosati, noijajeitanaquempi. Ari nojajeitanaque. Notejeitapaaca pitotsiqui. Noquitsajeivetaca, irosati noquitaitetacotantacari. Tecatsi naye.

⁴Oquitaitetamanaji, irosati icatiantapaaja Jesoshi otsapijaqui. Te niojeitavajeriji.

⁵Icantajeitana: —Ayompari. ¿Chorampa shima? Nacajeitanaqueri: —Te aneeriji.

⁶Icantajeitana: —Pinquitsataje aisati pacosanoriqui, aitaque paye. Ari noquitsajeitanaji. Naajeitaque oshequi catsini shima, te naaveacoteriji nontetacoteri pitotsiqui.

⁷Naro iroamere inintasanotiri Jesoshi. Nocantiri Petero: —Ja, iriotaqueyeatsi Avincatsarite. Ari isapocaquero Shimo iitsaare incaranqui, irointi itorosate. Iquemantaquenari, irosati iquitsaatantanajaro iitsaare. Ishiticatsaquitanaja. Ipiincacotanaquero iitsaare, pocn; yamaatashitanajiri, yaatapaaji.

⁸Nimpoitacojeitapaaji narori, nonoshicacojeitiri shima. Quempejitapaaji otsapija, aamaaca ocarati 100 metero.

⁹Nomitajajeitanaque quipatsiqui. Noneapaaque oparasheti paamari, itashitiri shima. Otimi aisati tanta.

¹⁰Icantajeitavaquena Jesoshi: —Pamaquenari meeca shima piquitsataqueri.

¹¹Itetapaaja aisati Shimo Petero, inoshicacotajiri shima quipatsiqui. Jaasanotaca antearipee shima, icarati 153. Yoshequiasanovetaca catsini, iro cantaincha te ompesanaqueji noquitsatantariri.

¹²Icantajeitana Jesoshi: —Pimpocajeite meeca poajeitapeempa. Notsaroacaacari noncanterime: “¿Janicampimpa?” Maaroni niojeitaqueri Avincatsarite ini.

¹³Irosati iquempejijeitantaquenari Jesoshi. Yaaquero tanta, ipajeitaquena. Aisati shima, ipajeitaquena maaroni.

¹⁴Icamavetaca Jesoshi chapinqui, itinaanaja. Mavatanaque meeca inijaajana.

¹⁵Noajeitaca. Irosati isampitantajari Jesoshi: —Shimo, itomi Jonashi, ¿panaacojeitaquerimpa yocapee, pinintasanotana avinti? Yacanaqueri iriori: —Aviro, Novincatsarite, iotatsiri nonintimpi. Icanti: —Pimperi novishajaniquite iroyea.