Isaia 1:15-30

¹⁵Tó a ↄsɛ̀ musu a wabikɛ̀a, má a wɛ́ ga zuɛ, baa tó a wabikɛ̀a kↄ̃sↄ̃kↄ̃sↄ̃, má swã́sɛio. Gbɛ̃dɛ'au gↄ̃́kpa á ↄwa.

¹⁶À zu'o, í gↄ̃ gbãsĩsai, à yãvãi tó, má ye mà á e ń vãikɛao lↄo.

¹⁷À fɛlɛ zɛ ń maakɛao, íↄ tɛ yã́zɛdekɛai. À gbɛ̃́ pↄ́ wàlɛ gbãamↄnɛ́ↄ dazɛwa, í yãnakpa tonɛ pↄ́ gwana vĩoↄwa, í yã́gↄ̃gↄ̃ gyaa gbɛ̃andoↄnɛ.

¹⁸Ma Dii ma mɛ̀: À mↄ wà lɛdoũkɛ. Baa tó á duuna gↄ̃̀wá tɛ̃́ɛɛ lán wↄ̃ↄtɛ̃nawa, a gↄ̃wá púuu lán buawaɛ. Baa tó à gↄ̃̀wá tɛ̃́ɛɛ lán gàalulawa, a gↄ̃wá púuu lán sãkãwaɛ.

¹⁹Tó a wei mɛ́ a ma yãmà, áↄ á bùsuɛ bee blɛ maa bleɛ.

²⁰Tó a gi sↄ̃ mɛ́ a swã́gbãakɛ̀, wa á dɛdɛ ń fɛ̃ndaoɛ. Ma Dii ma lɛ́ mɛ́ ò.

²¹À gwa lá wɛ̃́lɛ pↄ́ náai vĩ yãa gↄ̃̀ káalua ũ sa. Maakɛa ń yã́zɛdeo di a guu yãaɛ, tiasa gbɛ̃dɛnaↄ mɛ́ kↄ̃̀ a guu.

²²N ã́nusu tã́nkpakɛ̀, n vɛ̃ɛ maa kɛ̀ íwa.

²³N dↄaanaↄ swã́gbãakɛ̀, aa nà kpã́iↄwa. Ampii aa ye gbagusaɛi, aaìↄ kpálɛkɛ gbai. Aali yãnakpa tonɛↄwao, aali lɛda gyaaↄzio.

²⁴A yã́i tò ma Dii Zĩgↄ̃de Isailiↄ Lua Gbãade ma mɛ̀: Kai ma ibɛɛↄ! Má tↄsiwáɛ, ma pↄ i weewá.

²⁵Má ↄdiɛwáɛ sa, mí á baasa lán mↄwa ń kasagbↄ̃o, mí á gbãsĩ wolowá píi.

²⁶Má tó àↄ dↄaanaↄ vĩ lán yãawa, á lɛdamadeↄ i gↄ̃ ń kua ziwa. Bee gbɛa wi mɛ á wɛ̃́lɛɛ yã́zɛde wɛ̃́lɛ ge náai wɛ̃́lɛ.

²⁷Má Siↄnadeↄ bↄ ĩadaama guu, an gbɛ̃́ pↄ́ nↄ̀sɛlìlɛↄ bↄ yã́zɛde yã́i.

²⁸Má tàaedeↄ ń duunkɛnaↄ wíwi píiɛ, gbɛ̃́ pↄ́ aa pãkpàmaziↄ midɛ.

²⁹Wí a á kṹ gbɛ̃́nɛli pↄ́ kàágu a sa'òmáↄ yã́i. Á gɛɛ a gↄ̃ kpá á wɛ́iɛ swalu sa'oa pↄ́ a zɛòↄ yã́ musu.

³⁰Á gↄ̃ lán gbɛ̃́nɛli pↄ́ a lá wòlowa, lán swalu pↄ́ a í làawa.