ESAII 1:15-30

¹⁵Di ɔ̃ nkɛ̀ di yòùtɛní di nɔu m bíɛ́kɛ̀ kɛ m bɑ́ɑ́ nní mbúútóomu kɛ̀ di m bɑ́ɑ́ nkɛ m bɑ́ɑ́, m bɑ́ nkémmú di nɔu siì mùɔ̀ti mɛnitiyĩ̀ĩ̀.

¹⁶Ɔ́únɛ̀ dimɑ́ɑ̀ kɛ́wenkɛ, yóunɛ̀ di dɔɔri mɛ̀ɛ̀ yɛi n yììkɛ̀ Yóunɛ̀ dɛ̀ɛ̀ í wenni mudɔɔ̀rìmù.

¹⁷Ketɛ́nɛ̀ mɛsɑ̀ɑ̀ mmudɔɔ̀rìmù, ndɔɔrinɛ̀ dɛ̀ɛ̀ sìɛ́, kɛ́nkommu bɛ̀ fɛ̃́ũnko bɛ̀, kɛ́mpĩ́ mmɛsɑ̀ɑ̀ nyiciribí, kɛ́nkommu bɛkúpobɛ̀.

¹⁸Kɛ̀ ti Yiɛ̀ nKuyie mbɛ́i nkɛ dɔ̀: Kɔtɛnɛ̀ní kɛ̀ ti yɑ̀ di kpɛti bɑ́ kɛ̀ di yɛi nwũɔ̃tɛ́ kɛ dò mmɛyĩ̀ĩ̀ di bo wenkɛ tɛwɑ̃̀tɛ̀ dòmmɛ̀ kɛ̀ mɛ̀ dɔ́ mɛ̀ ndò nfɛtònfɛ̀ di bo pɛikɛ tipedɑpɑ̃́ɑ̃́tì kɔ̃mɛ.

¹⁹Kɛ̀ di tɑ̃ɑ̃tɛ́ kɛ yíé n kpɛti, di yóó dimu dihɛì kpɛrɛ dɛ̀ɛ̀ tu dɛsɑ̀ɑ̀rɛ̀.

²⁰Kɛ̀ di mɛ nyetɛ kɛ kpénkùnnɛ di to, disiè diì yóó di kònnɛ̀. Mí ndi Yiɛ̀ nKuyie mmíì bɛ́i ndɛ kó dinùù.

²¹Kɛ̀ Kuyie mbɛ́i nkɛ dɔ̀: Sedisɑdɛmmu ɛì kɔbɛ! Yé dɛ̀ dòmmɛ̀ kɛ̀ di m bùtínnɛ́ kɛ tũ̀nnɛ yɛbɔkɛ̀? Díndi bɛ̀ɛ̀ kó mɛborimɛ do wenni, kɛ̀ di beéntì wenni, di mmɔ̀nnì kɛ̀ di nɛ́ nɑɑ́ mbɛnitikɔ̀ùbɛ̀.

²²Sedisɑdɛmmu kɔbɛ di do dò ntimɑ́tì pɛ́ítì nti, di mmɔ̀nnì kɛ nɑɑ́nnɛ̀ yɛkpɛ̀rɛ̀, di do dò mmɛnɑɑ̀ nkperímɛ̀ mmɛ di mmɔ̀nnì kɛ nɑɑ́ mmɛnɑcɛ́duo.

²³Di kó bɛkpɑ̀ɑ̀tìbɛ̀ í yié n kpɛti nɛ̀ bɛyóóbɛ̀ bɛ pókù kumɑ́ɑ̀ ndi, bɛmɔu bɛ̀ dɔ́ ticuuti nti, kɛ bɛti tiyeti bɛ̀ í pĩ́ nyiciribí kɛ̀ dɛ̀ wenni bɛ̀ ɔ̃ɔ̃ í nkèńtɛ́ okúpokù kpɛti.

²⁴Dɛɛ̀ kpɛ́í nte mí Mpɑkɛdɑɑ di Yiɛ̀ nKuyie n kpeńnìmu kɛ bɑkɛ́ Isidɑyɛɛribɛ kɛ̀ míì bɛ́i nkɛ tú: N yìtɛ́ kɛ còḿmúmu n dootitɔbɛ̀ kpɛ́í, n yóó pɛitɛmu n dootitɔbɛ̀.

²⁵Sedisɑdɛmmu kɔbɛ m bo di potɛ́ m bo di ɔ́únɛ̀ mutie bɛ̀ ɔunɛ̀ mù timɑ́tì kɛ̀ dí wenkɛ kɛ̀ mɛyɔ̃́ɔ̃̀ ndɛitɛ.

²⁶Bɛbeénsɑ̀ɑ̀bɛ̀ bo wɛ̃tɛ kɛ́buotɛ́ dihɛì bɛ̀ do dòmmɛ̀. Kɛ̀ itié nyɛmbɛ̀ɛ wɛ̃tɛ kɛ́ɑ̃nnɛ́ bɛ̀ do dòmmɛ̀ nɛ̀ dimɔ̀nnì, kɛ̀ bɛ̀ɛ wɛ̃tɛ kɛ́yú di kó dihɛì kɛ dɔ̀: Bɛ̀ɛ̀ dɔ̀ɔ̀ri Kuyie ndɔ́ dɛ̀ bɛ kó dihɛì, bɛ̀ɛ̀ dɔ̀ɔ̀ri dɛ̀ɛ̀ sìɛ́ bɛ ɛì.

²⁷Kɛ̀ Siyɔ̃ɔ̃ ɛì kɔbɛɛ tũnnɛ kucɛ kusɑ̀ɑ̀kù kɛ́cootɛ́, bɛ̀ɛ̀ bo Siyɔ̃ɔ̃ kɛ̀ bɛ̀ɛ ceetɛ kɛ́yié nKuyie nkpɛti kɛ́ndɔɔri dɛ̀ɛ̀ sìɛ́.

²⁸Dɛ mɔ̀nnì bɛ̀ɛ̀ nɛ́ yetɛ mí ndi Yiɛ̀ nKuyie n kpɛti nɛ̀ mɛyɛi ndɔɔ̀rìbɛ̀ bɛmɔu mí mbɛ Yiɛ̀ nKuyie m bo bɛ̀ potɛ́ kɛ́yɔurɛ yɔurɛ. Dɛ yó ntú bɛ̀ɛ̀ ǹ yetɛ bɛ kó kumɑ̀nku nku.

²⁹Ifɛi bo di pĩ́nnɛ̀ dɛtediɛrɛ̀ di do feu iwũɔ̃ dɛ̀, Ifɛi bo di pĩ́nnɛ̀ dɛpɑɑ nkó yɛtɔ̀rɛ̀ di kɔrì dɛ̀ kɛ bɑ́ɑ́ nkɛ̀ di pɑɑ mbo pɛitɛ́.

³⁰Kɛ̀ di nɑɑ́nnɛ̀ dɛtie ndɛ̀ɛ̀ fɑ̃ɑ̃̀tì yòtɛ kɛ́nɑɑ́nnɛ̀ dɛtie ndi buɔtí dɛ̀, kɛ̀ dɛ̀ dòńtɛ́ mɛniɛ.