Iosua 8:4-17

⁴I vakuku ria i ta maea, “Mu vano, mu kapiloho na pogi na tanga, mu dava a vabinga. Naha ni vano basi hateka. Ge para a matane mua.

⁵Pali iau turane huriki a nugumaheto ranga, mi gi laho tamoro dili na tanga. Na tahuna e huriki a bakovi o Ai ri gi pori valai ri gi vaubi, mi gi ha manga a hini si rata muga.

⁶Mi gi tamitala ria, ri gi valili ne mia ri gi marava basi vona a tanga. Muri bara ri ta maea, ‘Ri ha ne hita i manga a hini muga.’ Na tahuna mi tamitala ria ri gi marava basi,

⁷mu pe a hini mu kapiloho vona mu dili, mu bolea a tanga. E BAKOVI DAGI a Vure ne hita ge habia na limane mua a tanga iea.

⁸Na tahuna mu bolea pali a tanga, mu rungania na kanono ge manga a ngava e BAKOVI DAGI i vakuku. Ra ngava iea a ngava nau, mu ramai kamumua.”

⁹Lakea e Iosua i rudu ria ri vano, ri kapiloho na ngutumiri na tabeke na nirolona haro, na kurukuruna tanga e Ai e Betel, ri dava. Pali na rodo iea e Iosua i tababana na mada.

¹⁰Na hatelanga pokopoko e Iosua i hadongo i gale valai e huriki a nugumaheto ri vapopo. Ia turane huriki a matakari o Israel ri muga ne huriki a nugumaheto ri lakea mai e Ai.

¹¹E huriki a nugumaheto ri vano turane Iosua, ri lokovonga tabukoi na tanga ri rata a mada, na tabeke mule sike. A maloku i nagi mule ria na dilidala o Ai.

¹²E Iosua i rudu e huriki a nugumaheto ala 5,000 ri vano ri kapiloho na tabeke na nirolona haro na tanga, na kurukurune Betel e Ai.

¹³Ngane e huriki a nugumaheto ri dava. A tara dagi i rata a mada na tabeke mule sike na tanga. A tara na nugumaheto tara i rata a mada na tabeke na nirolona haro, ri gi burai e huriki a pile. E Iosua i vano i mahita na maloku vona a rodo iea.

¹⁴Na tahuna a hariki o Ai i matai e huriki a nugumaheto ne Iosua ri rata a mada tabukoi na tanga na tabeke mule sike, i papa hari turane huriki a nugumaheto vona, ri pagitala ri vaubi turane huriki a Israel o Araba. Pali a hariki o Ai i uka ma i lohoka vona a vabinga i bele na bitona.

¹⁵Lakea e Iosua turane huriki a tara vona ri tamilalu ni ha lakea na tabeke i ngeki.

¹⁶A hariki i matai e huriki a Israel ri ha, i gale tala lobo e huriki a bakovi na tanga ri gi valili ne huriki a Israel. Ri valili ne Iosua, ri marava basi na tanga.

¹⁷E huriki a nugumaheto ne Ai ne Betel ri vano lobo ri valili ne huriki a Israel. A dilidala na tanga i mataka mavonga, i uka viri ge tagaria.