Iosua 22:2-21

²i taki ria, i ta maea, “Mu rata lobo pali a maki e Moses a vora ne BAKOVI DAGI i vakuku mua vona mu gu rata. Mu ramai lobo a maka nitagu.

³Na parava lobo mu tuhori e huriki a turane mua. I uka tara parava mu gu ha taro ria. Mu ramai kamumu a maka nitane BAKOVI DAGI a Vure ne hita.

⁴Ngane, e BAKOVI DAGI a Vure ne hita i habi a nivalemu ne huriki a turane mua, i manga hosi i ta muholi ne ria. I mavonga mu hamule mai a tanga ne mua, na tabeke ne Iordan, hosi e Moses a vora ne BAKOVI DAGI i habi ne mua.

⁵Mu mata kamumu mu ramai a nivakuku, a vinara ne Moses a vora ne BAKOVI DAGI i habi ne mua. Mu ngarua e BAKOVI DAGI, a Vure ne mua. Mu ramai a naro lobo vona, mu longototo a vinara vona, mu pesi tora turana, mu rata a leho vona na hatene mua, na nitora lobo ne mua.”

⁶Lakea e Iosua i nanea e BAKOVI DAGI ge gamai ria, muri i rudu mule ria na tanga ne ria.

⁷E Moses i habi na kalavana kabu ne Manase a malala na tabeke ne Basan, pali e Iosua i habi tabu na kalavana kabu ne Manase, turana a kabu ranga ne Israel, a malala na tabeke na nirolona haro ne Iordan. Na tahuna e Iosua i rudu e huriki nga ri hamule na tanga ne ria na tabeke ne Iordan tara, i nana e BAKOVI DAGI ge rata kamumu ria.

⁸Lakea i ta maea, “Mu tahoka a maka bulmakau, a silva, a gol, a bras, a aen, a maka varakia mu radi ne huriki a pile. Mu hamule na tanga mua, mu habi ne huriki a viri mua.”

⁹Lakea e huriki a bakovi na kabu ne Reuben, ne Gad, a kalavana kabu ne Manase ri laho hamule mai a tanga ne ria. Ri pe mule e huriki a Israel ranga na tanga e Silo o Kenan, ri hamule lakea na tabeke ne Gilead, na malala ne ria. Ri bolea a malala iea, i manga a ngava e BAKOVI DAGI i taki e Moses vona.

¹⁰Re huriki nga, i uka ma ri pe mulea ma a malala e Kenan, ri vano ri bele na malala tabukoi na dahana naru e Iordan, ri vakapesia vonga a dede-kedo dagi tabukoi na naru.

¹¹I ranga Israel ri vano ri taki e huriki a turane ria, ri ta maea, “A kabu ne Reuben, ne Gad, a kalavana kabu ne Manase ri ratea a dede-kedo na dahana naru e Iordan, na tabeke ne hita.”

¹²Ri longoa a ngava iea, lakea ri vano ri vapopo na tanga e Silo, ri kisi puru a maki na vabinga, ri gi vaubi turana a kabu nga i tolu.

¹³E huriki a Israel ri rudua e Pinias e tune Eleasar a prister, i lakea na kabu ne Reuben e Gad, a kalavana a kabu ne Manase na tanga e Gilead.

¹⁴A matakari i ravulu ri vano turana. Ra matakari nga ne Israel, ri matakaria a kabu takutaku ne ria.

¹⁵Ri vano ri bele o Gilead ri taki maea e huriki a kabu ne Reuben, ne Gad, a kalavana kabu ne Manase,

¹⁶“E huriki a bakovi a ngatavine ne BAKOVI DAGI, ri nana maea, ‘I navai mu ngalahere na Vure ne hita a Israel? Mu longotaro pali a nitane BAKOVI DAGI, mu vakapesia a dede-kedo ne mua. Ngane i uka ma mu ramai tabu e BAKOVI DAGI.

¹⁷Hosi ri rata a naro hale na tanga e Peor, lakea e BAKOVI DAGI i rudu vilia a gilanga dagi i ratapile e huriki a tara vona. Si bole a nimadihi vona ra naro hale iea i valai i harena mona. Mu luhoi ra naro hale iea i uka ma i kara hita, lakea mu ngaru ni rata tabua tara?

¹⁸I navai ngane mu marikoi ni ramai e BAKOVI DAGI, mu ngalahere vona? “‘Mua bara mu longotaro a nitana ngane, kuduvi bara i tahate hita lobo a kabu ne Israel.

¹⁹Mu luhoi a malala ne mua i muto na matane BAKOVI DAGI, i kamumu mu pe a malala ne mua, mu valai mu bole ranga malala ne mia, ra malala ne BAKOVI DAGI i pesi vona a mailo vona. A dede ne BAKOVI DAGI, a Vure ne hita i tabuli pali. I navai mu longotaro a nitane BAKOVI DAGI, mu ha taro mia mu vakapesia a dede-kedo ne mua?

²⁰Naha ni longokaburungi a narone Akan, e tune Sera. E BAKOVI DAGI i ta kari vona a maka maki na tanga e Ieriko, pali e Akan i longotaro a nitana, i bole a maka maki, muri e huriki a Israel ri bole a maregoa na naro hale vona. A naro hale ne Akan, i uka ma i madoko vona kikeri. A naro hale vona i madoko ne huriki lobo ri bole a vuranga vona.’”

²¹Lakea a kabu ne Reuben, ne Gad, a kalavana kabu ne Manase ri koli e huriki a matakari na kabu ne Israel, ri ta maea,