Zozuwe 22:2-21

²é ɠɛ ti ma: «Wo naa kpein kɛɛʋɛ, nii Ɠɔoɠɔ GALAGI ná-botiɠɛ nui Moize ma levei veeni wo ya, wo ɠoloʋɛ nà-devei kpein bɛ.

³Wo la ɓeteʋeni wo-ɠɛɛleaiti ba siɛnɔpɛ su, eyɛsu zaaɠaza, wo devei naa zogɛ, wo ziɛ la, nii Ɠɔoɠɔ GALAGI wa-ƓALAGI feeni wo ya.

⁴Niizu, Ɠɔoɠɔ GALAGI wa-ƓALAGI dooɠo fea wo-ɠɛɛleaiti bɛ, eɠɛʋelei é boni la ti ma. À pele zona, wo li wa-zeɠe ɠotaiti bu, wa-yooi zu, nii Ɠɔoɠɔ GALAGI ná-botiɠɛ nui Moize feeni wo ya ga wɔnɔ, Zuludɛn ʋolu ʋelei.

⁵À dama, wo ziɛ ga devei, wo tɔgi zo, nii Ɠɔoɠɔ GALAGI ná-botiɠɛ nui Moize feeni wo ya. À Ɠɔoɠɔ GALAGI wa-ƓALAGI nɛɛ ʋɛ, wo ziɛ ga ná-peleiti kpein, wo ná-deveiti so, wo ziɛ la, wo ɠili tɔun ba, wo dɛbi ga wo-yiimaʋɛ pɛ, ta wo-yɛnvui pɛ.»

⁶Zozuwe tuya looni ti ʋɛ, é ti ʋilɛ, ti li ta-laaiti su.

⁷Moize zou veeni Manasee ná-bolodai ɠilazuʋɛ ya ga nɔnɔ, Ɓasan yooi zu. Zɔɔma lukpɛgi nɔnɔ ma yooi zɔlɔɔni Zuludɛn folo liizu ʋelei, ti zei ná ta ti-ɠɛɛleaiti. Siɛgi zu Zozuwe ti ʋilɛni da, ga ti li ta-zeɠe ɠotaiti bu, é tuya looni ti ʋɛ,

⁸é ɠɛ ti ma: «À ɠale ma, wo li wa-zeɠe ɠotaiti bu ga naavolo wolaiti, ta togani ɓulu golaiti, ta wali mɔinmɔin gola, ta zanugi, ta kɔlu ɓɔigi, ta kɔlui, ta seɠeiti. Wa wo-ɠɛɛleaiti, à kɔɔzoganii ɠaaɠwɛ ʋa, nii wo kulaai wo zili nuiti zea.»

⁹Luɓɛn ná-bolodai, ta Gade ná-bolodai, naa ʋɛɛ Manasee ná-bolodai ɠilazuʋɛ ʋa, naati ti zeɠeni Izelayɛle nuiti pɔ bɛ Silo, Kanaan yooi zu, ti ɠale ma Galaade yooi zu, zooi nii ti sɔlɔɔni ga tɔnɔ Moize ya, Ɠɔoɠɔ GALAGI ná-devei zu.

¹⁰Siɛgi zu ti zeelini la Zuludɛn laaʋɛ, ti ɠɛni dɛ Kanaan yooi zu ʋele, Luɓɛn ná-bolodai, ta Gade ná-bolodai, ta Manasee ná-bolodai ɠilazuʋɛ, ti zalaɠa ɠulazuʋɛ loni ziɛlaʋɛ, gola maayikini.

¹¹Izelayɛle nui zɔiti ti mɛnini ga Luɓɛn ná-bolodai, ta Gade ná-bolodai, ta Manasee ná-bolodai ɠilazuʋɛ, ti zalaɠa ɠulazuʋɛ logɛ Zuludɛn laaʋɛ, Kanaan yooi zu ʋele, Izelayɛle nui zɔiti koba ʋelei.

¹²Izelayɛle nui zɔiti ti mɛnigai ma, ti kpein ti ɠaalɛɛni ba Silo, ti ʋa li ga kɔɔi ti laalɔɠɔma.

¹³Ti zunuiti teʋeni Luɓɛn ná-bolodai ʋɔ bɛ, ta Gade ná-bolodai, ta Manasee ná-bolodai ɠilazuʋɛ, Galaade yooi zu. Nuiti ti ti leʋeni, ta ɠɛni ga Finease, zalaɠa ɠula nui Eleazaal ná-doun zunui,

¹⁴kundiɠi puugɔ ɓɔni ba, boloda ɠila kundiɠi ɠila. Ti pɛ ti ɠɛni ga kundiɠii ta-ʋɛlɛyeɠeiti bu, Izelayɛle wolodamaiti su.

¹⁵Ti liini Luɓɛn ná-bolodai ʋɔ bɛ, ta Gade ná-bolodai, ta Manasee ná-bolodai ɠilazuʋɛ, Galaade yooi zu, ti ɓɔɛni ti ʋɔ, ti ɠɛ ti ma:

¹⁶«Wɛlɛ nii ɠa Ɠɔoɠɔ GALAGI ná-nuɓusɛiti ti boga: Lee vaa zu wo wooʋaladai ɠɛɛzu, wo wuzeɠe Izelayɛle ná-GALAGI laalɔɠɔma? Lee vaa zu wo zeɠezu Ɠɔoɠɔ GALAGI ʋolu niizu? Mazɔlɔɔ wa zalaɠa ɠulazu lona ɓɔɠɔ ʋɛ za, wo la wuzeɠeni Ɠɔoɠɔ GALAGI laalɔɠɔma ɓaa?

¹⁷Ade faaɠaaza gola ɠɛɛni Peyɔɔl, de la dɛ ɓeni ga ɲade naa ma zaaɠaza, anɛɛ nii é kpɔlɔi laani de ma. Naa la kulani ɓaa?

¹⁸Wa ga ʋoluave za Ɠɔoɠɔ GALAGI ʋa! Ni wa wuzeɠena za Ɠɔoɠɔ GALAGI laalɔɠɔma, lina, zii ɠa ɠula Izelayɛle nuɓusɛi kpein ma.

¹⁹Zooi nii feai wo ya ga wɔnɔ, ni naa ɠɔzɔʋɛ wo ɠaazu, à ʋa naama yooi zu, nii é ga Ɠɔoɠɔ GALAGI nɔnɔi, ʋɛ é seizuʋɛ ɓɛtɛai ná, wo zei gi zaama. Kɛlɛ à mina wuzeɠe Ɠɔoɠɔ GALAGI laalɔɠɔma, à mina wuzeɠe gi laalɔɠɔma, wo ʋa ɓɔɠɔ zalaɠa ɠulazu lo, é ɠula Ɠɔoɠɔ GALAGI da-ƓALAGI nɔnɔi ʋolu.

²⁰Siɛgi zu Zeela ná-doun zunui Akan faaɠaaza golai ɠɛɛni la, é ʋilɛ aniiti ba, niiti Ɠɔoɠɔ GALAGI maaɲɛɛi ʋɛɛni ti ʋa, é ti zeɠeni, Izelayɛle nuɓusɛiti kpein ti Ɠɔoɠɔ GALAGI ná-ziiɠaawanai zɔlɔɔni, wo naa zuɠwɛɛ ga pagɔ. Tɔ ɠila ta ɠɛni de, undaa ʋa ʋili ná-faa ɲɔi vaa zu.»

²¹Luɓɛn ná-bolodai, ta Gade ná-bolodai, ta Manasee ná-bolodai ɠilazuʋɛ, naati ti Izelayɛle wolodai zɔiti ta-ɠundiɠiiti gooɠaaʋoteni, ti ɠɛ ti ma: