Ioanes 4:26-54

²⁶Iesu i biti tana: Iau go, iau tata tam, iau ia muka nam.

²⁷Ma kana tarai na vartovo dia pot tadav ia ta ra dari, ma dia kaian tago dir tata ma ra vavina; ma pa ta i tir ia ba: Ava u nuk upi ia? ba dari: Dave amur tata me?

²⁸Ma ra vavina i vana kan kana kulkulup, ma i vana ta ra pia na pal, ma i biti tai ra tarai:

²⁹Avat a mai, avat a gire tika na tutana, i tar ve iau ure ra lavur magit par iau ga pait ia papa amana; go nina ra Kristo tuna bar?

³⁰Dia vana oai kan ra pia na pal ma dia vanavana upi ia.

³¹Ba i ga dari, a tarai na vartovo dia lul ia, dia biti: Tena Vartovo, una ian.

³²Ma i biti ta diat: Agu magit ba ina en ia, pa ava ti nunure.

³³A tarai na vartovo dia tir vargiliane diat mulai: Ta tikai bar i ga kap ana ta magit?

³⁴Iesu i biti ta diat: Go agu magit ba ina pait ra nuknuk i nina i ga tulue iau uti, ma ina pait ot pa kana papalum.

³⁵Ava biti dari: A ivat na gai boko upi da dodoko. Go iau tatike ta vavat: Avat a idok, avat a gire ra umauma i pua tago i matuka upi da dodoko.

³⁶Nina i dodoko i kale pa ra vabongon, ma i varurue ra vuai na uma upi ra nilaun tukum; upi nam i vauma ma nam bula i dodoko, dir a gugu varurung.

³⁷Tago i dovot ra tinata dari: Tikai i vauma, ma ta ra tikai i dodoko.

³⁸Iau ga tulue avat, upi avat a doko nam ba pa ava ga palum ia; ta ra umana iat dia ga papalum, ma kavavat ika ra vuai kadia papalum.

³⁹Ma mangoro na te Samaria ta nam ra pia na pal, dia nurnur tana ure ra tinata kai ra vavina, i ga biti dari: I ga ve iau ure ra lavur magit par iau ga pait ia papa amana.

⁴⁰Ba ra tarai Samaria dia tadav ia, dia lul ia ba na ki pire diat; ma i ki ie a ura bung.

⁴¹Ma mangoro bula dia nurnur tago kana tinata;

⁴²ma dia biti tai ra vavina: Go ave nurnur, vakir ure ke kaum tinata, tago avet bula ave tar valongore, ma ave nunure ba go ia ra Tena Valaun tuna kai ra rakarakan a gunagunan par.

⁴³Ba i tar par ra ura bung, i vana kan abara urama Galilaia.

⁴⁴Tago Iesu iat i ga tatike, ba pa di ru ra propet ta kana gunan.

⁴⁵Ba i tar pot aro Galilaia, a tarai Galilaia dia agure pa ia, tago dia ga gire ra lavur magit par i ga pait ia arama Ierusalem ta ra lukara; tago diat bula dia ga vana ta ra lukara.

⁴⁶Ma i pot mulai aro Kana ta ra langun Galilaia, nam i ga pait pukue ra tava tana upi na vain. Ma natu i tika na luluai, a tutana, i mait arama Kapernaum.

⁴⁷Ba i valongore ba Iesu i tar vana kan Iudaia urama Galilaia, i vana tadav ia, ma i lul ia ba na vana ba, ma na valaun natuna; tago i to na mat.

⁴⁸Iesu i tatike tana: Gala pa ava gire ra umana vakilang ma ra umana dekdek, pa avat a nurnur muka.

⁴⁹A luluai i tatike tana: Luluai, una vana ur, ba natugu pa i ti mat boko.

⁵⁰Iesu i biti tana: Una vana; natum i tar laun. A tutana i nurnur ta ra tinata Iesu i tatike tana, ma i vana.

⁵¹Ba i vanavana ba, dia varkuvo ma kana umana tultul, ma dia ve ba natuna i tar laun.

⁵²Ma i tir diat upi ra pakana bung i tur pa ra nilagar tana. Ma dia biti tana: Nabung tai tika na pakana bung, ra oao i vana kan ia.

⁵³Ma tamana i nunure, ba nam muka ra pakana bung, ba Iesu i ga tatike tana: Natum i tar laun. Ma i nurnur, ma diat par ta ra kubana bula.

⁵⁴Go a vauruana vakilang Iesu i pait ia, ba i tar vana kan Iudaia urama Galilaia.