Iluk 11:35-47

³⁵Kasike yu kilelbi boliwka! Mesik esik yom mutuk dim alakabe ailbin be mesesem eisneng wa so kasi kolewbiliw kasike. Kolew keliw tewe, yu atin kuw mililiw mutuk atew kakabokoliw te.

³⁶Kasike, yom mutuk kayak e atin kuw aileko, mililiw atuk gel mak banim kebe tewe, ailbin fian be yongom dong atew yom kal so dem so alik alik be kilele ailoke te.”, yangse kale.

³⁷Yangei, Falisi kunum mak teleko, Yesus elo em am elo wanomin debele unse kale.

³⁸Unse ding dim bakate, Yesus e Suda kawtiw im kukuw gelewinba kesomi, teing o, yan o, ginginba keko, sak teineko, wanin wanse kale. Kanelei, Falisi kunum be ibolow fukunin tiaktiak keko, yol angese kale.

³⁹Angei, Kamok Fian e elo bokolewomele: “Falisi kunum yutaka! Yu kal tikin kais atite kebe ok sen emdiw kebiliw kate, yom mutuk kawyak e yu ninik so ibolow sili sili nam so gekbiliw kunum kebiliw te.

⁴⁰Ibolow teifuluko, biliw kawtiw yutaka! Sunbin-Got e yom kal tikin akal, yom mutuk tem akal, alew be makuw dukuse kasike.

⁴¹Yom ibolow mutuk tem be mali sukum biliw kawtiw ilo duyemeko, dokoyemiw tewe, yom kal dim so, ibolow mutuk beso, alew be makuw kais atite keboke te.

⁴²Kate, Falisi kunum yu kilelbiko, boliwka! Yu kimit so, bokow so, wiin banim wanin eisneng alik alik beem king kel anung makmak be kuluko, Sunbin-Got elo fein kilele dulewkabiliw bakate. Be ken kate, yu mali kunum waneng ilo ken kukuw kukuyeminba kesomi, Sunbin-Got elo ibolow mutuk fian dulewinba kekabiliw te. Yu Sunbin-Got elo king kel anung makmak dukalewbin kukuw be fein gelewboliwka! Kate, kawtiw ilo kukuw ken kukuyemin kukuw so, Sunbin-Got elo ibolow mutuk fian dukalewbin kukuw so, kukuw bakati kilele gelewemoliwka!

⁴³Falisi kunum yu kilelbiko, boliwka! Yom yukalem wensankabiliw am kawtem unbiliw ding dim kabalak e, yu wiin so tein kemin abin dim kuw teinkabiliw te. Teineko, kawtiw im wensanbiliw dim kalo uneko, kawtiw im yulo wiin fian duyemeko, ‘Biliw yako!’, yangbin kukuw beelo ibolow fian kuw kebiliw te.

⁴⁴Falisi kunum yu kilelbiko, boliwka! Yu kasi kolewsiliw fomkamin emdiw te. Kawtiw i akokow keko, yom tikin dim kel mokabiliw kasike, yom kanebiliw beem sen e, ikati Sunbin-Got em kiin dim e sen so kekabiliw te.”, yangse kale.

⁴⁵Yangei, Sunbin-Got em kukuyemin sawa weng beem kak kunum mak Yesus elo bokolewomele: “Kukuyemin kunum kutaka! Falisi biilo yangbelew weng beso nukati desi keyembelew te!”, dangse kale.

⁴⁶Dangei, Yesus e bokolomele: “Sunbin-Got em kukuyemin sawa weng em kak kunum yukati kilelbiko, boliwka! Yu kawtiw ilo Sunbin-Got em kukuyemin sawa weng kale kukuyemeko, ‘Yu kilele gelewina!’, yangeko, ilo kal ilum banban duyemkabiliw kate, yukalem e fong gel makmak net keko, aluwinba kekabiliw te.

⁴⁷Yu kilelbiko, boliwka! Yu yukalem kawalik kaliwol kumel im Sunbin-Got em bontem dim bakamin kunum ilo yemaliw kukuw beelo atemeko, kalfongyemkabiliw te. Nimtew angom? Yu kawtiw alik alik im kiin dim e iso fangfangdabiliw kasike. Isik mali kunum biilo yeneiwi, i kuansiliw kate, yukalem ete yensiliw kunum biim fomkamin be kilele deng dakameliw kasike!