Luk 11:35-47

³⁵“Mewö aiga mötnöŋ, söŋaupnöŋ urugahö asakŋi közamböri söŋaubapuköra mönö tihitki möta galöm mem aŋguman.

³⁶Mewö aknöŋga Anutugö asakŋan urugi körek dop köli waŋgömŋi kun qahö söŋauza ewö, göhö silegan mönö mewöyök asoŋ-kilik-kilikŋambuk aka jemesoholgan asariza. Kiwa ketaŋan silege kuŋguba kölköl-bilikbilikŋambuk mem asarim gihizawi, malmalgi mönö miaŋgö dop Anutugö asakŋe al teköba malman.” Mewö.

³⁷Jisösnöŋ keu mi jim teköi Farisi (Köna keugö kapaŋkölköl) azi kunöŋ kewö jiba köl öröm waŋgiyök, “Gi ölöp nöŋgö mire öŋgöba tata nene nembin.” Mewö jiiga anda öŋgöba nene nemamgö tarök.

³⁸Mutuk böröŋi qahö saŋgoŋda eta tarökmö, Farisi azinöŋ silik mi eka welipköyök.

³⁹Welipköiga Kembunöŋ kewö jii mörök, “O Farisi iŋini mönö ölŋa amöt qem aŋgubingöra qambi aka al nenegö sileŋi saŋgoŋ yakömakzemö, nanŋini uruŋinan mönö tölohoza. Mi dogo jimamoŋ aka qewöloŋ miaŋön kokolak qei malje.

⁴⁰“O iŋini, uruŋini qahö. Kunöŋ sileŋi pakpak miwikŋaiyöhi, yaŋön mönö uruŋi mewöyök miwikŋaiyök me qahö? Iŋini mönö wuanöŋgöra uru likepŋaŋgöra taŋqaŋ akze? Mi qahö dop kölja.

⁴¹Miaŋgöra yuai kiwi al nenenöŋ tatzawi, mi mönö kalema ambazip wanapŋi eŋgime. Mewö aketka Anutunöŋ amöt qem eŋgii eŋgöreŋ yuai pakpak mönö sarakŋi ahöma.” Mewö.

⁴²“O Farisi ambazip, lömböt qakŋine öŋgözawaŋgöra mönö wölziköba ‘Yei!’ jizal. Iŋini nene pakpak mendeŋda bahöŋi 10 miaŋgöreŋök mohot Anutugö buŋaya qemakze. Gipŋi, supe aka yöha könaŋi könaŋi mi mewöyök meŋdeŋda tenöhök mohot mi Anutugö buŋa qemakze. Naluk mi törörök alakzemö, Köna keugö kötŋi bohonŋi ki mönö oŋgita mosörakze: Gi Anutu uru könömgan jöpaköm waŋgiman aka ambazip sutŋine ahakmeme diŋdiŋi wuataŋgöba malman. Keu bohonŋi mi mönö kapaŋ köla wuataŋgöba malme aka keu morömorö mi mewöyök kude oŋgita mosötme.

⁴³“O Farisi, lömböt qakŋine öŋgözawaŋgöra mönö wölziköba ‘Yei!’ jizal. Iŋini köuluk mire dum tatat mutukŋe jegep tatpingö sihimŋi mörakze. Maketnöŋ me könanöŋ ambazip eŋgeketka jölöŋini jimegö mörakze.

⁴⁴O iŋini, lömböt qakŋine öŋgözawaŋgöra wölziköba ‘Yei!’ jizal. Iŋini qaksiri qetŋini qahö miaŋgö dop akze. Ambazipnöŋ qamöt wörönŋambuk denike ahözawi, mi qahö möta qakŋine laŋlaŋ tiba yuai dönqizinŋambuk oseiba tölohomakze.” Mewö.

⁴⁵Jisösnöŋ keu mewö jiiga Köna keugö böhi yeŋgöreŋök kunŋan möta meleŋda kewö jiyök, “Böhi, gi keu mewö jiba nini mewöyök gamu qem neŋgizan.”

⁴⁶Mewö jiyökmö, Jisösnöŋ keu kewö jiyök, “O Köna keugö böhi, eŋgö qakŋine mewöyök lömböt öŋgözawaŋgöra wölziköba ‘Yei!’ jizal. Iŋini keuŋi keuŋi jim kutuba miaŋgö könjöŋ lömbötŋi ambazip qakŋine alagun algetka mi tem kölbingö lömböriiga jaraŋbaraŋ ahakzemö, nanŋinak i kesötŋinan borom kun bauköm eŋgibingö wösömötmötŋini kun qahö ahöza.

⁴⁷“O iŋini, lömböt qakŋine öŋgözawaŋgöra mönö wölziköba ‘Yei!’ jizal. Iŋini kezapqetok ambazip yeŋgö qaksirinöŋ simen koum memba meŋölömakzemö, nanŋini ambösakonŋinan mönö i eŋguget kömuget.