Iliga꞉felo꞉ 7:16-35

¹⁶Tif amio꞉ ini ki a꞉no꞉ a꞉ma꞉la꞉ dia꞉ya꞉sa꞉ga꞉, Sekem hen a꞉namio꞉, Hamol insisa꞉ma꞉ heno꞉ A꞉bla꞉hama꞉ tamina moleya꞉ kilili ko꞉lo꞉ ini kiyo꞉ a꞉na daido꞉.

¹⁷“Godeya꞉yo꞉ A꞉bla꞉hambo꞉lo꞉ dinali sio꞉ ho꞉leno꞉ ko꞉na꞉ma fa꞉la꞉dowabiki, Isib a꞉namio꞉ Isolael kaluwo꞉ mada modo꞉ ko꞉lo꞉ fa꞉la꞉dowo꞉.

¹⁸A꞉la꞉ta꞉ga꞉ Isib amio꞉ misa꞉ kalu ho꞉gi fa꞉la꞉dowakiyo꞉, eyo꞉ Yosa꞉bo꞉ mo꞉fanda asulo꞉ ko꞉lo꞉ eyo꞉ ni ma꞉mu imo꞉wo꞉ dikida꞉sa꞉ga꞉ hida꞉yo꞉wo꞉ alan dimi. A꞉la꞉gabiki, eyo꞉ inin so꞉wa ho꞉gi sa꞉la꞉la꞉iyo꞉ ka soma꞉ki, ha꞉la꞉ya sandifelema꞉no꞉ a꞉la꞉saefa꞉.

²⁰“Ho꞉len a꞉namio꞉, Moseso꞉ a꞉na sa꞉la꞉li. E mada gesego꞉ ko꞉lo꞉ ele otalen dowabiki, iyaya꞉ aya siliki bo꞉fo꞉len.

²¹A꞉la꞉ta꞉ga꞉ e ha꞉la꞉ya ta꞉fo꞉lena, Isib misa꞉ kaluwa꞉ ida꞉ya꞉ ta꞉ulia꞉ga꞉, ene so꞉wayo꞉ aumta꞉ga꞉ fofo꞉.

²²A꞉la꞉fo꞉ko꞉lo꞉ Isib kalu ili mano꞉ Moses emo꞉wo꞉ tambo walali ko꞉lo꞉ Moses e to sa꞉lan o꞉lia꞉ man dimidan o꞉lia꞉yo꞉ halaido꞉ di kalu ko꞉lo꞉ kagayo꞉.

²³“Moses e donayo꞉ do꞉la꞉fo꞉ fa꞉la꞉da꞉in ta꞉ga꞉ga꞉ dowabiki, Isolael kaluka꞉isale, ene ao i a꞉no꞉ ba꞉ba꞉ ha꞉na꞉no꞉ asulo꞉.

²⁴E a꞉na elen amio꞉, Isib kaluwa꞉yo꞉ Isolael kaluwo꞉ mogagi dikidi sa꞉ndabiki ba꞉ba꞉ ko꞉lo꞉ eyo꞉ asuwa꞉takiyo꞉, Isib kalu a꞉no꞉ wediakiyo꞉, e sanaifa꞉.

²⁵Moses eyo꞉ wediabikiyo꞉, ene ao i a꞉ma꞉ asulakiyo꞉ e Godelo꞉ asuwa꞉foma꞉ki iliga꞉fo꞉lo꞉ kalu a꞉la꞉bo꞉ asuluma꞉ki dimido꞉ ko꞉sega iliyo꞉ a꞉la꞉gabolo꞉b a꞉la꞉do꞉ mo꞉asulo꞉.

²⁶Ho꞉len no amio꞉, Moses e Isolael kalu a꞉la꞉ nowo꞉ buba꞉lena ba꞉ba꞉. E ba꞉da꞉ga꞉, a꞉la꞉yo꞉ ha꞉fo꞉ disa꞉ma꞉ki sagale alitakiyo꞉, towo꞉ a꞉la꞉sio꞉, ‘Gao gaino꞉, waga bubadi?’

²⁷Ko꞉sega kalu nolo꞉ sa꞉nda꞉likilo꞉ ha꞉nab a꞉ma꞉yo꞉, Moses e kanilaki, Mosesbo꞉wo꞉ a꞉la꞉sio꞉, ‘Nio gi bo꞉fo꞉liki mo꞉walila꞉lubika꞉ a꞉la꞉bo꞉, abe saefa꞉yo꞉?

²⁸Alilo꞉ Isib kalu nowo꞉ gilo꞉ so꞉no꞉ aumbo꞉, o꞉go꞉lo꞉ nelo꞉ gi sanaifa꞉nigaya?’

²⁹To sa꞉lab a꞉no꞉ da꞉da꞉sa꞉ga꞉, Moses e nai ha꞉na꞉ga꞉, Isib heno꞉ ta꞉ta꞉ga꞉, Midian hen a꞉na ha꞉na꞉sa꞉ga꞉yo꞉, e mio꞉ kalu silikiyo꞉, so꞉wayo꞉ a꞉la꞉ sa꞉la꞉li.

³⁰“Moses e donayo꞉ do꞉la꞉fo꞉ fa꞉la꞉da꞉ino꞉ gulula꞉sa꞉ga꞉ ilikiyo꞉, e kalalili hen, Sainai misio꞉ anib doba꞉da꞉ sia꞉lena, i abol ko꞉lo꞉ nudula꞉ a꞉nami, delo꞉ wa꞉sowala꞉lab us a꞉na ma꞉mul kaluwo꞉ a꞉na elena, Moses e ba꞉ba꞉.

³¹Moses eyo꞉ ba꞉da꞉ga꞉yo꞉, e moda꞉sa꞉ga꞉, e ma꞉uwa꞉ya ba꞉ba꞉ni ha꞉nabiki, Gode Alan e towo꞉ a꞉na dabu.

³²Godeya꞉yo꞉ Moses emo꞉wo꞉ a꞉la꞉sio꞉, ‘Ne gi ma꞉mu A꞉bla꞉hamo꞉, Aisego꞉, Yekobo꞉ i a꞉ma꞉ Godeyo꞉ Ne.’ A꞉la꞉sa꞉labiki, Moses e tagilaki bibi sado꞉geta꞉ga꞉, e mo꞉sikudu ba꞉ba꞉.

³³“A꞉la꞉ta꞉ga꞉ Godeya꞉yo꞉ emo꞉wo꞉ a꞉la꞉sio꞉, ‘Hen gelo꞉ kagafo꞉lab we mada malilo꞉ hen ko꞉lo꞉ gi gido꞉fo꞉ amilo꞉ budi sa꞉ga꞉lo꞉ko꞉, dugulema!

³⁴Kaluka꞉isale nilo꞉ ko꞉lo꞉ Isib hen ami silikilo꞉ hida꞉yo꞉ ililo꞉ diab a꞉no꞉ Ne ba꞉ba꞉. Ne ililo꞉ ya꞉la꞉lab a꞉no꞉ da꞉da꞉sa꞉ga꞉, Ne iyo꞉ ko꞉lo꞉ sili alifa꞉ni mio꞉. A꞉la꞉fo꞉ko꞉lo꞉ ge mena. Niyo꞉ ge a꞉ma꞉la꞉ Isib iliga꞉fa꞉nigo꞉l.’ Godeya꞉ a꞉la꞉sio꞉.”

³⁵A꞉la꞉fo꞉ko꞉lo꞉ Sitifen eyo꞉ to nolo꞉ a꞉kudu sio꞉, “Moses ko꞉lo꞉ o꞉gdo꞉ Godelo꞉ Isibdo꞉ iliga꞉fa꞉nigab a꞉no꞉, tamin amilo꞉ Isolael kaluka꞉isaleya꞉lo꞉ e gola ba꞉dakiyo꞉, emo꞉wo꞉ a꞉la꞉sio꞉, ‘Nio꞉ gi bo꞉fo꞉liki mo꞉walila꞉bika꞉ a꞉la꞉bo꞉, abe saefa꞉yo꞉?’ a꞉la꞉do꞉ sa꞉labikilo꞉ aneyo꞉ o꞉m. A꞉la꞉fo꞉ko꞉lo꞉ Godeya꞉yo꞉ ma꞉mul kalu ilo꞉wa a꞉la꞉ta꞉ga꞉ Mosesdo꞉ amilo꞉ fa꞉la꞉dowo꞉ a꞉ma꞉liki, Moses eyo꞉ Isolael kaluka꞉isaleyo꞉ sili dofo꞉liki bo꞉fo꞉melea꞉ki, iliga꞉fo꞉.