Iliga꞉felo꞉ 19:32-37

³²Kaluka꞉isale kegeo꞉ a꞉ma꞉yo꞉, noma꞉yo꞉ to ko꞉li halale sa꞉la꞉b amio꞉, noma꞉yo꞉lo꞉ to ko꞉li ka sa꞉la꞉li a꞉lakiyo꞉, tambo no꞉nolo꞉ dowo꞉. A꞉la꞉fo꞉ko꞉lo꞉ iyo꞉ mo꞉wo꞉ wena iliki kegeo꞉ a꞉la꞉bo꞉, kalu modo꞉wo꞉ mo꞉asulo꞉.

³³A꞉la꞉gabikiyo꞉, Yu kaluwa꞉yo꞉ Alisanda, e susululia꞉ga꞉ tamina ta꞉takiyo꞉, to elo꞉ sa꞉ma꞉no꞉wo꞉ emo꞉wo꞉ a꞉na wala sio꞉. Alisanda eyo꞉ towo꞉ dinafa fanda sa꞉ma꞉no꞉ a꞉la꞉liki, kaluka꞉isale towo꞉ hela꞉fo꞉ma꞉kiyo꞉, dagiyo꞉ da꞉feyo꞉.

³⁴Ko꞉sega kalu kegeo꞉ i a꞉ma꞉yo꞉, e Yu kalulo꞉b a꞉la꞉bo꞉ ele ba꞉da꞉sa꞉ga꞉yo꞉, ofa꞉si a꞉la꞉ a꞉namio꞉, towo꞉ halale sa꞉la꞉likiyo꞉, “Efesa꞉s kaluka꞉isaleya꞉ gode alandeyo꞉ Atemis eka꞉” a꞉la꞉sa꞉la꞉liki, mo꞉bulufo꞉.

³⁵A꞉la꞉ga꞉i ha꞉na꞉la꞉ga꞉yo꞉, kiaba꞉ ene nanogdo꞉ diakilo꞉ mo꞉fo꞉sdo꞉ sa꞉sa꞉lan kalu a꞉ma꞉yo꞉, kalu kegeo꞉ tolo꞉ sa꞉la꞉len a꞉no꞉ hela꞉foma a꞉la꞉ta꞉ga꞉yo꞉, imo꞉wo꞉ a꞉la꞉sio꞉, “Efesa꞉s kalu gio꞉ dabuma. Nili gode alan Atemisa꞉ misido꞉ u momado꞉ a꞉no꞉, akina a꞉la꞉ta꞉ga꞉lo꞉ sulufo꞉ tia꞉ a꞉no꞉lia꞉, ene gulugululan a a꞉no꞉lia꞉yo꞉ Efesa꞉s nili bo꞉fo꞉lo꞉l ko꞉lo꞉ henfelo꞉ kaluka꞉isaleyo꞉ tambowa꞉yo꞉ nili bo꞉fo꞉lab a꞉la꞉ asulufo꞉lab.

³⁶To so꞉lo꞉l we hendele a꞉lab ko꞉lo꞉, kalu imilig noma꞉yo꞉ o꞉ngo꞉ma a꞉la꞉bo꞉ mo꞉sa꞉ma꞉ib. A꞉la꞉fo꞉ko꞉lo꞉ giliyo꞉ ha꞉sa dowaki, hala nowo꞉ dimida꞉so꞉bo.

³⁷Kalu a꞉la꞉ wema꞉yo꞉ gulugululan ayamilo꞉ kelego꞉ nowo꞉ mo꞉afale di a꞉la꞉ta꞉ga꞉, nili gode mo꞉dio꞉ge sio꞉. Ko꞉sega giliyo꞉ a꞉la꞉ we madali tililia꞉ mio꞉.