Ihi 51:4-14

⁴Mpo, te qora kaiqa vira autiha ai uvaqaima raqa kaunarave. Te qora kaiqa vira autiha ariqai qoraiqama amitaunarave. Are vi kaiqarara nai qora kaiqave ti variana kaiqara, te vi kaiqara autu kaunara kaara are avuqavuqama kera tiqaa uva vataanarave.

⁵Mpo, ti vatatai entaraqaahai te ai no raqaqi vi vaunarave. Ti nova vainti taiqa vimanta te auhaqi vauna entaraqaahai ai no raqaqi vi vaunarave.

⁶Quqaama, vaiintivano nai muntukaqihairo quqaa uva ti vai okarara, virara ai antuqavano vairave. Nena koqe avu aatoqohaira ti avu aato kahaqiraro ho variarire.

⁷Mpo, are ti uva nunka timitairaqe te anomake hiqamavi variare. Are ti hiqama timitairaro ti avu aato muntukavano kia konkira ariraitiro, anoma kero uromura voqaara hantaiqama vuarire.

⁸Mpo, are ti qaqi kairaqe te qaiqaa quaheha variare. Tinta qora kaiqa kaara are ti ruqutuararo ti muntukavano voqama kero qoraiqimanta vauro. Mpo, qaqi kairaro ti muntukavano qaiqaa koqema viraqe te quaheha variare.

⁹Are nena viri tuqantaakera, kia te qora kaiqa varaunara tavaane. Te ekaa ai uva, vo uva vo uva raqakaunara nunka timitaane.

¹⁰Mpo Kotio, qaraaka muntuka, takuqiro vainara ti autu timitaane. Ti maraqura qaraakaiqama timitairaqe te ariaraqai noraiqaake iriqi vuare.

¹¹Mpo, kia nena aaqantohaira ti tititama kaane. Kia nena Maraqura takuqi vaira tiqihaira qaqini vara kaane.

¹²Haaru are ti ruaruama timitaaramanta te quaheha vaunarave. Ho are ti qaqi kairaqe te haaru vaunantemake, vatevata qaiqaa quaheha variare. Are ti kahaqiraro ti maraquravano ai uva iriqi vuataa iraqe iriqi vuare.

¹³Are mintiraqe te ai uva raqake variaka kahaqiha, ai koqe okara, vo okara vo okara numiqaqi vuari vika tuqantaavi orurante ai aaraqaa aniate.

¹⁴Are ti ruaruama timite variaravara tira, te vaiinti arukauna uvava tiqaa vaira qaqini vara kaane. Are mintiraqe te ai avuqavu okarara iriha tenta noqihai ihi tivaqi vuare.