1Kaiqenavu Nora Kotira autu tuahera kaare. Koqemama tenavu ihi tivakeha tentanavu Variqa autu tuahere vauro. Tenavu vira autu tuahera kaaina okarava koqe okara vaimanta tenavu quaheha vi okarara avataqi virera.
2Noravano Kotiva Ieruharemi vatuka qaiqaa auti vaivo. Haaru navutaaka Isareri rumpa vare vo vataini vuru kaaka, viva vate maa entara vika vo vata vo vataihairo ruvaaquma kero ntita varero nái maaqaini qaiqaa viri ke vaivo.
3Vika muntukavano voqama kero qoraiqimanta variaka, viva vika koqema nimiteharo, vika vaata teqa taaqama kaara rumpa nimite vaivo.
4Viva opu makau autiharo mintima tiro: Minti mintimavano naaruvaini vaivarave tivakero, vika vohaiqa vohaiqa vo autu vo autu ntava nimitaira.
5Tinavu Noravano nora autu vataava vaiharo viva ekaa kempuka vataavama vairo. Vira avu aatovano ekaa okarara kankoma kero iri vairara tiro, tinavu avu aatovano kia ho vira rairakero avatamakero tavaanaro.
6Noravano Kotiva nái vara vatainiqamake variaka kempukaiqama nimiteharo, qora okara auti variaka konkoma kanta ruqutu aquke vaira.
7Ne Nora Kotirara ihi tivaqi viha virara koqeve tiate. Ne tinavu Variqa quahama amiteha kitaa ruqutuate.
8Viva tonavu vara kero viraqohairo naaruva mantaaqa amite vaira. Viva aaqu vara kaivaro aaquvano ntiharo vata maata putamake vaivaro vo aiqina vo aiqinaqaahairo koqe ukauvano qampiqe vaira.
9Viva ekaa aantauvahi kara nimiharo, kotikoti naativata karara naaruavaro vikavata kara nimi vaira.
10Noravano Kotiva nana haikarae voqama kero quahe vairave? Kempuka ohiarave, kempuka iqoka vaiintiarave, vikarae viva quahe vairave? Aqao, kiave.
11Vira uva raqa kaarorave ti, vira aatu qeteha ni varia vaiinti nahentika, vikarama viva voqama kero quahe vaira. Vi vaiinti nahentika tiha, Vira muntukavano tinavuara enena vaira virara tenavu noraiqaake iriqi virerave, ti variara.
12Ne Ieruharemiqi variaka, Nora Kotira autu noraiqama kaate. Eo, ne Saioniqi variaka, nenta Variqa autu tuahera kaate.
Ihi 147
Ihi 147:1-12