HECHOS 7:35-52

³⁵’Dzigo laa Dios pxeeḻ Moisés ziesilaa me zha Israel; niicle ne glo rëb zho lo me: “¿Cho bzo luu guiaadnabey luu no, guiaadlisquigaa luu dieṉ pe nodziuuṉ no?” Per me bzo Dios bnabey lo zho, blee me zho Egipt.

³⁶’Nzian grë milagr, nzian grë ncuaaṉe nroob ne gzee zdoo ne beeṉ Moisés blee me zho ga; zigtaa leṉ guiedz Egiptow, zigtaa lo Nisdoo Nizhniew, zigtagaa grë dan bidz ne bio zho dipse leṉ choo iz ne bzënie me zho ga.

³⁷’Moisés ga bzeet lo pxozgol ne, ne laa Dios gnabey lo xtiique zho grieequia tib meṉ ne cxeeḻ me guiadteed xtiidz me, zigne pxeeḻ me Moisés.

³⁸’Zeeṉe nonie Moisés zho grë dan bidz co, Anjl ne bnee lo me guic gui Sinaí, me pteed xtiidz Anjl co lo zho; me pcaania ley ne biaaṉ lo ne ga, diidz ne rap guieḻmban.

³⁹Per ib bind zho xtiidz me, leḻ gocladz zho mbiire ney zho Egipt stib,

⁴⁰bnabey zho Aarón rëb zho: “Bzaa tib mdio tedner lo no gacnieṉ no laa no guioo Egipt stib; sac loxaque biadbee Moisés no ga, na choot naṉd dieṉ yo Moisés.”

⁴¹’Dzigo bzaa zho tib ngon yeeṉ goc zhimdio zho, haxta beet zho grë ma ne bloogon zho lo mdio co; bleynie zho ncuaaṉe bzaania zho.

⁴²Nacne wbiṉladz Dios, psaan me zho; psilo zho bleynie zho grë ncuaaṉe raṉ zho zhan gbaa. Beeṉ zho zigne bzeetse zha ne biadteed xtiidz me padzeela, zeeṉe rëb zho: Goḻsoladz gaṉle, laa ne nleynie to naa dipse leṉ choo iz ne bio to grë dan bidz co, laa ne niut ma ne ngogon to lo naa,

⁴³leḻ grë mdio ne bzaa to, mdio co bleynie to, lo mdio co pquiitsgzhib to. Mdio ne rnee to Moloc, zaatne zieetaa to tibaque ney to lidza, zhmel mdio ne rnee to Renfán, pa csaan to ma. Miṉcocxe waa, laa naa cuee to ladz to, gzonëz naa to guey to grë dan ne riaaṉ zitraa lo guiedz Babiloin.

⁴⁴’Leṉ dze ne sca bio pxozgol ne grë dan bidz co, tib yu larse goc xyadoo zho, ga biotsow quie ne quia xley Dios. Dioszhal blu lo Moisés zha tsaa yu co.

⁴⁵Goc bla iza, zeeṉe blozh bnitlo Dios grë guiedz ne briṉ nu glo, laa Josué blansonieque yu co. Haxta leṉ dze ne goc David rey, bii lëëw nac xyadoo zho.

⁴⁶’David goc tib rey ne gocnziuu lo Dios, bleynie Dios me, dzigo gocladz me nzaa me tib yadoo nroob zaatne mbëzlo zho Dios.

⁴⁷Per brieelod nzaa mew, Salomónraa goc rey ne bzaaw.

⁴⁸Nli laa yadoo co biaa, per teḻ Dios, meṉ nroob nac me, led yed me cuëz leṉ grë yu ne rzaa miech.

⁴⁹Zigne zhobneeque lo Xtiidz me, zeeṉe znu rëb me: Gbaa nac zaatne zoob naa, laa lo guidzliu nac zaatne rzo ni naa. ¿Zha nadieṉ nac yu ne naṉ to gzaa to cuëz naa? ¿Pa nadieṉ guiab to gzaa to zaatne gdziiladz naa?

⁵⁰¿Niacxe led naad bzaa gbaa?, ¿niacxe led naad bzaa guidzliu?

⁵¹’Goḻgona sca gaṉle ―rëb Xteb―, zigne beeṉaque grë pxozgol to ga padzeela, scadaaque goṉ quiayuṉ to niina. Miech nad, miech ntseeb zdoo nac to; ib ronde to miṉe rnee Espíritu Sant.

⁵²Teḻ pxozgol to, nëḻte goṉdze zho grë zha ne pxeeḻ Dios biadnee xtiidz me; haxta beet zho grë zha ne bzeet ne laa Dios cxeeḻ tib meṉ peet xtoḻd ne bzooblo me guiaad lo guidzliu. Ni niina ne laa Dios pxeeḻ meṉ co, scasaque beeṉ to, ptsidiḻ to me, bnabey to bgaa me beet to me.