Hechos 4:6-35

⁶len Anás ben' naquech bx̱oz blao, na' len Caifás, na' Juan, na' Alejandro na' nochle beṉe' zjanaque' biše' ḻjež ben' naquech bx̱oz blaon'.

⁷Na' gosone' mandadw jasexi'e Pedroa' na' Juanṉa' na' cate' ba zjazie' laogaquen' goseṉabde' ḻegaque': ―¿No beṉ ḻsens c̱hele cont beyonḻe beṉe' nxiṉjen'? o ¿no yeḻa' guac c̱he bc̱hinḻe beyonḻene'?

⁸Na' Spiritw che Diosen' dan' yo'o ḻo' yic̱hjlaždao' Pedroa' benen cont gože' beṉe' ca': ―Le'e beṉe' gwnabia' na' beṉe' gole beṉe' blao c̱he nación Israel c̱hechon',

⁹chṉable nac bento' da' güen beyonto' bena' nxiṉj ṉi'ena'.

¹⁰Le'e na' yogo' beṉe' gualaž cheyaḻa' ṉezele Jesucriston' ben' naque' beṉe' Nazaret bene' yeḻa' guac c̱he' cont beyacšagüe' benga. Le'e betwle Jesucriston' bda'lne' to ḻe'e yag cruz, perw Diosen' bec̱his bosbane'ne' ladjo beṉe' guat ca'.

¹¹Bi gwyejḻe'le c̱he Jesucriston', da'nan' zaca'leble ca beṉe' cheson yo'o beṉe' bi chesazlaže' yej güen da' ba naquen yej squin c̱he yo'ona'.

¹²Toze Jesucriston' guac goṉe' chio' yeḻa' mban toḻi tocaṉe, na' noch no zoa doxen ḻo yežlion' beṉe' gac goṉe' yeḻa' mban toḻi tocaṉe c̱he chio' beṉac̱h.

¹³Besyebane beṉe' gwnabian' can' boži'i Pedroa' na' Juanṉa' xtiža'gaquen' sin cbi besežebe', ḻe nacbia' zjanaque' beṉe' yix̱e' na' bi zjansedteque'. Nach gosacbe'ede' ḻegaquen' ba gosedalene' Jesúsen'.

¹⁴Na' dan' zecha ben' beyaque ṉi'ena' txen len Pedroa' na' Juanṉa', bi besyežele beṉe' gwnabian' bi yeseṉe' c̱hegaque'.

¹⁵Nach beṉe' gwnabian' besyebeje' postlw ca' chyo'ole šlac bosoxi'e ḻegacze' nacle yesone'.

¹⁶Na' beṉe' gwnabian' gose' ḻježgaque': ―¿Bi goncho len beṉe' quinga? Yogo' beṉe' že' ciuda Jerusalén ni zjaṉezde' gosone' to yeḻa' guac xen na' bi gac ye'cho beṉe' bi gosone' yeḻa' guaquen'.

¹⁷Ḻetechoze goncho cont cbi gaslas diža' dan' cheso'ena'. Da'nan' cheyaḻa' ye'cho ḻegaque' gata' castigw c̱hegaque' še yesoe'che' xtiža' Jesúsen'.

¹⁸Nach gosaxe' Pedroa' na' Juanṉa' da' yoble na' gose'e ḻegaque' bich yeso'e diža' c̱he Jesúsen' na' noch no yososed yosolo'ede'.

¹⁹Nach Pedroa' na' Juanṉa' bosyoži'e xtižen' gose'e ḻegaque': ―Ḻe gon xbab c̱he da' nga, ¿chaquele chaclaže' Diosen' gwzenagto' c̱hele o še chaclaže' gwzenagto' c̱he ḻe'?

²⁰Bi gac cuezto' bich güe'to' diža' c̱he da' ba ble'eto' na' ba beneto'.

²¹Na' da' zan da' gose' beṉe' gwnabia' ca' ḻegaque' cont yosošebe'ne'. Perw na' bi beseželde' nacle yesone' ḻegaque' castigw, ḻe beṉe' zan chesonxene' Diosen' dan' beyac bena' len yeḻa' guac c̱he Diosen'. Ba gwdie' c̱hoa iz na' ca goljte' bi goc se'e. Nach bososane' Pedroa' na' Juanṉa'.

²³Na' Pedroa' len Juanṉa' cate' bososan beṉe' gwnabian' ḻegaque' jaya'aque' gan' nita' yezica'chle beṉe' chesejnilaže' Criston' na' gosoe'lene' ḻegaque' diža' yogo'ḻoḻ can' gose' bx̱oz gwnabia' ca' na' beṉe' gole blao ca' ḻegaque'.

²⁴Na' cate' gosende' dan' gose' Pedroa' len Juanṉa' ḻegaque', toze can' gosone' xbab na' bosoḻ güiže' Diosen', gosene': ―X̱anto' Dios, len' beno' yaban' na' yežlion' na' nisdaon'. Len' beno' beṉac̱h na' be ca' chesaš na' bica'chle da' zjade, na' len' chnabi'o doxen.

²⁵Na' le' beno' cont da' rey David bzoje' diža' quinga dan' gož Spiritw c̱hion' ḻe', žan: Beṉe' ca' cbi zjanaque' beṉe' Israel chesase' contr le', X̱anto' Dios, perw bicze gac can' chesone' xbaben'.

²⁶Beṉe' gwnabia' c̱he nación ca' na' c̱he yež ca' txen zjanaque' chesone' contr le' X̱anto' Dios, na' contr Xi'iṉo' Criston' ben' gwseḻo' cont ṉabi'e.

²⁷’Na' X̱anto' Dios, naquen da' ḻi rey Herodes na' Poncio Pilato na' beṉe' cbi zjanaque' beṉe' Israel gosaque' txen len beṉe' Israel ca' ḻo ciuda nga. Na' yogüe' gosone' txen cont gosote' Xi'iṉo' Jesúsen' ben' nac beṉe' laždao' xilaže' juisyw, ben' gwlejo' cont ṉabi'e.

²⁸Gosone' can' gwc̱hogbi'o gac dan' bžio' bia' cani'te.

²⁹Na' ṉa'a X̱anto', gwṉa can' cheson beṉe' gwnabia' ca', ḻe chesaclaže' yosošebe' neto' beṉe' güen žin c̱hio'. Na' goclen neto' cont bi žebto' güe'to' xtižo'na'.

³⁰Na' cate' güe'to' xtižo'na' blo'ešca yeḻa' guac c̱he Xi'iṉo' Jesúsen' beṉe' laždao' xilaže' juisyon' cont gac yeḻa' guac, na' yesyeyac no beṉe' chesacšene na' gac bichle da' yesyebane beṉe'.

³¹Na' cate' beyož bosoḻ güiže' Diosen', Diosen' bene' gwxo' gan' zjandop zjanžague'na' na' Spiritw c̱he'na' gwzoachguan len ḻegaque', nach goso'e xtiža' Diosen' sin cbi besežebe'.

³²Na' yogo' beṉe' ca' gosejnilaže' Criston' toz ca gosac yic̱hjlažda'ogaque'. Na' yogo' bi da' zjade c̱hegaque' gosonen' toze, na' nono gwna: “C̱hia' da' nga”, o “C̱hia' da' na'”, ḻe naquen c̱he yogo'ḻoḻ gaque'.

³³Na' postlw ca' len yeḻa' guac xen c̱he Diosen' bosozejni'ide' beṉe' Jesúsen' bebane' ladjo beṉe' guat ca'. Na' Diosen' goclenchgüe' ḻegaque' len bi dan' gosone'.

³⁴Na' bibi goc falt bi da' beseyažje beṉe' gosejnilaže' Criston', ḻe beṉe' zjanape' no yežlio o no yo'o gosoten'. Na' mechw dan' besele'ede' c̱he to ton

³⁵bosonežjuen' postlw ca', na' postlw ca' goseyisen' len beṉe' beseyažjden'.