Aposol 4:6-35

⁶Ngan di tooltool yo tilo tiye di tigaua ngan nanga: di tooltool kuto maimai ke paroranga so pang Maro, ngan edi la Anas iye Kepas, inbe Yowan iye Aleksanda, inbe di rara ke Anas kapala lapau la tise tiye di tigaua nga.

⁷Motong la tikaua Pita iye Yowan tina lo tipatokodo di a tikodo dama kidi tooltool kuto maimai tina, inbe nga titor di yaru nen, “Ai, angru nga sei ikap gurana pang be kayei urata nen ye i? Too, sei imalum pang be kayei urata yo nen ngan ye ene i?”

⁸Motong la Maro Amunu Silene si ipapono Pita, le nga iraua betanga kidi nen. Iyei ne, “Ai, ang di kuto maimai yo matamim kala di Yuda nga inbe ang kapala yo di tooltool maimai kidi Yuda nga, ngan kalongo!

⁹Nga yelei, nookoot katai nga kakiu am amru a amse ni nga be se katoram ye so dook mata yo pombe pang ye tool atu yo kene kap rama bong amloni le kene dook mata mulu i, too?

¹⁰Be nen nga, ngan ang kaye di tooltool ke Isrel le imot ole lomim galanga nen. Ye Yesu Kirisi ke Nasaret in ene, ngan la le ikarata tool tani yo kene ikap rama i, in le dook mata mulu a nookoot nga se ikodo matamim nga. Ngan Yesu tani in ang la kapatota lo kai palasingi kaini a imata nga, bong ngan Maro ipamaditi mulu ye ni ke matenge oo.

¹¹Ngan Yesu in ben, ‘Pat yo ang tooltool ke renge rumu lomim panga tiap a kasukraii i, in la iyei pat dook mata yo ipamede rumu le imede i.’

¹²Ngan ni tool sa mulu ke be ikau idi a ipamulidi ye so dook tiap yo be igarungidi i, in tiap. Yesoo, Yesu ya taleu la Maro iwanga a isi be si ipamulidi i.”

¹³Ngan di tooltool maimai tina ngan lodi galanga ye Pita iye Yowan be yaru ngan tilo touo ye ni ke patomonaingi pitiap, inbe di ngan ben tooltool sokorai ke malala lono. Bong tiwetewete ngan koodi mede ye betanga dook, inbe yaru titattadai tiap lapau. Le di tooltool maimai tina ngan titakrai, inbe lodi galanga nen, yaru ngan muku ngan tiye Yesu tiyepe.

¹⁴Inbe tikamata tool tani yo tikarata le tinini dook mata mulu i, in iye Pita ye Yowan tina ngan tikodo gaongo nga. Ngan nen le di tooltool tina ngan tisere betanga yo be tiweta i.

¹⁵Le nga tiwete pang di yaru be tiyege rumu tani kidi kuto maimai i, inbe tipas a tidu tana ngan. Le nga yaru tidu tana, motong la di kuto maimai tina ngan di tapdi tiwetewete pang di diedi nen,

¹⁶“Nga ole tayeie soo so pang di tooltool ru nga? Ngan yaru tiyeie mos atu ye tool yo kene ikap rama i, inbe di tooltool le imot yo tiyepe Yerusalem nga, ngan lodi galanga ye oo. Ngan nen le ke be tapataukala di tiap sa.

¹⁷Bong be talele di a nen ngan betanga i ila imasak kataunu ye di tooltool nga le imot tiap nga, ngan ole tawete betanga medana pang di, inbe tawetekala di be kin yaru tiwete betanga nen mulu pang di tooltool ye Yesu ene be.”

¹⁸Motong la tikiui Pita iye Yowan tina mulu a tise se tiwete betanga medana pang di be yaru kin tiwetewete pang di tooltool too tipatomonai di mulu ye Yesu ene be.

¹⁹Bong ngan Pita ye Yowan tina ngan tiraua betanga kidi nen, “Ai, nga ole ang tapmim matamim too dook ngan? Ngan dada nangai dook mata ye Maro matana be amtoo i? Be amru amtoo betanga ke Maro, too be amtoo betanga kiang?

²⁰Ngan amru nga, o ke be ampakom koomam tiap. Bong ole amkaua bingi ye so yo amkamata ye matamam nga, inbe ye betanga yo am tapmam amlongo ye talngamam nga.”

²¹Motong la di kuto maimai tina ngan tiwete betanga medana pang di a be tipatangarur lodi ye mulu, inbe tiwulai di yaru a tidu. Ngan tipuske dada sa yo be tiyemenai di ye, in tiap, yesoo bong titattadai ye di tooltool le imot yo tiyitmaka Maro ene ye so yo tikamata ye matadi koot nga.

²²Di tooltool tina ngan tiyitmaka Maro ene nen, yesoo tool tani yo kene ikap rama i, in iyepe nen le lo rai ki sangaul pai, motong la Pita ye Yowan tiyeie mos nen ye a tikarata le dook mata mulu nga.

²³Di kuto maimai tina ngan tiwulai Pita ye Yowan a tidu diki. Motong la yaru timulu a tila pang ye di diedi kapala la tikaua bingi pang di ye betanga le imot kidi tooltool maimai ke paroranga so pang Maro tiye di tooltool maimai kidi Yuda yo tiwete pang di ye nga.

²⁴Ngan di diedi tina ngan tilongo betanga nen, ngan le di le imot tigaua lodi, inbe tipatarau pang Maro nen. Tiyei ne, “Tool Mai yo kuyei kuto mai pang so nga le imot i, ong in la kutar lang le tana le tiek, inbe so tina le imot yo iken ye nga.

²⁵Ngan mukot yege ni nga, ngan Amum Silene ila kapraingi kiong yo sasa kiam Dawiti i, in lono le iwete nen, ‘Nga yelei a di tooltool yo rara san ngan katedi malmal mata nga? Inbe nga yelei a di tooltool kidi Yuda lodi tar sokoraia dada dook tiap yo be tiyeii, in nga?

²⁶Ngan di tooltool kuto maimai yo matadi kala tana mai i le imot nga, ngan tikodo a tipanat ye patokongo. Inbe di kuto maimai kapala tigaua be tirautoo Tool Mai Maro inbe tool tani yo ipootoo panga ya taunu be si ikap di tooltool ki a ipamulu di i.’

²⁷Ngan nen le betanga tina itara kanono moolmool, le Erot iye Pontius Pailot tiye di tooltool yo tipa ye rara kidi Yuda tiap, inbe di tooltool ke Isrel yo tiyepe ye malala mai i nga, ngan tigaua be tirautoo Yesu, kapraingi kiong noonoonoo yo kupootoo pong ong taum i.

²⁸Ngan ye kene yo di tooltool tina ngan tiyei dada nen pang Yesu nga, ngan titoo ong taum lom leu. Yesoo, mukot yege ni nga, ngan ye gurana kiong ong taum ngan kuwete nen be ole dada yo nen ngan pombe pang ye Yesu.

²⁹Ngan nanga, Tool Mai, nookoot nga lom kaua urata ye betanga yo tiwete pam a be tipatangarur lomam ye nga, ngan kulonam a kupamedam am kapraingi kiong a be nen ngan amkodo le ammede, inbe amraia betanga kiong.

³⁰Le nga ole ong taum kupaposo gurana kiong a kukarata di tooltool yo matamatenge ikap di nga, le tinidi dook mata mulu. Inbe ole kuyei mos le so maimai ye kapraingi kiong Yesu yo ong taum kupootoo pong i, in ene, a nen ngan iyei ben tarkilanga pong.”

³¹Tipatarau a imot, motong la rumu tani yo tigaua a tiyepe ye i, in golong golongbe. Inbe Maro Amunu Silene si ipapon di le ke be titattadai tiap, bong tikodo le timede, inbe tiraia betanga ke Maro.

³²Di tooltool le imot yo titara lodi medana pang Yesu nga, ngan tigaua lodi le kutodi le atu. Le di atu sa ke be lon pasakala so ki a iken panga ya taunu, ngan tiap. Bong di le imot tiparere ye so tina yo kidi nga le imot.

³³Ngan di aposol tina ngan tisootoo raingi betanga ke Tool Mai Yesu ye yo imadit mulu ye ni ke matenge nga. Inbe betanga kidi yo tiwete nga, ngan gurana ki mai san. Ngan nen le Maro lono pang di a iyei dada dook mata le dook mata kaiye pang di.

³⁴Le di tina ngan sa kataunu ye di yo be imaka ye so, ngan tiap. Yesoo, di tooltool tina le imot yo tana le rumu kidi nga, ngan tiyawar a tikap pat ye, lo ngan be tikap pat tina

³⁵ngan la titar lo di aposol baedi, a nen ngan di aposol tina ngan tikap pang di diede kapala yo timaka ye so nga.