Hechos 19:1-10

¹Pues entonces conda turuto e Apolos tama e chinam Corinto tama e departamento Acaya, e Pablo war axana tama e departamento Asia tiaꞌ ayan meyra witzir tuaꞌ acꞌotoy tama e chinam Éfeso. Y conda cꞌotoy utajwi ubꞌa taca cora winicobꞌ xeꞌ war acꞌupseyanobꞌ tamar lo que cansenobꞌ umen e Juan xeꞌ ajchꞌuymar.

²Entonces e Pablo uyubꞌi tuobꞌ y che: —¿Ichꞌami ca Unawalir e Dios conda cay cꞌupseyanox tama e canseyaj era? che e Pablo. Y jaxirobꞌ uyareobꞌ e Pablo y che: —Machi. Non ma tiaꞌ coybꞌi jay ayan inteꞌ Unawalir e Dios, chenobꞌ e winicobꞌ era.

³Entonces e Pablo uyubꞌi tuobꞌ otronyajr y che: —Y conda chꞌujyox taca e jaꞌ, ¿tucꞌa chꞌuymar ichꞌami? che e Pablo. Y jaxirobꞌ chenobꞌ: —Pues non chꞌuybꞌiron umen e Juan xeꞌ ajchꞌuymar, chenobꞌ.

⁴Y che e Pablo: —E chꞌuymar lo que uche e Juan xeꞌ ajchꞌuymar jax taca tuaꞌ tin e war ubꞌijnu tuaꞌ uyactobꞌ e mabꞌambꞌanir. Jaxir war ucanse e gente tuaꞌ e Israel que ucꞌani tuaꞌ acꞌupseyanobꞌ tamar jaxir xeꞌ quetpa tuaꞌ watar xeꞌ jax e Jesús, che e Pablo.

⁵Entonces conda e gente era cꞌapa uyubꞌiobꞌ tunor uyojroner e Pablo, ixiobꞌ tunorobꞌ tuaꞌ achꞌujyobꞌ taca e jaꞌ otronyajr, pero tama ucꞌabꞌa Cawinquirar Jesús.

⁶Y conda e Pablo ucꞌatbꞌu ucꞌabꞌ tama ujorobꞌ, yopa Unawalir e Dios tamarobꞌ, y cay ojronobꞌ tama inteꞌ inteꞌ ojroner xeꞌ majax tuobꞌach. Y de allí cay uchꞌamiobꞌ cora ojroner tuaꞌ e Dios xeꞌ sutpa uchecsuobꞌ tut e inmojr era.

⁷Y xeꞌ chꞌujyobꞌ ayanobꞌ doce winicobꞌ.

⁸Entonces quetpa e Pablo tama e chinam Éfeso era tama uxteꞌ mes, y war axin tama e sinagoga tama inteꞌ inteꞌ día tuaꞌ e jiriar y war uturbꞌa ubꞌa tuaꞌ uche acꞌupseyanobꞌ tama uchinam e Dios tunor e gente tama e sinagoga era. Y meyra gente cay uchꞌamiobꞌ ucanseyaj.

⁹Pero ayan ubꞌan cora winicobꞌ xeꞌ cay uqꞌuecꞌojse uyalmobꞌ upater lo que war acansenobꞌ umen e Pablo xeꞌ machi cꞌupseyanobꞌ. Y tamar era cay ojronobꞌ upater ubꞌir Cawinquirar tut tunor e gente tama e sinagoga. Entonces e Pablo uyacta e sinagoga y uqꞌueche ixin tunor tin e cay cꞌupseyanobꞌ tama e Jesús y ixiobꞌ esto tama inteꞌ escuela xeꞌ tuaꞌ inteꞌ ajcanseyaj xeꞌ ucꞌabꞌa Tirano. Y yajaꞌ cay canseyan ajqꞌuin ajqꞌuin.

¹⁰Y bꞌan uche e Pablo tama chateꞌ año, y tamar era cꞌotoy uyubꞌiobꞌ uyojroner Cawinquirar tunor tin e turobꞌ tama e departamento Asia, motor tin e tuobꞌ e Israel y motor tin e majax tuobꞌ e Israel.