Yɛbəc 19:1-10

¹Tɛm ntɛ Apɔlɔs ɛnayi Kɔrɛnt mɔ, kɔ Pol nwɛ ɛnacepər sədare sa kəroŋ mɔ, ontor dare da Efesi. K’ɛmbəp di acɛpsɛ a Wəbɛ Yesu darəŋ alɔma.

²K’eyif ŋa: «Nənasɔtɔ Amera Ŋecempi ŋa Kanu kəyɛfɛ ntɛ nənayɔnɛ alaŋ Yesu mɔ ba?» Kɔ ŋaluksɛ Pol: «Səntane fɛ yati teta Amera Ŋecempi.»

³Kɔ Pol eyif ŋa sɔ: «Kɔ kəgbət dəromun kəre kɔ nəsɔtɔ-ɛ?» Kɔ ŋaluksɛ Pol: «Kəgbət ka Saŋ.»

⁴Kɔ Pol oloku: «Kəgbət dəromun ka Saŋ, kəsəkpər mera yati kənayi teta Kanu. Mba Saŋ oŋc-loku afum a ŋalaŋ wəkɔ endeder nkɔn tadarəŋ mɔ, itɔ tatɔkɔ Yesu.»

⁵Ntɛ ŋane moloku mamɔkɔ mɔ kɔ ŋasɔtɔ kəgbət dəromun tewe ta Wəbɛ Yesu.

⁶Kɔ Pol endeŋər ŋa waca, kɔ Amera Ŋecempi ŋender ŋa, kɔ ŋayɛfɛ kəloku cusu ncɛ ŋantɔcərɛ mɔ, ŋac-dəŋk sɔ moloku mɔtɔt mmɛ Kanu kənasom ŋa kədəŋk mɔ.

⁷Arkun akakɔ ŋaŋc-bəp wəco kɔ mɛrəŋ.

⁸Kɔ Pol ɛmbɛrɛ kəlɔ ka dəkətola da aSuyif, pəc-lok-lokɛ di kəbaŋsɛ disrɛ haŋ yof maas, pəc-gbɛkəlɛnɛ, pəc-sɛp kəsɔŋɛ afum kəcərɛ mes ma dɛbɛ da Kanu.

⁹Mba ntɛ ayenki səbomp alɔma ŋaŋc-fati kəlaŋ mɔ, ŋac-fani dɔpɔ da Wəbɛ nnɔ kənay kəyi mɔ. Kɔ Pol ɔmbɔlɛ ŋa, k’ ɛlɛkɛnɛ acɛpsɛ a Yesu darəŋ alɔma, kɔ ŋawɛnnɛ kəsək, kɔ ŋaŋlok-lokərɛnɛ dɔsɔk o dɔsɔk nde dəkətəksɛ da Tirano.

¹⁰Tatɔkɔ tɛnawon meren mɛrəŋ, kɔ tɔsɔŋɛ aSuyif kɔ aKresi aŋɛ ŋanayi atɔf ŋa Asi mɔ kəne toloku ta Wəbɛ.