HECHOS 14:7-14

⁷Na' boso'ozentezene' dižə' cobə c̱he Jesocristən' gatə'ətezə ɉa'aque'.

⁸Na' Listra na' ɉəsyə'ədie' to beṉə' nxiṉɉe' dezd golɉte', con cui bi bi fuers balor əgwsa'ate'e ṉi'e ca' par se'e.

⁹Na' chi'iteze' chzenague' choe' Pabən' dižə'ənə'. Nach Pabən' bgüie'ene' na' gocbe'ine' cheɉḻe' be'enə' de que Diozən' nape' yeḻə' guac par gone' ca gaquə se'e.

¹⁰Nach Pabən' boḻgüiže'ene' clar gože'ene': ―Gwzoža'. Nach ḻe'e gwzoža'ate be'enə' na' gwzolao chde'.

¹¹Beṉə' zan ca' ža'anə' choso'ogüie' can' ben Pabən' na' gosə'əne' dižə' Licaonia: ―Bac̱h gwse'etɉ X̱ancho ca' cheɉṉi'alažə'əcho gan' zocho nga na' ḻega'aque'en zɉənaque' ca beṉac̱h.

¹²Na' gosə'əne' de que Bernaben' naque' x̱anga'aque' Jopiter ben' chse'eɉṉi'alaže'e, na' de que Pabən' naque' x̱anga'aque' ben' nzi' Mercorio c̱hedə' ḻen' choe' dižə'.

¹³Na' yo'odao' gan' zo x̱anga'aque' Jopiter ben' chse'eɉṉi'alaže'e zon catezə chso'e lao' syodan'. Nach bx̱oz c̱he Jopiterən' gwze'e nc̱he'e go'oṉ ca' na' bazɉənone'eb xoche len yeɉ. Nach bx̱ozən' len beṉə' ca' ža'anə' besə'əžine' gan' nitə' apostol ca' gwse'enene' so'ote' go'oṉ ca' par se'eɉṉi'alaže'e ḻega'aque'.

¹⁴Pero apostol Bernaben' len Pabən' catə' gwsa'acbe'ine' can' so'on beṉə' ca', gosə'əc̱heze' xaga'aque'enə' c̱hedə' bito gwse'enene' so'on beṉə' lao' syodan' ca'. Gwse'ebe' ladɉo beṉə' ca' gwse'e ḻega'aque' zižɉo: ―Beṉə' bito gonḻe ca'. Ḻeczə beṉac̱h neto'. Za'ato' par chyix̱ɉue'ito' le'e de que cheyaḻə' gwša' yic̱hɉla'ažda'olen' na' cueɉyic̱hɉle costombr quinga de'en naole la' ḻega'aquən bito bi zɉəzaquə'ən. Cueɉyic̱hɉga'aclen nic̱h güe'ela'ole Diozən' ben' zo zeɉḻicaṉe, ben' ben yoban', yežlyon', nisda'onə', beṉac̱h, bia ca' chsa'aš, na' bitə'ətezə de'en chle'icho ḻe'e yoban', lao yežlyon' na' ḻo'o nis.