Hechos 13:40-42

⁴⁰Cuali xonmotlatlatacan, amo yeh namopantzinco mochiua tlen oquihtohqueh in teotlanauatanih. Yehuan ihquin oquihtohqueh:

⁴¹Ixquitacan, namehuan naquin nacuitzcah notlahtol, ixmotetzauican uan ixpohpoliuican, nic neh, Dios, ya nicah inchiuas itich ninqueh tonalmeh se tlamantli, se chiualis tlen namehuantzitzin amo uilis nanconniltocasqueh masqui acah manamechonahsicamatilti.

⁴²Ihcuac Pablo uan Bernabé oquisqueh itich in teotlanauatilcali, in tlen amo judíos oquintlatlautihqueh maquinmachtican ica nin tlanonotztli ocsipa nepa chicueyi itich in moseuilistonal.