HECHOS 11:11-16

¹¹’Loxaque blozh goṉ naa lar co, laa tsoṉ zha bgui blanso ro lidz meṉ ne blëz naa ga, pxeeḻ meṉ Cesarea co zho ziaadguib zho naa.

¹²Ni laa Espíritu Sant bneeque lo naa, no ganaḻ naa zhits zho, niicle ne zhazit nac zho; nacne bianaḻ naa. Ye gza xoop zha ne ziaḻnie naa nu bzë bio no.

¹³’Bdziṉ no lidz meṉ co, psilo me bzodiidz me lo no zha bzhaac me, në me leṉ yu no me, zeeṉe goṉ me ti xanjl Dios, rëb anjl co lo me cxeeḻ me bla zha ne tsie Jop tsiexi zho naa

¹⁴zeeṉa gane naa lo me zha grieelo csilaa Dios me lo doḻ grë meṉlidz me.

¹⁵’Laa naa psilo quiane lo me grë meṉlidz me, zeeṉe grëse zho laa zho pcaania Espíritu Sant, ni bgaa zho grë guieḻbiini ne rdeed me zigne bgaaque new.

¹⁶Ga nagoṉ psoladz naa xtiidz Jesús meṉ ne rnabey ne, zeeṉe znu në me lo ne: “Nli nisse pchoobnis Juan miech, saṉgue to zgaa to guieḻbiini ne rneedz Espíritu Sant.”