Gwa 21:8-24

⁸Ga wa pimrine yimaklene kanawa yapamta, gi rixanu gi gowuklu chiji, seyni pamyomolestsi getko gowuknuni. Kosemtluna chalu shimayma.

⁹Giyagni chiji ruptekinitkana, retluna chichpawa giglepokotkaluru, ga wa shima gitaakaluro, ga wa jimapro.

¹⁰Wane chinna Geso, “Ganikanro shima, wa gkashichanronatka xani.”

¹¹Ratskotlota Simo Petro. Chiji kosemtlu chalu. Katsepomnuro tsrokaka shima. Satu pacha pamyomole mapa shima. Wane pejnumkalo, seyni gi ruskaka chalu.

¹²Wane chinna Geso, “Ginanutka. Gnikanutka.” Gi satuna yimakleru tserpiranawata wa repomgiyaplu, “¿Katyi Pixa?” Rumatluna wa Gitsrukaachi rixinri.

¹³Runa Geso. Koscheklu jimapro. Renekna. Waneko pixka rixlo shima.

¹⁴Tyenwa mapa kata chininri rupgujewna Geso yimaklene yegi wa gipnachinetskalaya rali yotunretinitka.

¹⁵Giyagni rali nikaprikletinitkana Geso wane chinru Simo Petro, “Simo Gonasu wgene, ¿gi ge pushinikno wa nyi pnute?” Wane chinru, “Gigi, Gitsrukaachi. Pixa gimata nalukyayi.” Wane chinru, “Peneka nikletanna noprane gowega wgenene.”

¹⁶Rumepe wane chinretatnaklu, “Simo, Gonasu wgene, ¿gi ge pushinikno?” Wane chinru, “Gigi, Gitsrukaachi. Pixa gimata nalukyayi.” Wane china, “Peneka nikletanna nowegatene.”

¹⁷Mapa kata chininri wane chinru, “Simo, Gonasu wgene, ¿Gi ge palukno?” Wamontaklu Petro wa mapa kata chininri wane chinru, “¿Gi ge palukno?” Wane chinru, “Gitsrukaachi, Psoluko pumata. Pixa gimata nalukyayi.” Wane chinru Geso, “Peneka nikletanna nowegatene.

¹⁸Galikakni, galikakni wane nchinyi wa makluji pixini pushrikapchijitnawa. Palukyawaka pya. Wa tsrutsoleji pixini pkanrakanu. Satu gishrikapchijitanyi. Ranikanyi pma maluka yaletyawakanu.”

¹⁹Tyenwa china rumatkakyaplu gi pixkalutu gipukchi chinanu rumalwutikolupa Goyakalu. Wane chininitka wane chinru, “Pomkagitanno.”

²⁰Ruprotaka Petro. Retlu wa yimakleru wa Geso gishinikanru romkagitjerna, wa rutspanostatkoxjeru nikikowakaya, wa wane chinachri, “Gitsrukaachi, ¿katupni wa psamyokjerupa?”

²¹Giyagni Petro getlu wale. Wane chinru Geso, “Gitsrukaachi, ¿ga wa tye, gi rixanu?”

²²Wane chinru Geso, “Nalukiniplu rutukanu wale nuninpotunanuko, ¿gi pixanru pixa? Pomkagitanno pixa.”

²³Giyagni rushpaka tye tokanchi wa moletkakachinkakluko, wa tye yimakleru gi wa rupnanu. Seyni wa Geso gi wane chinru, “Gi rupnanu,” seyni, “Nalukiniplu rutukanu wale nuninpotunanuko, ¿gi pixanru pixa?”

²⁴Tyenwa yimakleru gipgujtatachri tyekakapirana. Wale yonatlu tyekakapirana. Wumatlu wa rupgujtalewle galikakpotunanni.