Juan 21:8-24

⁸Nekemodi se menge doma tinoledaan simakay te belangay. Ginoyod dan se pokot nepenò te ikan, so medapag dan diyà te kilid te lanaw, olò menge kesyaman mitros se kediyò dan.

⁹Pegdateng dan doton te kilid, kinità dan se pan, aw doen heman menge ikan tinoeg den diyà te baga.

¹⁰Minikagi si Jesus, “Ibingi niyo diyà se menge ikan neabat niyo gina.”

¹¹Yan nenayit si Pedro diyà te belangay aw inanggin din se pokot. Nepenò iyan te dedakel ikan, sebad gatos keliman teg telo se kedita niyan. Pengkey ontò medita se ikan, meneng wedà kelisì se pokot.

¹²Penga niyan, minikagi si Jesus, “Ayas kaw den, aw kaen kaw.” Wedad tinoledaan mig-insà ki Jesus aw sinu sikandin, so netegahan den dan te sikandin se Pengolo.

¹³Penga niyan dimoton si Jesus aw inabat din se pan aw ikan, aw inteped din diyà kandan.

¹⁴Yan se iketelo te pegpekità i Jesus diyà te menge tinoledaan din penga te pegkeantay din lekat te nematay.

¹⁵Penga te pegkaen dan, mig-insà si Jesus diyà ki Pedro, “Simon, batà i Juan, pengkey dakel se pedowan te menge doma no kanak, labi lay pa dakel se kamno pedowan kanak?” Timaba si Pedro, “Ee, Pengolo. Netegahan no te ontò dakel se pedowan ko kamno.” Minikagi si Jesus, “Peg-ipat ka te menge sakop ko.”

¹⁶Mig-insà si Jesus te ikedowa, “Simon, batà i Juan, dakel lay se pedowan no kanak?” Timaba si Pedro, “Ee, Pengolo. Netegahan no te ontò dakel se pedowan ko kamno.” Minikagi si Jesus, “Pegtonggò ka heman te menge sakop ko.”

¹⁷Mig-insà si Jesus te iketelo, “Simon, batà i Juan, ontò lay dakel se pedowan no kanak?” Nelidò se pedowan i Pedro so mig-insà si Jesus kandin te iketelo aw ontò dakel se pedowan din kandin. Timaba sikandin, “Pengolo, netegahan no se kedita. Netegahan no te ontò dakel se pedowan ko kamno.” Minikagi si Jesus, “Peg-ipat ka te menge sakop ko egkedekelan ko te pedowan.

¹⁸Eneng-enengi se ikegiyen ko kamno. Te kaling ka pa otaw, sikona se nenaol te kamno pegkeotawun, aw sikona heman se nemallì aw kenan ka pesalo. Meneng aw megketemoay ka, ibegay no se belad no amon geposen ka te menge doma otaw, aw ibingen ka dan doton te kenà no ibeg.”

¹⁹Yan se inikagi i Jesus amon ipetaga-taga din kandin aw eden se keokit te pegkematay i Pedro amon iduyun se Timanem. Penga niyan, minikagi si Jesus, “Gayed ka taking kanak.”

²⁰Penga niyan, miniling si Pedro, aw kinità din kidoen se sìyan tinoledaan ontò nedekelan i Jesus te pedowan. Yan se timangkil diyà te Pengolo kedengan te pegpengaen dan aw mig-insà aw sinu se megtolok kandin.

²¹Na, pegkità i Pedro kandin, mig-insà sikandin, “Pengolo, eden lay heman se domateng kwani kandin?”

²²Timaba si Jesus, “Simpana ibeg ko eked sikandin kematay lamig te aldaw te peglikò ko, wedad labut no kenyan. Meneng keilangan gayed ka tomaking kanak.”

²³Yan migpeindanay se menge otaw egpemenal ki Cristo te eked kematay se tinoledaan sìyan. Meneng kenà niyan se inikagi i Jesus, so se inikagi din, “Simpana ibeg ko eked sikandin kematay lamig te aldaw te peglikò ko, wedad labut no kenyan.”

²⁴Se sìyan tinoledaan ontò nedekelan i Jesus te pedowan, yan se mig-indan te kedita nini aw simolat kani. Nedengeg heman sikandin so ontò keseligan se kagi din.