Godigo Nogi Ugwaba Sabo Tęąbi Po Wabo Buku Dabe 94:13-19

¹³Nago te sę ebo aga olo bidimainogo tiwai, tama sęgego aga gegeidali weyu, tama te dwai bidi dabe isilama, gų pageba paboba usu nigi pabo dao.

¹⁴Magi basowe, Genuai Bidigo aga we bidi augwali tagalobo menio. Mu tama, aga sa muani we bidi augwali tudiba me mugubeo.

¹⁵Tama nosali bidi dabego po tų ebode, augwaligo sę dolo naga yaibao, tama dwagi yai doloba pai bidi augwaligo usu dao po weyu, te kolesaga wali paibao.

¹⁶Niwai bidigo ena tau selama, tama te dwai sę ebo bidi aiyaba elaluaibawe? Niwai bidigo ena tau selama, te dwai sę ebo bidi sela sąwaibawe?

¹⁷God agai ena tau sigi menigi sogo da, ena polobadu isai gų pagede polo pila mugi dao.

¹⁸Eno te homu yai, “Eno sągą kikila peyu, ena tula muaibao,” wai. Tiali goli, menio. Genuai Bidi nago ena godolo mu eyu, tama nago ena nogo tola selama, ena te dwai sęgę ebo digi tulalubeo.

¹⁹Tama eno homu sęgę yali sogo tama eno homu nai hauwa dali yai, nago eno homu dwagi yai eyu, tama nagame elama bidai, tama eno homu dwagi yai emainogo yai.