Godigo Nogi Ugwaba Sabo Tęąbi Po Wabo Buku Dabe 78:16-66

¹⁶Agai te masigide wę pedalumainu elama, tama wę te busidu soabo genuai wę tiwai soali.

¹⁷Tiali goli, augwaligo te Ugwade Mu Bidibo Godiba dwai sę yali, tama augwali te kemi tǫ bulude bidiyu, agaba hagoma yalio.

¹⁸Augwaligo God usu siyu, te tiwai yai. Augwaligo i bomonama agaba weyu, te augwaligo wei ebo nai agai momainu yai.

¹⁹Augwaligo te tiwai posobo po Godiba wali, “Godigo dabolo te tǫ wa pai bulude te nai hauwa mabo usu yaiba, agawe?

²⁰Mu tama, hasiabolo agai te genuai masigiba elibaso, tama te wę pedelali. Tiali goli, magi ebawe? Agai dabolo te bret meba me te tubo mi magowe?” wali.

²¹Tialima, Genuai Bidigo augwaligo po odolama, tama agai wado po wali. Agai te Jekopgo hani dabeba te sia tula palali. Tama agai wado po te genuai mu pedelalio.

²²Magi baso meni, augwaligo konealubo homu agaba musiąwai. Tama te agai augwali tau selama, te bugagia bidimainu yaibao, tede augwaligo agaba konealubo homu dąų me wabeo.

²³Tiali goli, tagalao, agai te ugwadu elalubo dagaluba po olama, tama te dagalu dalaluai dao.

²⁴Tialima, agai te nai mana tagala palama, tulalubosi, te augwaligo selama, tuali. Agai te dagalude nai te we bidi dabe augwaliba mawai dao.

²⁵Tama tialima, augwa te enselgo nai salio. Godigo te nai hauwa mu augwaliba menama, tama augwali usu mu yai.

²⁶Tama nosali agai te giliga pedalubo badu te wali hodolali, tama agai bomogo naga, agai te saut badu wali hodolali.

²⁷Tama agai te ba sibi hauwa mu te tǫ hogomu tiwai me, te nabis wę sande te kemi tiwai, te augwali tomoba tulalumainu yai dao.

²⁸Godigo te ba dabe te augwa bidalubo pesage tomoba tulalumainu ilali, tama augwaligo ugwa be bagua salio.

²⁹Tama tialima, te we bidi dabego tulama, tama augwa mu pągąna peyu, tabia palio. Te we bidi dabego sainu te gela wali nai, te Godigo augwali manio.

³⁰Augwa te nai tutubo sę yai. Mu tama, augwa te nai tula silisąbadi,

³¹tama Godigo augwaliba wado po weyu, tama te bomai bidi dabe ela muani, te Israel wiegi yai ogwa bidi dabe dao.

³²Godigo te bidigo isiąwai te tobage bomai sę dabe yali, tiali goli, te we bidi dabego te dwai sę umabo mu idu geyu, tama augwaligo konealubo homu agaba dąų me wabeo.

³³Tialima, polo tama mu, te agai augwali dola silalio, te pedauwalide mobo pedelama, te polo pela silibo tiwai yalio. Agai augwali polo tama mu dolama, tama augwali isai dao.

³⁴Te Godigo meba ela mubo sogo, te gasa bage ge neyu, augwa homu begelama, tama agaba ma begasa aselama, tama agaba gedu haluasa po bomonama walio.

³⁵Te megi da, augwaligo homugo ma koneama, God te augwa tonalubo bidi dao homu yai. Te Ugwadu Mu Bidibo Godigo agai te augwali tau sabo bidi dao.

³⁶Tiali goli, augwa tibo po olama, tama agaba te odolali pedauwalide ąį soabo tiwai elama, daganobo po walio.

³⁷Augwaligo agai po wali me pabe, tama augwaligo te aga dali dąų walali bomai po bolama, togalio.

³⁸Tiali goli, Godigo te olo tau mabo wiegi yai kolesaga augwaliba elama, tama augwaligo te dwai sęgę sela sąwani, tama agai augwali me dolobeo. Hauwa sogo te agai wado yali, te palia selama elalu, tama augwaliba haliga sębę me ebeo.

³⁹Agai te tama tiwai homu augwaliba yai. Augwali te we bidi naga tama tiwai, augwali te wali aselama pabo tiwai ebao.

⁴⁰Hauwa sogo augwa hagoma eyu, agai po sela sąyu, te bidi meni yai tǫ wa pai bulude bidiyu tiali. Tama hauwa augwaligo aga haliga sęgę ilali.

⁴¹Te Israel dabego God te tedali gasa wiegi yai mu dao. Tiali goli, hauwa sogo augwaligo aga usu sabo sę eyu, tama agai wado yabo sę ilali.

⁴²Augwaligo te agai genuai bomo teba homu konesiąwai, tama agai augwali te boi bidi dabego nogode ma sali, te sogoba augwaligo homu kone me palobeo.

⁴³Te sogo agai te bidigo isiąwai bomai sę dabe te Soan bulude yali, te Isip tǫ pedaide dao.

⁴⁴Godigo te wę dabede te kaneme pedalumainu elama, tama te Isip dabego tuainu yali usu me ebeo.

⁴⁵Tama agai te bolia hauwa, me te gedeli hauwa te augwaliba tagala palai. Tama te bolia dabego augwali gąų kela tuyu yali, tama te gedeli dabego te Isip bagego gide nai dabe hauwa dolali.

⁴⁶Tama Godigo te suma digi me, kauwa bidi dabe me, te kuli mano dabe dali tagala palama, tama augwaligo te augwa gide nai dabe tula silai.

⁴⁷Agai te talua ge tulubage tagala palama, tama tego te augwaligo wain ni dabe dolali. Tama agai te talua ge tulubagego te augwaligo ni kaya dolomainu yai dao.

⁴⁸Agai te genuai tulubage, te talua ge tulubage, tagala palama, tama augwaligo bulmakau dabe ela muai dao.

⁴⁹Agai augwaliba te wado umabo mu udubadi udubadi genama, tama augwaliba te dene mu mawai. Tama agai te ensel bidi meba tagala palama, te augwali doligi pali, tama augwali te sęgę genuai mu salio.

⁵⁰Agai augwaliba haliga sębę elama, tama agai augwali me gogolobeo. Menio. Agai te genuai gasi tagala palama, tama augwali isila palio.

⁵¹Agai te Isip hani tigidaligo te gomunai ogwa dabe ela muna silali.

⁵²Tama agai te sipsip tonalubo bidi tiwai elama, tama aga polasa peyu tama, aga we bidi dabe tonaluali. Tama te tǫ wa pai bulude agai augwaliba te sunumi ola mawai.

⁵³Agai augwali odasa peyu, tama augwali bugagia bidali, tama tiyu, augwali wi me ebeo. Tiali goli, te tamu ąįgo augwa boi bidi dabe mesega salio.

⁵⁴Agai augwali te aga tǫba digi odasa asali. Te bulu du te pesage te aga digi bomogo sali bulu dao.

⁵⁵Agai te gasa hani dabe te aga hani dabe asobo si, te augwali sela sąwani. Tama agai te tǫ te Israel hani dabeba doba yali. Tama agai augwali te augwa ugwa be dabede bugagia bidimainu yai dao.

⁵⁶Tiali goli, te Israel dabego te Ugwadu Mu Bidibo God usu selama, tama agaba hagoma yai. Augwaligo agai bomai po wali me pisąwai.

⁵⁷Augwa hagoma elama, agai po sela sąwani, te augwa wąį nǫų dabego te polobadu yali tiwai yalio. Augwali te gagea pai enesigi te enebo dolo pisąbo tiwai yai dao.

⁵⁸Augwaligo te tibo godigo alta dabe nigali, tama te tebogo te Godigo wado po omainu ilali. Augwaligo te tibo god dabe nigilama ebaso, tama Godigo augwaliba dwai haliga yai dao.

⁵⁹Godigo augwaligo te tebo kolesaga sulama, tama agai augwaliba haliga sębę dwai mu yai, tama tibaso agai te Israel dabe tudiba mu muanio.

⁶⁰Tama agai te aga Silode elaluali ugwa be tagalalio. Te bede aga te we bidi dabe tomode bidali.

⁶¹Tama agai te boi bidi dabego te dąų walali bomai po muani halobage, te bokis kontrak, sela pomainu ilali. Te bokis halobagede augwaligo te agai bomo me ula suali.

⁶²Agai te aga we bidi dabeba wado po olama, tama te boi bidi dabego augwali ela mumainogo yai dao.

⁶³Te gesi ogwa bidi dabe te genuai boi hwįani madi isali, tama te gesi ogwa we wegi dabe te augwali sabo bidi dabe meni yai dao.

⁶⁴Te boi bidi dabego te pris dabe ela mubaso, tama augwa we dabego te augwalide homu dene eyu, tama gela wainu ebo te usu ebeo.

⁶⁵Tialima, megi da, Genuai Bidi hodaluali, te bidi betde pilama hodalubo tiwai gilama yali, tama te bomai bidigo te wain wę hauwa tulama, tama te i hai ola bilibo tiwai gilama yali.

⁶⁶Tama agai te boi bidi dabe dali hwįnama, tama augwa asaliba ma pobeasa pali. Agai augwali aiyaba mu elalubaso, tama augwali hale dwai mu yali, tama augwaligo ma hwįabo usu ebeo.