Godigo Nogi Ugwaba Sabo Tęąbi Po Wabo Buku Dabe 66:4-13

⁴Te tǫde we bidi tigidaligo nageba lotu waibao. Augwa te balia po weyu, nago nogi ugwaba sabo dao.

⁵Dage aselama, te Godigo yali sę suiąo. Te genuai genuai sę dabe agai te we bidi dabe tomode yai dao.

⁶Agai te tamu ąįgo pesage te wa pai pedalumainu ilama, tama dago wąį nǫų dabe tedu pelayu, tama te wę nogegi pai. Tede te augwaligo Godiba wiegi yai homu pemene yai dao.

⁷Agai te genuai bomo elalu, tama aga te king sesemane bidada peyu, bidada pobao. Tama agai te we bidi hani tigidaligo ebo sę tigidali te bugagia subao. Tama tiyu, te meba hanigo te Godide hagoma yabuo.

⁸Dage tigidali hani, dagego te dena God nogi ugwaba siąo. Dagego te God nogi ugwaba sabo, tama te we bidi dabego odaibao.

⁹Agai da tonalubaso, tama da te bidibo ula dali bidibao, tama agai da te dwai sęgęba tulalumainu me sula tagalubeo.

¹⁰God, nago da usu siyu, te bidi dabego te wiegi yai kapa silva te siago ulama, tama te hogomu kakali sela sąbo tiwai ebo dao.

¹¹Nago da te bono gągągo tola selama, tama nago genuai sęgę daba muani.

¹²Nago te boi bidi dabego da mu agala somainu ilali. Tama da te sia dobadi te sia dabo tomodu bilali tiwai eyu, tama te asobo wę tomodu pabo yali. Tiali goli, megi nago da te wiegi yai pesageba odasa aselama, bidibao.

¹³Polobadu te sęgę enaba pedalubaso, tama eno nageba po dąų weyu, te siaba tigidali ulama, domainu ebo ofa mawaiba po wai. Eno te dąų walali po me konealuyu, tama tialima, eno te ofa dabe nageba selasa asaibao. Te eno nago tempel beba te hasa dabe sela aselama, te siaba ulumainu yaibao.