Godigo Nogi Ugwaba Sabo Tęąbi Po Wabo Buku Dabe 56:3-10

³Te Tigidali Bomo Elalubo God Mu, te ena magi nai me delide wi ebo sogo, eno konealubo homu nageba dąų mu wabo dao.

⁴Eno konealubo homu Godiba kęą pelama, tama eno agai mu poba homu konealubao. Tama tiyu, eno agai nogi ugwaba sobao. Eno konealubo homu Godiba munama, tama ena te magi nai mede wi me egobeo. Te bidi dabego mena sę enaba yaibawe? Menio.

⁵Tigidali sę eno yainogo ebadi goli, te boi bidi dabego dolobo sę yai. Te sesemane sogo augwaligo homugo te ena dolabo sunumi gegebo sę yai.

⁶Augwa deliba sisinagaselama, geme dualalubo dao. Te augwaligo ena bilibo bugagia tonalu, tama ena augwaligo ela muabo homu eyu, te tama tibo dao.

⁷God, nago te augwa ebo kolesagade dwai dene mao. Nago augwalide haliga sębę eyu, tama augwali mu dolama, aiyaba mu elaluao.

⁸Nago ena te sęgę toliyu, tama ena te dwai dene me eyu, tama ena te gela udubo te nago koneai. Tialima, nago tede homu konealu elama, tama te naga bukude te nago asęai dao.

⁹God, eno nage koneanio. Nago ena tau sainu yai. Tama tialima, nosali eno nageba gedu haluasa po waibao, te nago te boi bidi dabe pobebaso, tama augwali wi paibao.

¹⁰Eno te Godiba homu konealu, tama eno agai dąų wali poba homu konealuai. Tama tiyu, eno agai nogi ugwaba sabo dao. Mu tama, eno te Genuai Bidigo dąų walali poba homu kone palama, tama eno aga nogi ugwaba sabo dao.