Godigo Nogi Ugwaba Sabo Tęąbi Po Wabo Buku Dabe 136:1-12

¹Dago Genuai Bidiba usu da wao, magi baso meni, agai dabolo wiegi yai sę yai. Sesemane bidada pabo sogo agai da wei mu ebao.

²Dago Genuai Bidiba usu da waiyąo. Agai te tigidali tibo god aiyaba elaluai. Sesemane sesemane sogo agai da wei mu ebo dao.

³Dago usu da po te Genuai Bidiba wao. Agai te tǫde genuai bidi tigidali aiyaba elaluali. Agai da sesemane bidada pabo sogo wei mu ebao.

⁴Agaduba deligo te genuai sę te bidigo me isiąwai bomai sę dabe ebo dao. Agai da sesemane bidada pabo sogo wei mu ebo dao.

⁵Te aga koneani kolesagade digi agai te dagalu nigilama, te ugwadu elalubo nai dabe me nigalio. Sesemane bidada pabo agai da wei mu ebao.

⁶Agai te tǫ ugwadu munama, tama te wę dabe aiyadu elalubao. Agai da sesemane bidada pabo sogo wei mu ebo dao.

⁷Agai te giliga me, polua me, nigali. Sesemane bidada pabo sogo agai da wei mu ebo dao.

⁸Agai te be posobo sogo te ulade te giligago tonalumainu ilali. Agai da sesemane bidada pabo sogo wei mu ebao.

⁹Agai te polua me hǫ dabego te be hulia sabo sogode tonalumainu ilali. Agai da sesemane bidada pabo sogo wei mu ebo dao.

¹⁰Agai te Isip dabego gomunai ogwa dabe ela muani. Te sesemane bidada pabo sogo agai da wei mu ebo dao.

¹¹Agai te Israel dabe odasa peyu, tama augwaligo te Isip taga palio. Agai da sesemane bidada pabo sogo wei mu ebo dao.

¹²Te agai genuai bomogo digi, agai augwali odasa palio. Sesemane bidada pabo sogo agai da wei mu ebo dao.