Godigo Nogi Ugwaba Sabo Tęąbi Po Wabo Buku Dabe 119:60-160

⁶⁰Eno tonalugobeo. Eno polo nago bomai po wali paibao.

⁶¹Te dwai bidigo usu sabo homugo ena paliyu, tama ena augwaligo kolesagaba oda sainogo ebao, tiali digi eno nago bomai po tagalobeo.

⁶²Te hulide mu ena hodaluama, nago nogi ugwaba siyu, te me badu doloba pai po nago po tų ilibode wali tiai.

⁶³Ena te nago sę ebo bidi dabe dali biliyu, te nago bomo yai po wali bilibo bage te eno abagi dabe dao.

⁶⁴Genuai Bidi, nago te tǫde we bidi tigidali godolo mu ebao. Nago tigidali bomo yai po enabolo ola mao.

⁶⁵Genuai Bidi, nago wiegi yai kolesaga naga sę bidi, enabolo yai dao. Nago naga dąų wali po wali mu pabo dao.

⁶⁶Nago bomo yai po tigidalide eno homu dąų mu obaso, tama tiyu, nago wiegi yai kolesaga te ola mabo sę ena dali yao.

⁶⁷Nago dene me enaba wasiąbadi digi, te eno nago sunumi wali asobeo. Tiali goli, megi da, eno nago po wali pabo dao.

⁶⁸Nago wiegi yai mu eyu, tama nago olo mu tau sabo kolesaga enade ebao. Nago bomo yai po ena bugagia ola maduao.

⁶⁹Te dwai hagoma ebo bidi dabego tibo po hauwa enade te gasa we bidibolo weyu ebao. Tiali goli, eno gasa homu me isąyu, te eno nago bomai po naga tigidali wali pabo dao.

⁷⁰Te bidi dabe augwaligo wiegi yai homu kolesaga me elalubeo. Tiali goli, eno te nago bomo yai po godolo homu mu ebo dao.

⁷¹Te wiegi yai mu da, te nago dene mabo sę enabolo yali. Te tiali sęgo nago bomo yai po wali pomainogo ena bugagia ola mawai dao.

⁷²Eno te mone godolo homu me egobeo, te eno nago bomo yai po godolo ebo tiwai gilama me egobeo.

⁷³Nago digi nago ena nigali, tama nago ena bugagia tonalubao. Nago wiegi yai homu kolesaga enaba mao, te eno nago bomo yai po tigidali bugagia konea sabo sę emainogo yao.

⁷⁴Te we bidi augwali nagede wi eyu, nage dologode bidibo bage, te augwaligo ena sulama, homu pemene yaibao, magi baso meni, eno nago dąų wali pode homu dąų wabo dao.

⁷⁵Genuai Bidio, eno koneani, nago bomo yai po tigidali te dolo naga mu elalubao. Nago eno ebo kolesaga deli naga dodolabo homu eyu, tama nago enabolo sęgę mawai dao.

⁷⁶Nago dąų wabo po walio, te nago sesemane sogo ena godolo eyu, te naga sę bidi ena haliga dąų walabo po wai. Tialima, megi da, eno homugo nago tama sę emainogo homu ebao.

⁷⁷Nago ena megi hobede eyu da, te ena bidabo ula saibao, magi baso meni, eno nago bomo yai po godolo mu ebao.

⁷⁸Te hagoma ebo bidi dabe augwaligo tibo po weyu, ena olo po tų ilaibao. Augwa te ebo kolesagade hale mu ebo sę ilao. Tiali digi ena, te eno sesemane sogo nago bomo yai po homu konealueibao.

⁷⁹Mena bidi dabe te nagede wi eyu, tama te bidi dabego nago bomo yai po koneyu, te augwali enaba asomainao.

⁸⁰Te eno homugo nago ena tau sobaso, te nago bomo yai po tigidali eno wali peyu, tama ena te ena ebo kolesagade hale sabo sę me egobeo.

⁸¹Nago ena ma sogowe weyu tonalu, te ena haliga sęgę mu ebao, tama eno bomo tigidali silibao. Tiali goli, eno nago pode konealubo homu dąų wai mu elalubo dao.

⁸²Eno te nago dąų wali po mu usu nugowe weyu, nage tonalubadi, te eno gedu magane eyu, hagela mu ebao. Tama eno te po weyu, “Nisu sogo nago eno haliga dua digi nagame iligowe?” eno te po wabo dao.

⁸³Ena te kibu meme wale te augwaligo wain ąį bulama, te dobaso, badia pai sąbo tiwai yali. Tiali digi te eno nago bomo yai po te eno homude gegeda pabo menio.

⁸⁴Nisu naga sogo eno tonalueibawe? Nisu sogo mu enabolo te dwai dene mabo bidi dabeba nago augwaliba dene magowe?

⁸⁵Te dwai hagoma ebo bidi dabego te nago bomo yai po wali pabo meni. Augwaligo geme dualubo kolesaga me badu eyu, te ena tola sainu ebao.

⁸⁶Da we bidigo nago bomo yai po tigidali dąų wabo homu ebao. Tama nago po te tulalugobeo. Te bidi dabe augwaligo tibo po dabego ena dolobao. Tama tibaso, nago ena tau somainu homu ebao.

⁸⁷Pąde tama te augwaligo ena ela mueinu yai. Tiali goli, te eno nago bomo yai po tagala homu me ebeo.

⁸⁸Nago ena bugagia tonalubao, magi baso meni, nago sesemane sogo ena godolo homu ebao. Tama tibaso, eno nago bomo yai po tigidali wali mu pabo dao.

⁸⁹Genuai Bidi, nago po da, sesemane sogo elalua pidu elalua paibao. Te nago bidibo bulude nago pogo bomo munu me siligobeo.

⁹⁰Nago sesemane sogo naga wali po wali pidu bidibao. Nago e tǫ naga gesabidi badu munama elalubao, tama elalubo tiwai tama elalu, te ibaba me kila sesa me pabeo.

⁹¹Naga digi nago po wali gilama te tigidali nai sibi te polobadu elalua asali, megi e sogoba usu nagaselama, megi me elalubao. Magi baso meni, tigidali nai sibigo nago sę naga ebao.

⁹²Te eno nago bomo yai po godolo menigi sogo da, teda nago enaba dene mabo sę ebaso, te isigi dao.

⁹³Eno nago bomo yai po me tagalogobeo, magi baso meni, eno te po dabe wali pobaso, te nago ena bidabo ula mobaso ena bidibao.

⁹⁴Ena naga nai mu tama, tama tiyu, nago ena ma sao. Sesemane sogo eno nago po wali pabo homu ebao.

⁹⁵Te dwai sę ebo bidi dabe geme duala sagaselama, ena ela mueinu ebao. Tiali goli, eno nago bomo yai po tigidali konealubaso, te tama sę eno homu si me egobeo.

⁹⁶Eno megi konebao, te mena nai te wiegi yai deli mu me elalubeo. Tialima, te nago po te mu polalubao, tama tego te tigidali nai usu elama, te tigidali side elalua pidu, elalueibao.

⁹⁷Eno nago bomo yai po godolo mu ebao! Eno tede homu kone palobo sę te siade me hulide ebo dao.

⁹⁸Nago bomo yai po ena dali sesemane sogo elalu, tama te konebo homu kolesaga enabolo mabo dao. Tama tebo sęgo te ena kolesaga koneai bidi mu tiwai elama, tama eno te ena boi bidi dabe koneani homu kolesaga aiyaba elaluai dao.

⁹⁹Te sesemane sogo eno nago mu poba naga homu kone palobo dao, tama tiyu, eno wiegi yai homu kolesaga mu selama, tama eno ena po ola mabo tisa bidi aiyaba elaluai dao.

¹⁰⁰Tama eno koneani kolesagago te monu dabego koneani kolesaga te aiyaba elaluali, magi baso meni, eno nago doloba pai bomo yai po wali mu pobaso, tebo dao.

¹⁰¹Ena dwai kolesaga wali pabo homu eyu, iba kila sabo dao, magi baso meni, eno homugo nago po naga wali pabo homu ebo dao.

¹⁰²Naga digi nago po dabe ena ola mani. Tama tiyu, eno te po me tagalobo menio.

¹⁰³Te bunu ge nai hani eno pedauwalide tubo pusu yaibao, tiali goli, nago po pusu ebo te umagi mu yaibao.

¹⁰⁴Nago bomai pogo enabolo te wiegi yai homu kolesaga mawaibao, tama tialima, eno te dwai kolesaga tigidali ebo te eno homu hagela mu ebao.

¹⁰⁵Nago po te lam sole ula tiwai eyu, te ena tau sobaso, dolo paibao, tama te ula tiwai eyu, ena sunumi ola mabo dao.

¹⁰⁶Eno po dąų weyu, te eno nago doloba pai po tigidali wali paibao po walio. Tialima, eno te tiwai tama yaibao. Eno tibo po me wagobeo.

¹⁰⁷Genuai Bidio, odao. Genuai dene mugo ena mesegelali. Nago ena te bidibo ula elalumainogo te nago po dąų tiwai gilama yao.

¹⁰⁸Genuai Bidio, eno gedu haluasa po weyu, te nageba puba hwi obao. Nago eno puba hwi wali po selama, tama ena nago po bugagia ola magameo.

¹⁰⁹Sesemane sogo eno ena bidibo ula tagalabo sisi elalubao. Tiali goli, eno nago bomai po homu kone ebo me tagalobeo.

¹¹⁰Te dwai bidi dabego ena tola sabo bono gągą po diliginama, dalubao. Tiali goli, eno nago po me tagalobeo.

¹¹¹Eno nago po sesemane sogo totalua pidubo dao. Tama te pogo eno haliga pemene ilibo dao.

¹¹²Eno po dąų weyu, te eno nago bomo yai po tigidali wali pidubadi, te ena isibo sogoba usu naibao po wai dao.

¹¹³Nage wali paibao weyu, tibo po wabo bidi dabe te eno godolo me egobeo, tiali goli, eno nago bomo yai po wali pabo homu eyu, godolo ebao.

¹¹⁴Nage naga tama ena seselalubo bidi elalubao, te eno bomai obo elalubo tiwai dao. Eno nago dąų wali pode konealubo homu dąų wai elalubao.

¹¹⁵Dage dwai sęgę sabo we bidigo ena tagalao. Eno ena Godigo bomai po wali painogo homu ebo dao.

¹¹⁶Genuai Bidi, nago po dąų weyu, te nago ena dąų walama, te ena bidibo ula elalueibao po wali, tama eno nago dąų wali pode homu konealuyu bidali. Nago te bomo enabolo mao, tiyu eno konealubo homu odolali tagalidalio.

¹¹⁷Ena nogo tolalubaso, te ena bugagia bidaibao. Tama sesemane sogo eno olo nago poba bugagia munama elalu, te eno wali paibao.

¹¹⁸Te nago bomo yai po wali pisąma tagalobo we bidi tigidali te nago tudiba mubo dao. Te augwaligo tibo po wabo dabe te odolali waibao.

¹¹⁹Nago homugo te dwai sę ebo we bidi dabe te pobelebage tiwai naga homu ebo dao, tama tibaso, eno nago po godolo mu ebo dao.

¹²⁰Ena nagede wi mu elama, tama ena didibili ebao. Eno nago po tų ebode homu kone palama, te wi ebo dao.

¹²¹Eno te wiegi yai doloba pai kolesaga ebao. Eno homugo nago ena tagaligi homu ebao, tiyu te boi bidi dabego enaba dwai sę idalio.

¹²²Eno homugo te nago naga sę bidi ena tau sabo bomai po dąų omainogo homu ebao. Te nago te dwai hagoma ebo bidi dabego enabolo te sęgę momai hagede sula tagaligio.

¹²³Te nago ena te dwai bidi dabego nogode ma dobola sogowe weyu, te nageba tonalu tonalu ebao, te nago polobadu tama tiabo po dąų wai dao. Tiali goli, ena tonalubadi digi, te ena dwai dene mu ebo dao.

¹²⁴Eno homugo nago ena godolo ebo kolesaga wali peyu, te nago mu po te bugagia ola magameo.

¹²⁵Ena nago sę bidi da, tibaso enabolo wiegi yai homu kolesaga mobaso da, te eno nago po page koneaibao.

¹²⁶Te we bidi dabe augwaligo nago bomo yai po bolobao. Tama tibaso, megi da te nago dene augwaliba mabo sogo dao.

¹²⁷Eno nago bomo yai po godolo mu ebao. Eno te polalubo nai te mone gol eno godolo homu elalubeo, tialima te eno nago po godolo homu ebo dao.

¹²⁸Tama tiyu, eno nago po tigidali wali pobao. Eno homugo te gasa sunumi dabego te nago sunumi ela soabo te eno homugo hagela homu mu ebao.

¹²⁹Nago po te wiegi yai mu elalubao. Tama tiyu, eno homu si isiąyu, eno te po tigidali wali pabo dao.

¹³⁰Te bidi me deligo gasa bidi tau siyu, te nago po page konemainogo tibaso da, teda aga haligaba ula mabo te saibao. Tama te pogo te homu kolesaga bugagia konesiąwani bidibolo te homu kolesaga mabo dao.

¹³¹Eno nago bomo yai po homu godolo mu ebao, tama eno haliga umagia hogodaluyu, wali pabo homu ebao.

¹³²Nage aselama, te nago homu dene eyu, tau sabo kolesaga enabolo yao. Te nage godolo homu ebo we bidi tigidaliba te tiwai sę nago ebo dao.

¹³³Te nago tonalubaso da, teda ena te dwai sęgęba tulalugobeo, te nago tama tiabo sę po polobadu dąų wai. Te dwai kolesagago ena aiyaba elalu idali weyu, te nago tona tagaligio.

¹³⁴Te ena aiyaba elalubo sę bidi dabego, te ena augwaligo dolidali dabego, te nago ena ma sao. Tama tiwai sę augwaligo enaba isąbaso, te eno nago po wali paibao.

¹³⁵Eno homugo te nage ena pąba bidagaselama, te nago bomo yai po tigidali enabolo ola mayu, te ena bugagia wiegi yai ilao.

¹³⁶Eno gela hauwa weyu, tama eno gedu ąį gela gigua umagi mu yaibao, magi baso meni, te bidi dabe augwaligo nago bomo yai po wali pisąbaso, te ena gela wabo dao.

¹³⁷Genuai Bidi, nage doloba pai mu tama elalubao, tama nago bomo yai po tigidali te doloba pai mu naga elalubo dao.

¹³⁸Nago dabolo mani bomo yai po tigidali doloba pai elalu, tama wiegi yai naga elalubo dao.

¹³⁹Te eno boi bidi dabe augwaligo nago pode homu kone palobo sę me ebo menio. Tama tibaso, eno haliga te isi dabo posolo tiwai ebo dao.

¹⁴⁰Nago po dąų wabo te mu po naga waibao, te eno usu sela suai dao. Tama ena, nago sę bidigo, eno homugo nago te tiwai dąų wabo po godolo homu naga ebo dao.

¹⁴¹Ena olo bidi da, te bidi dabe augwaligo enabolo posobo po obadi, tiali goli, te eno nago ola mabo po homu kone palobo me tagalogobeo.

¹⁴²Te nago doloba pai kolesaga sesemane sogo elalua pidu bidaibao, tama sesemane sogo nago bomai po te mu naga dao.

¹⁴³Te sęgę hauwa enaba pedelai, tiali goli, eno nago bomo yai pode homu pemene yaibao.

¹⁴⁴Nago po doloba pai sesemane sogo elalubao. Nago ena tau sobaso da, teda eno te po page koneama, tama ena te bidabo ula dali bidaibao.

¹⁴⁵Genuai Bidi, eno gedu haluasa po bomonama mu nageba obao. Eno gedu haluasa po odao, tialima te eno nago po tigidali wali paibao.

¹⁴⁶Megi eno nageba i obao. Ena ma dobola sao, tama tibaso da, te eno nago bomo yai po tigidali wali paibao.

¹⁴⁷Te be posisąbadi digi, te eno nageba gedu haluasa po weyu, ena tau sao po obao. Eno nago dąų wali poba homu dąų wagasai elalubo dao.

¹⁴⁸Te hulide ena godege me pigobeo. Eno sesemane sogo nago poba naga homu kone elalubo dao.

¹⁴⁹Genuai Bidio, nago sesemane sogo ena godolo ebaso, tama nago eno gedu haluasa po wabo odao. Nago ena homu dene eyu, tau sao. Tama tiyu, nago ena bugagia tonalubaso da, te ena bidibo ula dali bidaibao.

¹⁵⁰Te dwai homu elalubo bidi dabego te ena dolabo homu eyu, te augwali pąba asobao. Augwaligo nago bomo yai po wali pabo homu munu me ebeo.

¹⁵¹Tiali goli, Genuai Bidi, nage ena pąde bidibao, tama nago hasegelesiąbo bomo yai po tigidali te mu po naga elalubao.

¹⁵²Te bidada asali sogo polobadu mu eno nago po konea salio. Nago te wali pogo te sesemane sogo bidada pabo po wai dao.

¹⁵³Nago suali, ena te genuai sęgę elalubo, tama tialima, nago te sęgę sela sąyao. Eno nago bomo yai po homu kone me gegeda palobo menio.

¹⁵⁴Ena tau siyu, ena ma selama, te ena bidabo ula mao, te nago tama tiabo po dąų wai dao, te tiwai yao.

¹⁵⁵Te dwai kolesaga ebo bidi dabego nago doloba pai po wali pisąbaso, tama tiyu te nago augwali ma sogobeo po wali.

¹⁵⁶Tiali goli, Genuai Bidio, nago olo tau mabo wiegi yai kolesaga te genuai mu elalubao. Nago ena ma sabo po dąų walai elalubao, tialima, eno homugo nago te sę megi tama yao homu ebao.

¹⁵⁷Bidi hauwago ena dolobo sę eyu, te enaba boi bidi ebao, tiali goli, eno nago wiegi yai mu bomai po me tagalogobeo.

¹⁵⁸Te bidi dabego konealubo homu dąų wali te eno suali sela sąbaso, te eno augwaliba wado po wabo dao, magi baso meni, augwaligo nago po wali pisąbaso tebo dao.

¹⁵⁹Nago ena subao, eno nago ola mabo po godolo mu ebao. Nago ena godolo ebo kolesaga me hasegelegobeo, tama tiyu nago ena ma sao.

¹⁶⁰Nago bomo yai po page da, te mu po naga tama elalubao. Tama nago doloba pai bomo yai po tigidali te sesemane sogo elalua pidu, elalua pabo dao.