Godigo Nogi Ugwaba Sabo Tęąbi Po Wabo Buku Dabe 119:32-48

³²Eno nago po polo wali painogo yaibao, magi basowe, nago dwagi yai kolesaga meba enabolo momainogo eno te homu ebo dao.

³³Genuai Bidi, nago dwagi yai po ena bugagia ola mayu, tama tigidali sogo eno te po wali paio.

³⁴Nago te dwagi yai po enabolo hania bugagia ola mayu da, te eno wali paibao. Eno homugo ena hodolobaso da, te eno te dwagi yai po tigidali wali paibao.

³⁵Nago eno sągągo bilibo tų dodoliyu, tama eno nago dwagi yai po wabo wali bilainogo yai, magi basowe, eno te dwagi yai po godolo mu ebo dao.

³⁶Nago eno homu hodoloyu da, te eno nago po wali pabo homu yaibao. Tama eno homugo te mena gasa bidigo nai dabe suyu, homu hodolidalio.

³⁷Nago ena tau selama, te dwai sę ebo tudiba muaibao. Nago ena dwagi yai bugagia ilao, te nago ena dali wali po wali pao.

³⁸Nago te bidi nage dali wi ebo bidi augwalibolo te po mabo dao. Tialima, naga sę bidi, ena dali, nago tiwai yao.

³⁹Eno te dwai po wabo dali wi ebaso da, nago ena tau sali da, te pogo ena aiyaba elalugobeo.

⁴⁰Eno homugo nago po tigidali wali painogo ebo dao. Nage dwagi yai mu, tama nago bidibo ula ena mawai dao.

⁴¹Genuai Bidi, nago ena ola mani, nago ena godolo mu eyu, nago ena ma sai. Polobadu nago po weyu, tama tiaiba wai dao.

⁴²Nago ena tau siyu, te dwai bidi dabego ena dali wabo po wei ponomainogo yai, magi basowe, eno nago po koneama dąų wabo dao.

⁴³Nago ena bomo mayu da, te nago mu po tigidali sogo eno pusainogo yaibao, magi basowe, eno nago doloba pai po koneama dąų wai.

⁴⁴Te nage dwagi yai po eno sesemane bidada pabo sogo wali paibao.

⁴⁵Eno usu selama, nago po wali painogo yai, tama te badi te dwai kolesgago ena dąų wagobeo.

⁴⁶Nago po te eno tuni bidi augwali dali waibao. Eno te sę ebo ena hale me egobeo.

⁴⁷Eno dwagi yai dali nago po wali painogo yai. Magi basowe, eno te dwagi yai po godolo mu ebo dao.

⁴⁸Eno homugo nago po dwagi yai eyu, tama eno godolo mu ebao. Tama sesemane sogo eno homugo te nago dwagi yai po eno koneaibao.