Gesami Hea:su 9:1-12

¹Hina Gode! Na dogo huluane amoga Dima nodosa. Amola hawa: hamosu noga:idafa Dia hamoi amo na da sisa:i lamu.

²Di galebeba:le, na da hahawane gesami hea:mu. Gasa Bagade Gode! Na da Dima nodone gesami hea:mu.

³Di ba:beba:le, nama ha lai dunu da sinidigili bu hobeasa. Ilia da dafane bogosa.

⁴Dia fofada:su da moloidafa amola Dia da na fidima:ne fofada:i dagoi.

⁵Di da Godema higa:i dunu ilima fofada:ne se iasu. Amola Di da wadela:i hamosu dunu wadela:lesi dagoi. Amo dunu da bu hame ba:mu.

⁶Ninima ha lai dunu da fisi dagoi, bu hamedafa ba:mu. Di da ilia moilai huluane gugunufinisi dagoi. Ilia amola da bu hamedafa ba:mu.

⁷Be Hina Gode da eso huluane Hinadafa esalalalumu. E da Ea Fofada:su Fisu hahamoi dagoi.

⁸E da fofada:su hou moloidafa amoga fifi asi gala amo huluane ouligisa. E da fi huluane ilima moloidafa fofada:nana.

⁹Se nabasu da banenesi dunu ilima doaga:sea, Hina Gode da ilia gaga:su wamoaligisu sogebi agoai ba:sa.

¹⁰Hina Gode! Nowa da Dia hou dawa:sea, ilia da Di dafawaneyale dawa:mu. Nowa da Dima masea, Di da amo dunu hamedafa yolesimu.

¹¹Hina Gode da Saione soge amo ouligisa. Ema nodone gesami hea:ma. Fifi asi gala huluane ilima Ea hou olelema.

¹²Nowa dunu e se nabasea amola disia, Gode da hame gogolesa. Amola dunu da ilima se iabe, Gode da ilima amolawane se iaha.