Gesami Hea:su 94:6-20

⁶Ilia da uda didalo amola guluba: mano amola sofe misi dunu ninia soge ganodini esalebe dunu amo huluane fane lelegesa.

⁷Ilia da amane, sia:sa “Hina Gode Ea da nini hame ba:sa. Isala:ili Gode da nini hame dawa:digi.”

⁸Na dunu fi! Dilia da abuli gagaoui agoane ganoma:bela:? Dilia da habogala noga:le dawa:ma:bela:?

⁹Dilia da adi dawa:bela:? Gode da ninia ge hahamoi. E da sia: hame nabala:? Gode da ninia si hahamoi. E da hame ba:sala:?

¹⁰E da fifi asi gala ilima ouligisa! E da ilima se bidi ima:bela:? E da osobo bagade dunu huluane ilima olelesu dunu. E da dawa: hame ganabela:?

¹¹Hina Gode da dunu huluane ilia asigiga dawa:be huluane dawa:sa, E da ilia dawa:su da hamedene liligi amo dawa:

¹²Hina Gode! Nowa dunu amo Di da ema Dia sema olelebe. e da hahawane bagade gala!

¹³Bidi hamosu eno da ema mae doaga:ma:ne, Di da helefisu ema iaha, amogainini wadela:i hou hamosu dunu ili sa:ima:ne uli dogoi da dogosa.

¹⁴Hina Gode da Ea dunu fi hame fisiagamu. E da Ea dunu fi ilima hame gogolemu.

¹⁵Moloidafa fofada:su hou da fofada:su diasu ganodini bu ba:mu, amola moloidafa dunu ilia da amo hou fuligala:mu.

¹⁶Nowa da wadela:i hou hamosu amoma higale nama ga:musa: wa:legadobela:? Nowa da wadela:i hou hamosu dunu ilima higale, namagale aligibala:?

¹⁷Hina Gode da na hame fidi ganiaba, na da hedolowane ouiya:i soge amoga asi gala:loba.

¹⁸Na da amane sia:i “Na da dafabe!” be Hina Gode Dia mae fisili asigidafa hou amoga, Dia na fidi.

¹⁹Habogala na da da:i dione dadawa:sea, Di da na lalesalawene hahawane hamosa.

²⁰Di da giadofale fofada:su dunu ilima hahamomu hou da hame gala, amo ilia da giadofale fofada:su hamoma:ne sia:sa, amola amo ilia da noga:i dunu amo fane legemusa:, wamo sia: ilegele amola molole hamosu dunu amo fane lelegesa.