Gesami Hea:su 7:6-16

⁶Hina Gode! Di nama ha lai dunuma ougili doagala:ma. Di wa:legadole na fidima. Di da moloidafa fofada:su fawane dawa:.

⁷Amaiba:le, Di fifi asi gala dunu huluane Dima gilisila misa:ne sia:ma. Amola, Dia ilima gasa bagadewane ouligima.

⁸Di da fifi asi gala dunu huluane ilima Fofada:su Dunu esala. Hina Gode! Na fidima:ne fofada:ma. Na da wadela:i hou hame hamoi.

⁹Di da moloidafa Gode esala. Di da ninia asigi dawa:su amola ninia dogo ganodini hanai hou huluane dawa:beba:le, fofada:nana. Wadela:i hamosu dunu ilia wadela:i hou hedofama. Amola, noga:i dunu ilima bidi ima.

¹⁰Gode da na Gaga:su dunu. E da nowa dunu da Ea sia: nabawane hamosea, amo E da gaga:sa.

¹¹Gode da moloidafa fofada:su dunu. E da wadela:i hamosu dunu ilima fofada:nanu, se iaha.

¹²Ilia da ilia hou hame afadenesea, E da fedege agoane Ea gobihei mema:ne debesa. E da Ea dadi dili ouligisa.

¹³E da Ea gasa bagade gegesu liligi lale, ea dadi amoga dilaligili oulela.

¹⁴Ba:ma! Wadela:i hamosu dunu da ilia dogo ganodini wadela:i hamomusa: dawa:lala. Ilia da moso hamomusa: dawa:lala, amola ogogosu bagade hamonana.

¹⁵Be ilia eno dunu sa:ima:ne sanisisia, ilisu da amo sani ganodini daha.

¹⁶Amaiba:le, ilia wadela:i hou da ililima se iasu dabe iaha. Amola ilia nimi bagade hou da ililima se iasu iaha.