Gesami Hea:su 69:7-34

⁷Na da Dima fa:no bobogebeba:le, nama ha lai da nama gadebeba:le, na da gogosiasu amoga dedeboi dagoi.

⁸Na nolalalia ilia siga, na da sofe misi dunu agoai ba:sa. Amola na sosogo fi da na ga fi misi dunu agoai ba:sa.

⁹Na da Dia Debolo Diasuga asigi hou da na dogo ganodini lalu agoane nesa. Dunu da Dima gadele sia:sea, na da Dima madelagiba:le, ilia da defele nama gadesa.

¹⁰Na da na hou asaboma:ne, ha:i mae nawene esala. Amola eno dunu da nama gadesa.

¹¹Na da disa eboboi abula amoga gaga:sa. Amola ilia da na ba:le oufesega:sa.

¹²Ilia da logo bega: naba:le sia:daha. Amola adini ba:i dunu da nama oufesega:ne, gesami ge lasa.

¹³Be Hina Gode! Na da amo mae dawa:le Dima sia:ne gadomu. Dia eso ilegei amoga nama dabe adole ima. Dia da osobo bagade dunu ilima asigi bagadeba:le, nama adole ima. Bai Dia gaga:ma:ne ilegele sia:i, amo Di da hame gogolesa.

¹⁴Na da fafu amoga bosona dasa:besa:le, na gaga:ma! Nama ha lai dunu, ilia na fasa:besa:le, na gaga:ma! Na da hano lugudu amo ganodini magufasa:besa:le, na gaga:ma!

¹⁵Hano heda:i da na dedebole fane legesa:besa:le, na gaga:ma! Na da hano wayabo bagade lugudu amoga magufale gela dasa:besa:le, na gaga:ma! Na da bogoi uli dogoiga dasa:besa:le, na gaga:ma!

¹⁶Hina Gode! Dia da mae fisili, noga:idafa asigi hou dawa:. Amaiba:le, na sia:ne gadosu amoma adole ima. Nama ba:le guda:ma!

¹⁷Na da Dia hawa: hamosu dunu. Nama mae wamoaligima! Na da bidi hamosu bagadewane ba:sa. Wahadafa nama dabe adole ima.

¹⁸Nama misini, na gaga:ma! Nama ha lai da na hasalasa:besa:le, na gaga:ma!

¹⁹Nama ha lai dunu ilia da nama gadesa amola na gogosiama:ne hamosa. Dia da nama ha lai dunu huluane ba:lala.

²⁰Ilia da nama bagadewane gadebeba:le, na da gala:la sa:i agoai ba:sa. Na da heawi agoai diala. Na da eno dunu ilia da nama asigimu, na da dawa:i. Be ilia da nama hame asigi galu. Ilia da na dogo denesima:ne, na da hanai galu. Be agoane hame ba:i.

²¹Na da ha:i galea, ilia da nama bogoma:ne ha:i manu iasu. Na da hano hanai galea, ilia da nama wadela:i gamoga:i waini hano iasu.

²²Ilia lolo nasu da ili wadela:lesimu da defea. Ilia hamoma:ne sia:i lolo nasu da ilila: dafama:ne hamomu da defea.

²³Gode! Dia ilia si wadela:lesima! Ilia baligi eso huluane gasa hamedenesima!

²⁴Dia ougi hou ili da:iya soga:sima! Dia ougi hou da ilima baligili heda:ma:ma!

²⁵Ilia fisisu sogebi da dunu hamedene ba:mu da defea! Ilia abula diasu ganodini, dunu afae esalebe hame ba:mu da defea!

²⁶Ilia da dunu ilima Di da se iasu, ilima baligili se iaha. Ilia da dunu amo Dia da fa:ginisi, amo ilia se nabasu ba:beba:le, oufesega:ne sia: daha.

²⁷Ilia wadela:i hou hamoi huluane dedene sa:i dialoma! Dia gaga:su amoga ilia afae mae lama:ma!

²⁸Ilia dio Fifi Ahoanusu Meloa amo ganodini dedei dialebe, amo fadegama! Dia fi ilia dio dedei, amoga ilia dio mae dialoma:ma!

²⁹Be na da heawini se bagade naba. Gode! Na gaguia gadole, amola na gaga:ma!

³⁰Na da Godema nodone gesami hea:mu! Na da Ema nodobeba:le, Ea gasa bagade hou eno dunuma sisia:i lamu.

³¹Hina Gode da bulamagau gobele salasu amola bulamagau gawali noga:le dei, amo gobele salasu hahawane ba:sa. Be na da Ema dafawane nodosea, E da amo hou da ohe gobele salasu amo baligisa ba:sa.

³²Banenesi dunu da amo hou ba:sea, hahawane ganumu. Dunu amo da Godema nodosu da amo hou ba:sea, dogo denesi dagoi ba:mu.

³³Hina Gode da liligi hame gagui hahani dunu amo ilia adole ba:su naba. E da Ea dunu amo da afugi diasu ganodini esalebe, hame gogolesa.

³⁴Hebene amola osobo bagade amola hano wayabo bagade! Amo ganodini esalebe liligi huluane! Godema nodoma!