Gesami Hea:su 35:3-22

³Nama se bobogebe dunu amo nama mae hasalasima:ne, Dia goge agei amola Dia goahei amo gaguia gadoma. Di da nama Di da na gaga:mu, amane sia:ma!

⁴Dunu amo da na medole legemusa: hanasa, amo ilia da gogosia:i amola hasali dagoi ba:mu da defea. Dunu amo da nama se imunusa: ilegesa, amo ilia da ogobele ededenagia:ma:mu.

⁵Hina Gode Ea a:igele dunu da amo wadela:i hamosu dunu ilima se bobogesea, ilia da widi hafoga:i gisi foga mini ahoabe agoai ba:mu da defea.

⁶Hina Gode Ea a:igele dunu da ilima se bobogele, ili gufalole salasea, ilia logo da gasi agoane amola sadenei ba:mu da defea.

⁷Ilia bai hamedene, na sa:ima:ne sanenisi. Amola ilia da na sa:ima:ne, uli sedade dogonesi.

⁸Be ilia da mae dawa:iwane esalea, ili da wadela:le gugunufinisi dagoi ba:mu. Ilia da ilila: sani amoga ili gobele sa:i dagoi ba:mu. Amola ilia da wadela:lesimusa:, dafamu.

⁹Amasea, na da Hina Gode Ea gaga:su ba:beba:le, hahawane bagade ganumu.

¹⁰Na da dawa:su huluane, amoga na da Hina Godema amane sia:mu, “Dunu afae Di agoai da hamedafa gala. Di da gasa bagade dunu ilia gasa hamedei dunu ili mae hasalasima:ne, amo gasa hamedei dunu gaga:sa. Amola gasa fi dunu da hame gagui dunu mae banenisima:ne, ili gaga:sa.

¹¹Wadela:i dunu ilia da nama wadela:i hou amo na da hame hamoi amola hamedafa dawa:, amomane nama udigili diwaneya udidisa.

¹²Ilia da na noga:idafa hou ilima hamoi, amoga wadela:i dabe iaha. Amola na da baligiliwane da:i diosa.

¹³Be ilia da oloi dialea, na disa ga:su abula ga:i. Na da ha:i manu mae nawene, na dialuma fili sa:ili, ili uhinisima:ne Godema sia:ne gadoi.

¹⁴Na da sama o olalalia amo fidima:ne sia:ne gadobe defele, na da ili dawa:ma:ne, heawini dinanawane beguduli ahoasu. Dunu da ea:me bogoiba:le dibi agoane, na da ili dawa:beba:le dinanu.

¹⁵Be na da bidi hamosu ba:beba:le, ilia huluane da nodogia:i. Amola ilia da na sisiga:le aliligili, da:da:lole lalasogole oufesega:su. Degabo misi dunu da na fai amola gebewane fananu.

¹⁶Ilia da dunu amo da emo gasuga:igi dunu ilima lasogole oufesega:su defele, ilia na hihini odagi hagusa:ili, si godonasia sosodolalu.

¹⁷Hina Gode! Habowali seda Di da udigili ba:lesisilaloma:bela:? Ilia da nama doagala:musa: manebe, Dia na gaga:ma! Ilia da laione wa:me agoane nama doagala:sa! Ilia na mae hasalasima:ne, gaga:ma!

¹⁸Amasea, na da Dia fi dunu dadalei dialea, amogai Dima nodone sia:mu. Na da ilia huluane ba:lea, amogai Dima nodone sia:mu.

¹⁹Nama ogogosu ha lai dunu ilia da na hasalasibiba:le amola hidale habosesema:ne sia:sa:besa:le, Dia ilia logo hedofama. Nama ha lai da udigili na higasa, ilia da na da:i dioi amo ba:sea, nama ohomogini nodone, mae ba:ma:ma.

²⁰Ilia da asigiwane hame sia:sa. Be ilia da ogogosu sia: bagohame, amoga olofosu hanai dunu ilia hou wadela:ma:ne hamosa.

²¹Ilia da diwaneya udidili, amane wele sia:sa, “Ninia da dia hamobe ba:i dagoi.”

²²Be, Hina Gode! Di da amo hou hamonanebe ba:i dagoi! Amaiba:le, mae ouiya:ma! Sedagawane mae esaloma!