1Vadaeni Iosepa ese iena hesiai tauna badana dekenai ia hamaoroa, ia gwau, “Inai tatau edia puse dekenai aniani oi udaia, idia honu momokani, bona edia moni danu edia puse ena uduna dekenai do oi udaia.
2Bona lauegu kapusi, inai siliva gauna, gabeai ia vara tauna ena puse uduna dekenai do oi udaia, bona iena uiti hoia totona moni danu.” Vadaeni ia ese Iosepa ena hereva hegeregerena ia karaia.
3Daba ia rere, inai tatau mai edia doniki danu idia siaia lao.
4Hanua idia rakatania, to idia raka daudau lasi neganai, Iosepa ese iena hesiai tauna badana dekenai ia hamaoroa, ia gwau, “Oi toreisi, idia edia murina dekenai oi lao, idia oi davaria neganai, do oi gwau henia idia dekenai, oi gwau, ‘Badina dahaka namo be dika dekena amo davana umui karaia?
5Lauegu kapusi, siliva gauna, badina dahaka umui henaoa? Lauegu biaguna be inai dekena amo ia inua, bona inai dekena amo dahaka dahaka do idia vara ena dala ibounai ia diba. Umui kerere dikadika.’ ”
6Unai dainai hesiai tauna badana ese idia ia davaria neganai, unai bamona ia gwau henia idia dekenai.
7Idia haere henia ia dekenai, idia gwau, “Lohia e, dahaka dainai inai bamona oi hereva? Ai be unai bamona ai karaia lasi, lasi momokani.
8Oi itaia, oiemu puse dekenai ai davaria monina be ai henia lou vadaeni oi dekenai, Kanana dekena amo ai giroa mai neganai. Unai dainai dahaka totona oiemu biaguna ena ruma dekenai siliva o golo do ai henaoa?
9Tau namona e, bema oi davaria, ai ta dekenai unai bamona ia karaia, ia be do ia mase, bona ai be oiemu biaguna ese iena hesiai taudia do ia halaoa ai.”
10Vadaeni ia gwau, “Ia namo, unai bamona do ita karaia. Iena puse dekenai dohore lau davaria tauna be, lauegu hesiai tauna do lau halaoa, to umui orena be do umui kerere lasi.”
11Vadaeni idia ta ta edia puse idia abia diho karaharaga, idia kehoa.
12Vadaeni inai tau ese ia tahua. Guna ia vara tauna dekenai ia tahua hamatamaia, ia lao bona gabeai ia vara tauna dekenai ia hadokoa. Kapusi be Beniamina ena puse dekenai ia davaria.
13Vadaeni lalohisihisi dainai edia dabua idia darea, edia puse be doniki edia doruna dekenai idia atoa kau, idia giroa lou hanua badana dekenai.
14Vadaeni Iuda mai ena tadikakana be Iosepa ena ruma dekenai idia ginidae neganai, Iosepa be do ruma dekenai. Unai neganai idia ese Iosepa ena vairana dekenai edia vairana idia atoa diho tano dekenai.
15Vadaeni Iosepa ese ia gwau henia idia dekenai, ia gwau, “Edena bamona umui karaia vadaeni? Umui diba lasi lau be dahaka dahaka do idia vara ena dala ibounai lau diba tauna, a?”
16Iuda ia gwau, “Lauegu lohia e! Edena bamona do ai hereva, dahaka do ai gwau oi dekenai, edena bamona do ai maoro oiemu vairana dekenai? Lohia e, Dirava ese aiemai kerere ia hedinaraia vadaeni. Harihari ai ibounai be oiemu hesiai taudia davana lasi, iena puse lalonai oiemu kapusi ia davaria tauna sibona lasi.”
17To Iosepa ia gwau, “Lasi. Unai bamona do lau karaia lasi umui dekenai. Lauegu kapusi ia abia tauna sibona mo be lauegu hesiai tauna davana lasi do lau halaoa, to umui orena be umui emui tamana dekenai do umui giroa lou mai maino danu.”
18Vadaeni Iuda ese ia raka Iosepa kahirakahira dekenai, ia gwau, “Lohia e, mani emu kara, lau ura noinoi oi dekenai. Mani emu kara oiemu badu do ia keruma lau dekenai, badina oi be Farao hegeregerena.
19Lauegu lohia e, ai dekenai oi nanadaia, oi gwau, ‘Umui emui tamana, o umui emui tadina idia noho, a?’
20Vadaeni ai haere henia oi dekenai, ai gwau, ‘Aiemai tamana tau buruka ia noho, bona mero ta, tau buruka neganai ia abia merona. Unai mero ena kakana be ia mase vadaeni, sinana ena natuna tamona sibona ia, unai dainai aiemai tamana ese ia lalokau bada ia dekenai.’
21Lohia e, oi ese oi hamaoroa ai dekenai, oi gwau, ‘Umui hakaua mai, lau itaia.’
22Vadaeni ai haere henia oi dekenai, ai gwau, ‘Unai mero ese iena tamana do ia rakatania lasi, badina bema ia lao gabu ta dekenai, iena tamana be dohore ia mase.’
23Lohia e, unai neganai oi ese oi hamaoroa ai dekenai, oi gwau, ‘Umui emui tadina gabeai ia vara merona, bema umui hakaua mai lasi neganai, lauegu vairana do umui itaia lou lasi.’
24“Vadaeni, oiemu hesiai tauna, aiemai tamana dekenai ai giroa lou neganai, oiemu hereva ai hamaoroa ia dekenai.
25Vadaeni aiemai tamana ia gwau, ‘Umui giroa lou, iseda aniani sisina ma umui abia.’
26Vadaeni ai gwau, ‘Ai lao diba lasi, badina be bema aiemai tadina ai danu do ai lao lasi, unai tau ena vairana dohore ai itaia lou lasi. Aiemai lao dalana be tamona sibona, mero danu do ai lao be unai.’
27Vadaeni aiemai tamana ia gwau, ‘Umui diba lauegu adavana be memero rua ia abia.
28Ta ese lau ia rakatania, vadaeni lau laloa dagedage gauna ta ese ia darea mase, vadaeni lau itaia lou lasi ia mai bona hari.
29To harihari inai ta danu do umui kokia lau dekena amo, vadaeni bema dika ta ia dekenai dohore ia vara, lau be dohore lau mase. Badina lau buruka dainai, lalohisihisi inai bamona ese do ia hamasea lau.’
30“Unai dainai, lohia e, aiemai tamana dekenai bema lau giroa lao, to mero bema lau hakaua lao lasi, do ia itaia ai dekenai, mero be lasi neganai dohore ia mase.
31Iena mauri bona unai mero ena mauri be hakapua tamona. Lohia e, aiemai tamana ia buruka momokani tauna dainai, ai ese iena mase do ai havaraia, mai lalohisihisi danu.
32Badina be lauegu tamana dekenai gwauhamata lau henia vadaeni, inai mero totona lau gwau, ‘Bema lau hakaua lou lasi oi dekenai mai mauri danu, kerere be lauegu latanai do ia noho, ia lao bona hanaihanai.’
33Unai dainai lohia e, lau noinoi oi dekenai, lau be oiemu hesiai tauna davana lasi do oi halaoa, inai mero ena gabuna lau abia. To ia be iena kakana danu do idia giroa lou.
34Badina be edena bamona lauegu tamana dekenai do lau giroa lou, bema mero lau danu be lasi? Lau ura lasi inai dika badana lauegu tamana dekenai ia vara be lau itaia.”
