1Iakobo ese guna iena tamana ia noho gabuna dekenai ma ia noho, Kanana tano dekenai.
2Iakobo ena natuna edia sivarai be inai: Iosepa ena mauri lagani be 17 neganai, ia bona iena kakana taudia ese mamoe bona nani idia naria. Inai kakana taudia be iena tamana ena adavana Bileha bona Silipa edia natudia. Vadaeni Iosepa ia lao iena tamana dekenai, iena kakana taudia totona ia samania karaia, badina idia ese kara dika haida idia karaia.
3Israela ese inai Iosepa dekenai ia lalokau henia bada, badina ia be tau buruka neganai ia havaraia, to iena natuna haida dekenai ia lalokau henia maragi, vadaeni Israela ese kouti dabua latana, namona momokani, mai ena imana lata danu ia karaia, Iosepa dekenai ia henia.
4Iena kakana taudia idia itaia, edia tamana be Iosepa dekenai ia lalokau henia bada, idia dekenai ia lalokau henia maragi. Vadaeni, idia badu henia Iosepa dekenai, hereva namona ta idia gwauraia lasi ia dekenai.
5Inai Iosepa be ia nihi, iena nihi be iena kakana taudia dekenai ia hamaoroa. Unai dainai idia badu dikadika ia dekenai.
6Ia hamaoroa idia dekenai, ia gwau, “Lauegu nihi mani lau hamaoroa umui dekenai.
7Lauegu nihi be inai bamona: Ita be uma dekenai uiti ita guia. Vadaeni lauegu uiti be ia toreisi, to umui emui uiti be idia gini hagegea lauegu uiti dekenai. Vadaeni emui uiti idia tomadiho henia lauegu uiti dekenai.”
8Vadaeni iena kakana taudia ese idia gwau henia ia dekenai, idia gwau, “Oi be aiemai king do oi lao, a? Oi ese do oi lohia ai dekenai, a?” Vadaeni iena nihi bona iena hereva dekenai idia edia badu idia habadaia noho ia dekenai.
9Ma ia nihi lou, iena nihi be iena kakana taudia dekenai ia hamaoroa, ia gwau, “Lau nihi lou vadaeni. Lauegu nihi dekenai be dina bona hua, bona hisiu 11 idia toma diho henia lau dekenai.”
10Iosepa ese unai nihi be iena tamana bona iena tadikakana taudia dekenai danu ia hamaoroa. Vadaeni iena tamana ese Iosepa dekenai ia hereva mai badu danu, ia gwau, “Oiemu nihi ena anina be dahaka? Lau bona oiemu sinana bona oiemu tadikakana do ai tomadiho henia oi dekenai, a?”
11Vadaeni iena kakana taudia be idia badu dikadika mai mama danu, to iena tamana ese Iosepa ena nihi ia laloa noho.
12Dina ta Iosepa ena kakana taudia be Sekema dekenai idia lao, edia tamana ena mamoe naria totona.
13Vadaeni iena tamana Israela ia hereva Iosepa dekenai, ia gwau, “Oiemu kakana taudia be Sekema dekenai mamoe idia naria, ani? Oi mai, oi do lau siaia idia dekenai.” Iosepa ia haere, ia gwau, “Lau hegaegae inai.”
14Iena tamana ese ma ia hamaoroa, ia gwau, “Vadaeni oi lao. Oi itadia, oiemu kakana taudia be idia namo o lasi, bona mamoe danu be edena bamona. Unai murinai oi giroa mai, oi hadibaia lau.” Vadaeni ia siaia, Heberona ena koura dekena amo ia lao, Sekema dekenai ia ginidae.
15Vadaeni tau ta ese Iosepa ia itaia, tano palaka dekenai ia loaloa noho, vadaeni ia nanadaia, ia gwau, “Dahaka oi tahua?”
16Iosepa ia haere, ia gwau, “Lauegu kakana taudia lau tahua. Mani emu kara, oi hadibaia lau, idia be edeseni mamoe idia naria noho.”
17Unai tau ia gwau, “Inai gabu idia rakatania vadaeni. Badina idia hereva lau kamonai, idia gwau, ‘Ita lao Dotana dekenai.’ ” Unai dainai Iosepa be idia edia murina dekenai ia lao, Dotana dekenai idia ia davaria.
18To ia be sisina daudau dekenai idia itaia, ia do mai kahirakahira lasi neganai, idia herevahereva, idia gwau, “Dohore ita alaia mase.”
19Idia sibona idia herevahereva, idia gwau, “Itaia, unai nihi tauna ia mai inai.
20Ita alaia mase, inai guri ta, ranu ia noho lasi gauna dekenai do ita negea diho. Vadaeni, dohore ita gwau, ‘Dagedage gauna ta ese ia alaia mase.’ Unai dekena amo dohore ita itaia, iena nihi ena anina be dahaka.”
21To Rubena ese unai hereva ia kamonai, vadaeni ia ese idia edia imana dekena amo Iosepa ia hamauria gwauraia, ia gwau, “Lasi. Iena mauri ita kokia lasi.
22Ita alaia mase lasi. Inai guri dekenai, taunimanima lasi gabuna dekenai do ita negea diho, to do ita hisihisi henia lasi.” Unai bamona ia hereva, badina iena laloa be idia edia imana dekena amo do ia hamauria, iena tamana dekenai do ia henia lou gwauraia.
23Vadaeni, Iosepa be iena kakana taudia dekenai ia ginidae neganai, idia dogoatao, iena kouti dabua latana mai imana lata danu idia kokia.
24Idia ese Iosepa idia abia lao, guri ta dekenai idia negea diho, unai guri dekenai be ranu ia noho lasi.
25Vadaeni idia helai diho, idia aniani. Edia matana idia negea, laolao taudia haida idia itaia, idia be Isamaela taudia Gileada dekena amo idia mai, Aigupito dekenai idia lao gwauraia, edia kamelo be aniani edia muramura, bona muramura mai bonana namo idia huaia.
26Vadaeni Iuda ese iena tadikakana taudia ia hamaorodia, ia gwau, “Iseda tadina do ita alaia, bona iena mase do ita hunia, ena anina be dahaka?
27Namo inai Isamaela taudia dekenai do ita hoia, iseda imana dekenai ita hadikaia lasi, badina ia be iseda tadina momokani, iseda hidiona bona iseda rarana.” Vadaeni iena tadikaka taudia ese, iena hereva idia abia dae.
28Inai hoihoi taudia be Midiana dekena amo idia raka hanaia, vadaeni Iosepa be iena kakana taudia ese guri dekena amo idia veria daekau. Isamaela taudia dekenai idia hoia, iena davana be siliva moni 20. Vadaeni Isamaela taudia ese Iosepa idia abia lao Aigupito dekenai.
29Rubena ia giroa lou guri dekenai, to Iosepa be ia noho lasi. Vadaeni iena dabua ia darea, iena lalohisihisi toana unai.
30Iena tadina taudia dekenai ia giroa lou, ia gwau, “Mero be ia noho lasi! Edena bamona dohore lau karaia?”
31Vadaeni idia ese Iosepa ena kouti dabua latana idia abia, nani ena natuna ta idia alaia, nani ena rarana dekena amo kouti dabua idia hamiroa.
32Vadaeni inai kouti dabua idia abia lao edia tamana dekenai, idia gwau, “Inai be ai ese ai davaria. Oi itaia inai be oiemu natuna ena kouti dabua, a?”
33Ia itaia neganai ia gwau, “Inai be lauegu natuna ena kouti dabua. Uda boroma ta ese ia koria mase vadaeni. Momokani, Iosepa ia mase vadaeni.”
34Vadaeni Iakobo ese iena dabua ia darea, dabua korema ia kwatua, iena lalohisihisi toana unai. Iena natuna totona dina bona hanuaboi ia taitai ia lao dina momo.
35Vadaeni iena natuna tatau bona hahine ibounai idia lao ia dekenai, iena lalona idia hanamoa totona. To ia ura lasi iena lalona do idia hanamoa, vadaeni ia tai mai boiboi danu, ia gwau, “Lasi. Lauegu natuna dekenai mase gabuna dekenai dohore lau lao, mai tai danu.” Ia taitai noho unai bamona, iena natuna totona.
36Inai Midiana taudia ese Iosepa idia hoia Aigupito dekenai, tau ta ladana Potifara dekenai. Potifara be Aigupito ena king Farao, ena tuari oreana ena biaguna ta.
