Gaalu Sɛʋɛi 16:16-35

¹⁶Moize ɠɛni Kɔlee ma: «Ɗa-o, è ʋolu nuiti-yo, é ɓɔ Aalɔn ʋa, à ɠula kɛlɛma lina Ɠɔoɠɔ GALAGI ɠakala.

¹⁷Wo ɠilagilagi, ani maku nɛɛnɛ gala liɠii zeɠe, è ani maku nɛɛnɛgi ʋu su, è ʋa Ɠɔoɠɔ GALAGI ɠakala. Wa ʋa ga ani maku nɛɛnɛ gala liɠi unfelegɔ puulɔɔlugɔ (250), ɗa-o, Aalɔn-o, wo ɠilagilagi ɠa nɔnɔi zo ya.»

¹⁸Ti ɠilagilagi, ti ta-ani maku nɛɛnɛ gala liɠii zeɠeni, ti abulekaiti pu su, ti ani maku nɛɛnɛgi ʋu ga. Ti pɛ ti loni GALA daaɠomi seɠe ʋɛlɛi laaʋɛ, Moize ɓalaagi ta Aalɔn.

¹⁹Kɔlee bɛbɛi ɠaalɛɛni ba ti laalɔɠɔma GALA daaɠomi seɠe ʋɛlɛi laaʋɛ. Naazu, Ɠɔoɠɔ GALAGI ná-lɛbiyai ɠulani kɛlɛma bɛbɛi kpein bɛ.

²⁰Ɠɔoɠɔ GALAGI ɠɛni Moize ta Aalɔn ma:

²¹«À ɠula niima nuɓusɛiti saama, nà ti undaaʋilisu ɠaniɠanigi nɔ!»

²²Kɛlɛ Moize ta Aalɔn ti laaʋɛɛni zooi ma, ti maanɛɛnɛi wo, ti ɠɛ ma: «Ee, GALA! GALAGI nii deve kpɛtɛaniiti kpein zɛnvui ma, ɗa ʋaazu bɛbɛi kpein sosu ga nu ɠilagi ná-kotoi?»

²³Ɠɔoɠɔ GALAGI ɠɛni Moize ma:

²⁴«Ɓɔɛ nuɓusɛiti pɔ, è devei ve ti ya ga ti maaɠooza Kɔlee ta Datan ta Aɓilameni ta-zeɠe ɠotaiti ba.»

²⁵Moize wuzeɠeni zooi ma. Izelayɛle ɠundiɠiiti ti ʋilɛni polu, ti li Datan ta Aɓilame ʋɔ bɛ.

²⁶É ɠɛni nuɓusɛiti ma: «À maaɠooza kotoba nui tɛiti ta-zeɠe ɠotaiti ba. À mina vɔɔɠu ti-yeaɠɔligi tanɔpɛ ba, ni wo la wɔinni, wo undaa ʋa ʋili ta-ɠotoiti faa zu!»

²⁷Naazu, ti maaɠoozani Kɔlee ta Datan ta Aɓilameni ta-zeɠe ɠotaiti ba. Datan ta Aɓilame ti ɠulani, ti lo ta-zeɠe ɠotaiti daaʋɛ, ta ti-anzaiti, ta ti-loun zunuiti, ta ti-loun lointi.

²⁸Moize ɠɛni ma: «Nii ɠa wa kwɛɛ da ga Ɠɔoɠɔ GALAGI ɠa é tèʋega, ga gè kɛɛwotii niiti kɛ, gè la faa nɔpɛ kɛɛzu ɓɔɠɔ ʋɛ ɠana nɔ.

²⁹Ni niima nuɓusɛiti ta zaana ga nu zaa ʋele nɔ, eɠɛʋelei deveai la nuɓusɛi ma ga é za, naazu Ɠɔoɠɔ GALAGI laade é ʋa vali mà, é ʋa tèʋe.

³⁰Kɛlɛ ni Ɠɔoɠɔ GALAGI a fai ta ɠɛɛna, nii kɛɠala la dɛ ɠɛɛni, ni zooi a laalaona, é ti ɓɔle ta ti-yeaɠɔligiti kpein, ti ma vului yei gɔvɛalaazu, wa kwɛɛ naazu ga nui niiti ti ɲɛɛɠulaʋɛ Ɠɔoɠɔ GALAGI zu.»

³¹Moize ɓeni nɔ ga woo ɠaaɓela, zooi ʋalini ga Datan ta Aɓilameni kɔɠɔwu.

³²Zooi laalaoni, é ti ɓɔle, ta ta-ʋɛlɛyeɠeiti, ta Kɔlee ná-nuiti, ta ti-ɠɔligiti.

³³Naama nuiti ti yeini gɔvɛalaazu ga ti ma vului, ta tɔnɔiti kpein. Zooi laaɠuluni ti ma ʋolu. Pele ɠana ti ɠaalani da, nuɓusɛiti saama.

³⁴Ta-ɓee wooi mɛnigai ma, Izelayɛle nuiti kpein ti ɠɛni loni ná maaɠoolii zu, ti ɓizɛni, ti ɗa kpeei loo, ti ɠɛ ma: «Ade ɓizɛ, zooi mina ade ɓɔle, ada ɓalaa!»

³⁵Abui ɠulani Ɠɔoɠɔ GALAGI ʋɔ bɛ, é zunu unfelegɔ puulɔɔlugɔiti (250) gala, niiti ani maku nɛɛnɛgi ɠɛni ti ya.