10Nuɓusɛiti kpein ti ɠɛni ɠɛɛzu, ti ti zɔɔ ga kɔtui, ti ti ʋaa, kɛlɛ gaamanɔ Ɠɔoɠɔ GALAGI ná-lɛbiyai ɠulani kɛlɛma Izelayɛle nuiti bɛ GALA daaɠomi seɠe ʋɛlɛi maazu.
11Ɠɔoɠɔ GALAGI ɠɛni Moize ma: «Niima nuɓusɛiti ta yɛsu bɛ̀lɛʋilisu eyɛsu siɛgi ɓɛgele zu? Ta yɛsu ɠɛlɛzu ga ti mina la dà, eyɛsu siɛgi ɓɛgele zu? Anɛɛ gè poo gola mɔinmɔin kɛa ti zaama.
12Nà ɗɔfɔ zeeɓɛi ʋɛɛzu ti ʋa, gè ti-ma zuwu ɠaaleʋe, naa ʋolu nà zii ɓɛtɛzu, é ɠula è zu, nii sɛbɛi a wɔɔlɔ, ta é mɔin Izelayɛle ʋa!»
13Moize Ɠɔoɠɔ GALAGI wooɠaaʋoteni, é ɠɛ ma: «Ezipete nuiti ti kwɛɛ ga ɗa ɠa è niima nuɓusɛiti kula ta-yooi ʋa ga ɗa-zɛbɛi.
14Ti bogɛ niima you zu nuiti kpein ma. Ti mɛnigɛ ga ɗa, Ɠɔoɠɔ GALAGI, ɗa niima nuɓusɛiti saama, ɗa ɓɔɠɔ lɛɛzu kpezekele. Ti mɛnigɛ ga ɗa-lonaɓiingi ɠa zɛlɛni ti maazu, ɗa losu ti luɠɔ foloi tonaɓiingi zu, ta kpidii abuzogi zu.
15Ni ɗa niima nuɓusɛi kpein paana eɠɛ nu ɠila, zooiti ti è-ɠɛɛvaiti ma woomɛniga, è ti ɠɛai, naati ta ʋaazu ɠɛɛzu ma:
16‹Ɠɔoɠɔ GALAGI la ɓena zobo sɔlɔɔ, é ʋa li ga nuɓusɛi tɛiti zooi naa zu, nii é ma ɠona woni ga é fe ti ya, naa ɠa é kɛai é ti ʋaa teʋebai zu.›
17Niizu Màliɠii, nà è maanɛɛnɛzu, ɗa-zobogi ɠula kɛlɛma ga zɛbɛi pɛ, eɠɛʋelei è boni la gi ma ga:
18‹Ɠɔoɠɔ GALAGI yii la ɗa ga ɠula fala, kpɛtɛʋɛ wooɠɛɠiladai zu, toɠa ɗa faaɠaaza golai zuvaayɛ ta tɔ koloɠologi. Kɛlɛ é la ɗa ga sɔba nui levea ga sɔbalala nu, toɠa doun kɛɛɠɛiti ta-vaaɠaaza golai zala ti-lointi ma, eyɛsu yamani zaʋasiɛi ɓaa naanisiɛi.›
19Nà è maanɛɛnɛzu, niima nuɓusɛiti suvaayɛ ga ta-vaaɠaaza golai, ɗa-wooɠɛɠiladai maaʋele ma, eɠɛʋelei nɔ è niima nuɓusɛiti suvaayɛsu da, è zo ti ɠula voloi ma Ezipete yooi ʋa, é zeeli za ma.»
20Ɠɔoɠɔ GALAGI ɠɛni ma: «Gè ti maavaayɛga, eɠɛʋelei è falia la.
21Kɛlɛ eɠɛʋelei gè vulua la ga ɠite, nɛ̀i gè ga Ɠɔoɠɔ GALAGI, nà-lɛbiyai eteai pɛ daavegai, gè ɠonaa ga:
22Nui niiti ti nà-lɛbiyai ɠaani, ta poo golaiti gè ti ɠɛɛni Ezipete yooi zu, ta teʋebai zu, ti sùɠɔɠɔ daa ɠɛa puu, ti la ɠoloni bɛ̀,
23ti taɠila kpalaa, ti la zooi naa ɠaa, nii gè ma minazeɠe boni, gè ɠona su ti-mɛmɛwolani bɛ. Tɛiti kpein ti bɛ̀lɛʋiligai, taɠila kpalaa ge la lɛa ná.
24Kɛlɛ nà-botiɠɛ nui Kalɛɓe, ɠi kili ka é ɠɛni naa ʋɛ, kɛɛʋɛ bɛ̀ ga wooɠɛɠila nu eyɛsu ɠɔ. Naa ɠa é ba, nà lɛ ga naa, ma yooi zu, ʋɛ é liini ná, mavofodaiti ta naa zɔlɔɔ.
25Tɛi Amalɛke nuiti ta Kanaan nuiti ti zeini nɛmɛi zu, lina sobu nɔ, wa nuiti gaaɠalesu ma teʋebai zu, wo li ga Seeli Kpoloɗɛi ʋɔ pelei.»
26Ɠɔoɠɔ GALAGI ɠɛni Moize ta Aalɔn ma:
27«Nà niima nuɓusɛ ɲɔiti zɛsu ná, ti ɗa unsuyelii lo dàalɔɠɔma, eyɛsu yeelɛ? Mazɔlɔɔ gè Izelayɛle nuiti ta-unsuyeliiti mɛnigɛ, ti tosu dàalɔɠɔma.
28Ɠɛ ti ma: ‹Ɠɔoɠɔ GALAGI wooi ɠaa: Eɠɛʋelei gè vulua la ga ɠite, nà wo zosu, eɠɛʋelei wo wooiti bogai la gòizu.
29Wa za teʋebai tɛi su, wo-ma ʋoomaiti ti la ná. Wɔiti dɔin ti wo ɠaaluni, é zo kona ʋuufelegɔ (20) ma, é lɛ zeemaazu, mazɔlɔɔ wo unsuyelii logɛ dàalɔɠɔma,
30wo la mɔ lɔa zooi naa zu, nii gè ma minazeɠegi woni, gè ɠona ga wa zei ga, kɛni Kalɛɓe, Yefunee ná-doun zunui, ta Zozuwe, Nun ná-doun zunui.
31Kɛlɛ wo-lointi, wo ɠɛni ɠɛɛzu ma ta ɠɛ ga wo zili nuiti daamiani, nà liizu ga tiye ma yooi zu, ta zooi naa ɠwɛɛ, nii wo bɛlɛʋiligai.
32Kɛlɛ wɔun, wa zaazu teʋebai tɛi su.
33Wo-lointi ta ɠɛɛzu ga teʋeteʋe nuiti, kona ʋuunaanigɔ (40) laawu. Ta wa-wooʋaladai ma zalai zɔlɔɔ ɠana, nii wo kɛa ga ze, eyɛsu wo pɛ wo za teʋebai zu.
34Folo ʋuunaanigɔ (40) ɠa wo kɛɛni zooi zuʋɛtɛsuʋɛ, tama, wa wa-vaaɠaaza golai ma zalai zɔlɔɔ kona ʋuunaanigɔ (40) laawu, kona gila, folo ɠilagi ʋotogi zu. Wa kwɛɛ naazu ga wa ɠɛlɛna bà, wa ɓala.
35Nà, Ɠɔoɠɔ GALAGI, nà ɠa kpɔ̀ɛai. Ungo, zekana gè ʋaazu niima nuɓusɛ ɲɔiti sosu da, ti ɠiliai ʋa, ti wuzeɠe dàalɔɠɔma. Ta ɲɛɛlɛzu teʋebai tɛi su, ti za ná.»
36Zunuiti Moize ti leʋeni ga ti zooi zuʋɛtɛ, ti ɠalegai ma ma, ti nuiti unsuleʋeni, ti unsuyelii lo daalɔɠɔma, ga zooi zu vaiti suvala pelei.
37Ɠɔoɠɔ GALAGI zunui naati doɠani, ti za, tɔɔzei ti zooi ná-fai zuvalani.
38Zunuiti ti liini zooi zuʋɛtɛsu, ti pɛ ti zaani, kɛni Zozuwe, Nun ná-doun zunui, ta Kalɛɓe, Yefunee ná-doun zunui, naati nɔ ɠa ti yɛni vulua.
39Siɛgi zu Moize Ɠɔoɠɔ GALAGI laawooi woni da Izelayɛle nuiti ma, nuɓusɛiti gola ɠaalɛini.
40Poluma zobui, ti wuzeɠeni ga sobuzobui, ti lɛ gize yooi ʋɔ pelei, ti ɠɛ ma: «Gi koto ɠɛa, kɛlɛ gá ga lɛ, ʋɛ Ɠɔoɠɔ GALAGI ɓɔɛai, é ʋilɛ ná ʋa.»
41Moize ɠɛni ti ma: «Leeni vaa zu wo zeɠezu Ɠɔoɠɔ GALAGI wooi ʋolu? Wo la zobo sɔlɔɔga!
42À mina lɛ, mazɔlɔɔ Ɠɔoɠɔ GALAGI la wo zaama. Wo zili nuiti ti mina wo ʋaa fuun.
43Mazɔlɔɔ wa Amalɛke nuiti kaazu luɠɔ, ta Kanaan nuiti, wa ɓɔɠɔ ʋaa. Ʋelei wo ʋoluavegai da Ɠɔoɠɔ GALAGI ʋa, é la mɔ ɠɛa wo ʋa.»
44Ti daani mɛɛ, kɛni ti lɛɛni gize yooi ʋɔ pelei, kɛlɛ Ɠɔɠɔ GALAGI ná-minazeɠe kesui la ɠɛni liini, ta Moize ɓalaa, ti ʋa ɠula ti-ʋuuzuʋɛ ʋa.
Gaalu Sɛʋɛi 14
Gaalu Sɛʋɛi 14:10-44